އެފްރިކާ ކަޕް އޮފް ނޭޝަންސްގެ އެންމެ ފަހުގެ ޗެމްޕިއަން ސެނެގޯލް ކަޓުވާލުމަށްފަހު ކުއާޓާ ފައިނަލުގެ ޖާގައެއް މުބާރާތް ބާއްވާ ގައުމު އައިވަރީ ކޯސްޓުން ހޯދައިފިއެވެ.
މުބާރާތުގެ ދެވަނަ ބުރުގައި ރޭ އައިވަރީ ކޯސްޓުން ސެނެގޯލް ބަލިކުރީ ފުރިހަމަ ވަގުތު ހަމަވިއިރު 1-1 ގެ ނަތީޖާއަކުން އެއްވަރުވެ، ނަތީޖާ ނެރުމަށް ޖެހި ޕެނެލްޓީގައި 5-4 ގެ ނަތީޖާއަކުން ކުރި ހޯދައިގެންނެވެ.
މި މެޗު ފަށައިގެން ހަތަރުވަނަ މިނެޓުގައި ސެނެގޯލްގެ ސަޑިއޯ މާނޭ ނަގައިދިން ހުރަހަކުން ހަބީބް ޑިއާލޯ ވަނީ ލަނޑެއް ޖަހައި، އެ ޓީމަށް ލީޑު ނަގައިދީފައެވެ. އައިވަރީ ކޯސްޓުން ނަތީޖާ އެއްވަރުކުރި ލަނޑު މެޗު ނިމެން ތިން މިނެޓަށް ވެފައިވަނިކޮށް ލިބުނު ޕެނަލްޓީއަކުން ކާމިޔާބުކޮށްދިނީ ފްރޭންކް ކެސީއެވެ.
މި މެޗުގެ ފުރިހަމަ ވަގުތު ހަމަވެގެން ކުޅުނު އިތުރު ވަގުތުގެ ދެ ހާފުގައި ދެ ޓީމަށްވެސް މާ އެދެވޭ ހަމަލާއެއް އުފެއްދިފައެއް ނުވެއެވެ. އެހެންކަމުން މެޗުގައި ނަތީޖާ ނެރުމަށް ޖެހި ޕެނަލްޓީ ޝޫޓްއައުޓުގައި ސެނެގޯލުގެ މޫސާ ނިއަކާޓޭ ފޮނުވާލި ޕެނަލްޓީ ކާމިޔާބު ނުކުރެވުނުއިރު، އައިވަރީ ކޯސްޓް މޮޅުވި ޕެނެލްޓީ ކާމިޔާބުކުރީ ކެސީއެވެ.
މި މޮޅާއެކު ކުއާޓާއަށް އައިވަރީ ކޯސްޓް ދަތުރުކުރިއިރު، ދެވަނަ ބުރުގެ ޖާގައެއް އެ ޓީމުން ހޯދީ ތިންވަނަގައި އެންމެ ރަނގަޅު ނަތީޖާ ހޯދި ޓީމުތަކުގެ ތެރޭގައި ހިމެނިގެންނެވެ. އެގޮތުން ގުރޫޕް ސްޓޭޖުގައި ދެ މެޗުން ބަލިވުމުން، އެ ޓީމުގެ ކޯޗު ވަނީ މަގާމުންވެސް ވަކިކޮށްފައެވެ.
މީގެ އިތުރުން މި މުބާރާތުގައި ރޭ ކޭޕް ވާޑްއިން ވަނީ 1-0 މޮރިނަޓޭނިއާގެ މައްޗަށް ކުރި ހޯދައި ކުއާޓާއިން ޖާގައެއް ހޯދާފައެވެ. މި މެޗުގެ ހަމައެކަނި ލަނޑު މެޗު ނިމެން މިނެޓަކަށް ވެފައިވަނިކޮށް ކާމިޔާބުކޮށްދިނީ ލިބުނު ޕެނެލްޓީއަކުން ރަޔަން މެންޑެސްއެވެ.