ދެމެހެއްޓެނިވި ގޮތެއްގައި ދަނޑުވެރިކަން ތަރައްޤީކޮށް ކުރިއެރުވުމަށް ސަރުކާރުން ކަނޑައަޅުއްވާފައިވާ ސިޔާސަތުގެ ދަށުން، ދަނޑުވެރިކަމާބެހޭ ވުޒާރާއިން ތިމާވެށްޓާއި ރައްޓެހި ގޮތެއްގައި ގަސްކާނާ އުފެއްދެވުމުގެ ޢަމަލީ މަސައްކަތް ޏ.ފުވައްމުލަކުގައި ފަށްޓަވައިފިއެވެ.
މިޕްރޮގްރާމްގެ ދަށުން ފުވައްމުލަކުގައި ކާދު ތައްޔާރުކުރާނެ ފެސިލީޓީއެއް ޤާއިމްކޮށްދެއްވައި، އެ މަސައްކަތަށް ބޭނުންވާ ސާމާނާއި އާލާތްތައް ވަނީ ދެއްވާފައެވެ. އަދި ކާދު ތައްޔާރުކުރުމާއި ގަސްކާނާ ތައްޔާރުކޮށް ބޭނުންކުރުމުގެ މަޢުލޫމާތު ފޯރުކޮށްދިނުމަށް ފުވައްމުލަކުގައި މިހާރު ދަނީ ތަމްރީން ޕްރޮގްރާމެއްވެސް ހިންގަވަމުންނެވެ.
މިޕްރޮގްރާމްގައި އަށްޑިހަ ހަތް ފަރާތަކުން ބައިވެރިވެއެވެ. މިޕްރޮގްރާމްތަކުގެ މަޤްޞަދަކީ، ރާއްޖެއިން ބޭރުން އެތެރެކުރާ ގަސްކާނާގެ ސަބަބުން ދަނޑުބިމަށާއި ގަސްގަހަށް ކުރާ ނޭދެވޭ އަސަރު ކުޑަކުރުމަށް ރަށުން ލިބެން ހުރި ފީވެ، ހަލާކުވާ ޒާތުގެ ތަކެތި ބޭނުންކޮށްގެން ދަނޑުވެރިންނަށް އަމިއްލައަށް ކާދު ތައްޔާރުކުރަން ދަސްކޮށްދިނުން ކަމަށް އެވުޒާރާއިން ވިދާޅުވެއެވެ. މީގެއިތުރުން ދަނޑުތަކަށް ގެއްލުންދޭ ފަނިފަކުސާއާއި ޖަރާސީމް ކޮންޓްރޯލްކުރުމަށް ކެމިކަލްގެ ބަދަލުގައި ދަނޑުވެރިންނަށް ފަސޭހައިން ގަސްކާނާ ތައްޔާރުކުރަން ދަސްކޮށްދީ، ތިމާވެއްޓާއި ރައްޓެހި ދަނޑުވެރިކަމުގެ އުޞޫލުތަކަށް ދަނޑުވެރިން އަހުލުވެރިކުރުމަކީވެސް މިޕްރޮގްރާމްގެ މަޤްޞަދެއް ކަމަށް އެވުޒާރާއިން ވިދާޅުވެއެވެ.