ޗައިނާ ސަރުކާރުގެ ފަރާތުން ޓޭބަލް ޓެނިސް ކުޅޭ ސާމާނު ދިވެހިރާއްޖެއަށް ހަދިޔާކޮށްފިއެވެ.
މާލޭ ޓީޓީ ހޯލުގައި މިއަދު އޮތް ރަސްމިއްޔާތުގައި ސަރުކާރުގެ ފަރާތުން ކުޅިވަރު ސާމާނާ ހަވާލުވެވަޑައިގެންނެވީ ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޟެވެ. އަދި ޗައިނާ ސަރުކާރުގެ ފަރާތުން ސާމާނުތައް ހަދިޔާކުރެއްވީ އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވޮން ލީ ޝިންއެވެ. މިރަސްމިއްޔާތުގެ ޗައިނާ އެމްބަސީގެ އިސްވެރިންނާއި، ކުޅިވަރާއި ހަށިހެޔޮކަމާ ބެހޭ ވުޒާރާގެ އިސްވެރިންގެ އިތުރުން ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އޮފިޝަލުންނާއި ކުޅުންތެރިން ވަނީ ބައިވެރިވެފައެވެ.
ޗައިނާ ސަފީރު ވަން ލީ ޝިން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާއެކު ރާއްޖޭގެ ކުޅިވަރު އައު އުސްމިންތަކަކަށް ގެނެސްދިނުމަށް ޗައިނާ ސަރުކާރުން އެހީތެރިވެދެއްވާނެ ކަމަށެވެ. އަދި މި އެހީއާއެކު ރާއްޖޭގެ ޓޭބަލް ޓެނިސް އިތުރަށް ކުރިއަރާނެ ކަމަށް އުއްމީދުކުރަައްވާކަމަށްވެސް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ސްޓޭޓް މިނިސްޓަރު މުޙައްމަދު ރިޔާޟް ވިދާޅުވީ ޗައިނާއިން ރާއްޖޭގެ ކުޅިވަރަށް ދެއްވާ އެހީތެރިކަން އުފަލާއެކު ބަލައިގަންނަވާ ކަމަށާއި، މިއީ ދިވެހި ކުޅިވަރު ކުރިއެރުވުމަށް ލިބުނު ހިތްވަރެއް ކަމަށެވެ.
ޗައިނާ ސަރުކާރުން ހަދިޔާ ކުރި ޓީޓީ ސާމާނުތަކުގެ ތެރޭގައި ހިމެނެނީ 10 ޓީޓީ މޭޒާއި، 600 ރެކެޓާއި، 3000 ބޯޅައިގެ އިތުރުން ސްކޯ ބޯޑުތަކާއި ޓައިމްއައުޓް ސައިންތަކެވެ.
ޗައިނާއކީ ރާއްޖޭގެ ކުޅިވަރު ކުރިއެރުވުމަށް ގިނަ އެހީތަކެއްވަމުން އަންނަ ގައުމެކެވެ. އެގޮތުން މީގެ ކުރިންވެސް ޓޭބަލް ޓެނިސް އަދި ބާސްކެޓްބޯޅަ ކަހަލަ ކުޅިވަރުތައް ކުރިއެރުވުމަށް ގިނަ އެހީތަކެއް ވަނީ ވެފައެވެ. އަދި ޓޭބަލް ޓެނިހަށް ބަލާއިރު، ރާއްޖޭގެ ޓޭބަލް ޓެނިސް އެސޯސިއޭޝަނަށް މާލީ ގޮތުންނާއި، އެހެނިހެން ގޮތްގޮތުންވެސް ޗައިނާ ސަރުކާރުން އަންނަނީ އެހީވަމުންނެވެ.
ރާއްޖޭގެ ގައުމީ ޓޭބަލް ޓެނިސް ގައުމީ ޓީމެއް އެންމެ ފުރަތަމަ ބައިނަލްއަގުވާމީ މުބާރާތެއްގައިވެސް ވާދަކޮށްފައިވަނީ 1973 ވަނަ އަހަރު ޗައިނާގައި އޮތް މުބާރާތެއްގައެވެ.