ރާއްޖޭގެ ކުޅިވަރުގެ މުސްތަގުބަލާ ގުޅޭގޮތުން 20 އަހަރު ޕްލޭނެއް ހެދުމަށް ހަމަޖެހިފަވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެސްއެމުން ގެނެސްދިން "ރާއްޖެ މިއަދު" ޕްރޮގްރާމުގައި ވާހަދައްކަވަމުން ރާފިޢު ވިދާޅުވީ މި ޕްލޭން އެކުލަވާލަން ހަމަޖެހިފައިވަނީ ކުޅިވަރުގައި ޝާމިލުވާ އެންމެހާ ފަރާތްތަކާއެކުގައި ކަމަށެވެ. އޭގެތެރޭގައި ކުޅިވަރު އެސޯސިއޭޝަންތަކާއި، ކުޅިވަރު ކައުންސިލާއި، މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އިތުރުން ސްޕޯޓްސް ކޮމިޝަނާއި ކުޅިވަރު ލެޖެންޑުންގެ ޚިޔާލާއި ފިކުރު ހިމެނޭ ގޮތަށް ކަމަށްވެސް ވިދާޅުވިއެވެ.
ސަބަބެއްގެ ގޮތުގައި ވަޒީރު ވިދާޅުވީ މިއީ ކުޅިވަރުގައި ޝާމިލުވާ ހުރިހާ ފަރާތްތަކުގެ ލާބަޔާއި މަންފާ ލިބޭގޮތަށް ކުރައްވަން ގަސްތުކުރާ ކަމެއް ކަމަށާއި، މިކަމުގެ އެންމެންގެ އެއްބާރުލުން ލިބޭނެ ކަމާމެދު ޝައްކު ނުކުރައްވާ ކަމަށެވެ. އަދި މި ޕްލޭންގެ އެންމެ ބޮޑު ބޭނުމަކީ ރާއްޖޭގައި ކުޅިވަރު ކުރިއެރުވޭނެ ގޮތްތައް ހޯދައި ބެލުމަށްފަހު، 10 އަހަރު ފަހުން ހާސިލުކުރަން ބޭނުންވާ ލަނޑުދަނޑިތަކަށް ވާސިލުވުމަށް މަސައްކަތްކުރުން ކަމަށްވެސް ވިދާޅުވިއެވެ.
ވަޒީރު ވިދާޅުވީ މި ޕްލޭންގައި 20 އަހަރުގެ ތެރޭގައި މެޑަލް ހޯދުމަށް ކުރަންވީ ކޮންކޮން މަސައްކަތެއްކަން އެނގިގެންދާނެ ކަމަށާއި، ރާއްޖޭގެ ކުޅިވަރުތަކުގެ މުސްތަގުބަލް ކުރާހާލުމަށް ތައްޔާރުވަނީ ތަސައްވަރެއްގެ ތެރެއިން ކަމަށެވެ. އަދި 20 އަހަރުން ޕްލޭންގައި ހިމެނޭ ކަންކަން ހާސިލުކުރުމަށް ކޮންމެ ފަސް އަހަރަކުން މަސައްކަތްކުރާ ގޮތަށް ޕްލޭން ބައްޓަންކުރައްވާނެ ކަމަށްވެސް ވިދާޅުވިއެވެ.
"މީގެ 10 އަހަރު ފަހުން ރާއްޖެއިން ބޭނުންވަނީ އޮލިމްޕިކްސްއަށް ކޮލިފައިވެގެން މެޑަލް ހޯދުންތޯ، ނޫނީ އެހެން ކުޅިވަރުތަކުން ގޯލްޑް ނުނީ ބްރޮންޒް ނޫނީ ސިލްވާ ހޯދުން، މީގެން މެޑެއްޔެއް ހޯދޭނީ ކިހާ ދުވަހަކުންތޯ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ވަޒީރު ވިދާޅުވީ އަބަދުވެސް ބަދަލުތަކެއް އަންނަންޖެހޭ ކަމަށް ގަބޫލުކުރެއްވި ނަމަވެސް، މުޅި ޕްލޭނަށް ބަދަލު އަންނަންޖެހޭ ކަމަކަށް ގަބޫލު ނުކުރައްވާ ކަމަށެވެ. އަދި މިކަން މުޅިން އެއްކޮށް ފައިނަލްނުވި ކަމުގައިވިޔަސް، މި ވަގުތު މަޝްވަރާކުރެމުން ދަނީ ކޮންމެ ހަތަރު އަހަރަކުން ރިވިއުކުރުން ކަމަށްވެސް ވިދާޅުވިއެވެ.
މީގެ އިތުރުން ފުރަތަމަ ޕްލޭންގައި ބުލޫ ޕްރިންޓެއް އެކުލަވާލުމަށްފަހު، ކަމާއި ގުޅުންހުރި މުއައްސަސާތަކާ އެކު މަޝްވަރާކުރައްވާނެ ކަމަށްވެސް ވަޒީރު ވަނީ ވިދާޅުވެފައެވެ.