އައިޖީއެމްއެޗްގެ 21 ވަނަ އަހަރީ ދުވަހާއި ގުޅިގެން އެހޮސްޕިޓަލްގެ ޑިޕާޓްމަންޓްތަކުން ދެމުންގެންދާ ޚިދުމަތްތަކާއި، ސިއްޙީ ޚިދުމަތްތަކުގެ މަޢުލޫމާތު އާންމުންނަށް އަންގައިދިނުމުގެ ކުރިޔަށްގެންދާ ފެއަރ 'އަސިސަ' ހުޅުވައިފިއެވެ.
މިއަދު ހަވީރު 04:00 އިން މިރޭ 10:00 އަށް ކުރިއަށްދާ މިފެއަރ ހުޅުއްވައިދެއްވީ ހިއުމަން ރައިޓްސް ކޮމިޝަންގެ ރައީސާ އާމިނަތު އީނާސްއާއި އައިޖީއެމް ހޮސްޕިޓަލުން ތަފާތު އެކި ޚިދުމަތްތައް ހޯދަމުންގެންދާ 4 ޕޭޝަންޓެކެވެ.
'އަސިސަ' ހުޅުއްވައިދެއްވާ ވާހަކަފުޅުދައްކަވަމުން ހިއުމަން ރައިޓްސް ކޮމިޝަންގެ ރައީސާ އާމިނަތު އީނާސް ވިދާޅުވީ އެކޮމިޝަނަށް ވޭތުވެދިޔަ އަހަރުގައި ސިއްޙީ ޚިދުމަތްދިނުމުގައި އިހުމާލުވެފައިވާކަމުގެ 83 މައްސަލަ ހުށަހަޅާފައިވާކަމަށެވެ. އަދި މިއަހަރުގެ މިހާތަނަށް 15 މައްސަލައެއް ހުށަހަޅާފައިވާކަމަށް އީނާސް ވިދާޅުވިއެވެ. އީނާސް ވިދާޅުވީ މިއިން ދޭހަކޮށްދެނީ ސިއްޙީ ޚިދުމަތްތައް ދެމުންދާ ފަރާތްތަކުން ދެވޭ ޚިދުމަތުގެ ފެންވަރު އިތުރަށް ރަގަޅުކުރަންޖެހޭކަންކަމަށާއި، މިފަދަ ފެއަރތަކުން މަޢުލޫމާތުތައް އިތުރަށް ލިބިގެންދިއުމަކީ އެފަދަ މައްސަލަތަކަށް ލިބިގެންދާނެ ޙައްލެއްކަމަށް ދެކެވަޑައިގަންނަވާކަމަށެވެ.
img:http://s1.psmnews.mv/images/660x400/14607386710372.jpg|އަސިސަ ފެއަރގެ ތެރެއިން- ފޮޓޯ: ޕިއެސްއެމް
އައިޖީއެމްއެޗްގެ ސީއީއޯ ބްރިގޭޑިއަރ ޖެނެރަލް ރިޓަޔަޑް ފަރުހަތު ޝަހީރު ވިދާޅުވީ އެހޮސްޕިޓަލުން ރައްޔިތުންނަށް ބޭނުންވާ ތަފާތު އެކި ސިއްޙީ ޚިދުމަތްތައް ފޯރުކޮށްދެމުންދާއިރު، ދުވާލެއްގެ މައްޗަށް ގާތްގަނޑަކަށް 1500 އެއްހާ ދިވެހިންނަށް ޚިދުމަތްދެވޭކަމަށެވެ. ފަރުހަތު ވިދާޅުވީ މިއަހަރުގެ މިހާތަނަށް ނުވަދިހަ ހާހަށްވުރެން ގިނަ މީހުން ޑޮކްޓަރަށް ދައްކާފައިވާކަމަށާއި، ފަނަރަހާހަށްވުރެން ގިނަ ޚިދުމަތް ދިވެހިން ހޯދާފައިވާކަމަށެވެ.
އައިޖީއެމްއެޗްގެ އެކި ޑިޕާޓްމަންޓްތަކުންވަނީ އެޑިޕާޓްމަންޓްތަކުން ދެމުންދާ ޚިދުމަތްތަކާއި ގުޅޭ މަޢުލޫމާތު އާންމުންނަށް ފޯރުކޮށްދީފައެވެ. އެގޮތުން ޑޮކްޓަރަށް ދެއްކޭނެ ގޮތްތަކާއި، ޚިދުމަތްތައް ދިނުމުގައި އަމަލުކުރާނެގޮތް ދައްކައިދީފައެވެ.