3 ޕާޓީއެއްގެ ލީޑަރުން ވާދަކުރާ ދާއިރާތަކަށް ޕީޕީއެމް-ޕީއެންސީން ވާދަނުކުރަން ނިންމައިފި

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި 3 ދާއިރާއަކަށް ވާދަނުކުރުމަށް ސަރުކާރު ހިންގާ ޕީޕީއެމް/ޕީއެންސީ ކޯލިޝަނުން ނިންމައިފިއެވެ.

ޕީޕީއެމް/ޕީއެންސީ ކޯލިޝަނުން ވާދަނުކުރަން ނިންމާފައިވަނީ 3 ޕާޓީއެއްގެ ލީޑަރުން ވާދަކުރައްވާ ދާއިރާތަކަކަށެވެ.

ޕީޕީއެމް/ޕީއެންސީ ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ކޮންގްރެސް ޕާޓީގެ ޗެއަރޕާސަން އަދި ސްޕެޝަލް އެޑްވައިޒަރ ޓު ދަ ޕްރެޒިޑެންޓް އަބްދުއްރަހީމް އަބްދުﷲ ވިދާޅުވީ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުޙައްމަދު ނާޒިމާއި އެމްޑީއޭގެ ލީޑަރު އަހުމަދު ސިޔާމް މުޙައްމަދު ވާދަކުރައްވާ ދާއިރާއަށް ޕީޕީއެމް ޕީއެންސީގެ ކެނޑިޑޭޓުން ވާދަނުކުރުމަށް ނިންމާފައިވާކަމަށެވެ. އަދި އެ ތިން ދާއިރާ ފިޔަވައި އެހެން ހުރިހާ ދާއިރާތަކަށް ޕީޕިއެމް/ޕީއެންސީން ވާދަކުރާނެކަމަށްވެސް އަބްދުއްރަހީމް ވިދާޅުވިއެވެ.

މަޖިލިސް އިންތިހާބުގައި ގާސިމް ވާދަކުރައްވާނީ ވޭތުވެދިޔަ 3 ދައުރުގައިވެސް އޭނާ ފުރުއްވި މާމިިގިލި ދާއިރާގެ ގޮނޑިއަށެވެ. ސިޔާމްވެސް ވާދަކުރައްވާނީ އޭނާ މިދިޔަ 3 ދައުރު ފުރުއްވި ދ. މީދޫ ދާއިރާގެ ގޮނޑިއަށެވެ. ދަނގެތި ދާއިރާގެ މެމްބަރަކަށް ހުންނެވި ނާޒިމް މިފަހަރުގެ އިންތިހާބުގައި ވާދަކުރެއްވުމަށް ނިންމަވާފައި ވަނީ މާފަންނު އުތުރު ދާއިރާއަށެވެ.

އަބްދުއްރަހީމް ވިދާޅުވީ މި ދާއިރާތަކަށް ވާދަނުކުރަން ޕީޕީއެމް/ޕީއެންސީން ނިންމާފައިވަނީ އެ ޕާޓީތަކާއެކުގައި މިވަގުތު މަސައްކަތް ކުރާތީ، ޕާޓީތަކުގެ ލީޑަރުންނަށް އިހުތިރާމް ކުރުމުގެ ގޮތުންކަމަށެވެ. ނަމަވެސް އެހެން ދާއިރާތަކަށް ޕީޕީއެމް ޕީއެންސީ ކޯލިޝަނުން ވާދަކުރާނީ ވަކިން ކަމަށާއި، އިންތިހާބުގައި އެއްވެސް ބަޔަކާއެކު ކޯލިޝަނެއް ހަދައިގެން މަސައްކަތް ކުރުމުގެ ވިސްނުމެއް ނެތްކަމަށެވެ.

"އެމްޑީއޭ އާއި އެމްއެންޕީ އާއި ޖޭޕީއާ، އެ ބޭފުޅުން ދާއިރާތަކަށް ވާދަކުރުމަކީ އެއީ އެބޭފުޅުންގެ އަމިއްލަފުޅު ކަމެއް. އެއީ އަޅުގަނޑުމެން ނިންމާ ކަމެއް ނޫން. އަޅުގަނޑުމެން މިދަންނަވަނީ އަޅުގަނޑުމެންގެ ދެ ޕާޓީން ވާދަނުކޮށް މި ދޫކޮށްލާ ތިން ދާއިރާއަކީ އަޅުގަނޑުމެންނާއެކު މަސައްކަތްކުރާ ތިން ޕާޓީގެ ތިން ލީޑަރުންގެ ތިން ދާއިރާއޭ. އެއްވެސް ބަޔަކާއެކީގައި ޕްރައިމަރީއެއް ނެތް އަޅުގަނޑުމެންގެ،" އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ޕީޕީއެމް/ޕީއެންސީ ޕްރައިމަރީއަށް ބޮޑު ތަރުހީބެއް ލިބިފައިވާ ކަމަށެވެ. އެގޮތުން ޕްރައިމަރީގައި ވާދަކުރުމަށް 296 ފަރާތުން ހުށަހަޅުއްވާފައިވާ ކަމަށާއި އޭގެ ތެރެއިން 13 ފަރާތަކަށް ޓިކެޓް ކަށަވަރުވެފައިވާކަމަށެވެ. އަދި މި މަހުގެ 27 ގައި ބާއްވާ ޕްރައިމަރީގައި 283 މިހާކު ވާދަކުރާނެކަމަށާއި އޭގެތެރޭގައި 32 އަންހެނުން ހިމެނޭ ކަމަށެވެ.

އަބްދުއްރަހީމް ވިދާޅުވީ ޕީޕީއެމް ޕީއެންސީގެ ޕްރައިމަރީ އިންތިޒާމްކުރުމުގައި އިސްކޮށް އުޅުއްވާނީ ޕީޕީއެމްގެ ނައިބު ރައީސް އަހުމަދު ޝިޔާމާއި ކޮންގްރެސް ޕާޓީގެ ނައިބު ރައީސް އިބްރާހިމް ސުޖާއުކަމަށެވެ. އަދި ޕްރައިމަރީގެ ކަންކަން ވީހާވެސް އަމާންކަމާއެކު ސުލްހަވެރިކަމާއެކު ކުރިއަށްގެންދިއުމަށް ކެންޑިޑޭޓުންނާއި އާންމު މެންބަރުންނަށް އަބްދުއްރަހީމް އިލްތިމާސްކުރެއްވިއެވެ.

އަބްދުއްރަހީމް ވިދާޅުވީ މަޖިލިސް އިންތިޚާބު ކޮންމެ ތާރީހެއްގައި ބޭއްވި ނަމަވެސް ސަރުކާރު ކޯލިޝަނަށް ފުރިހަމަ މެޖޯރިޓީ ލިބޭނެކަމުގެ ޔަގީންކަން އެބައޮތް ކަމަށެވެ.

ރައްޔިތުންގެ މަޖިލީހުގެ އިންތިހާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ މާޗުމަހުގެ 17 ވަނަ ދުވަހުއެވެ. ޕީޕީއެމް ޕީއެންސީގެ އިތުރުން އެހެން ސިޔާސީ ޕާޓީތަކުންވެސް ދަނީ އިންތިހާބަށް ތައްޔާރުވުމުގެ ގޮތުން ކުރަންޖެހޭ މަސައްކަތްތައް ކުރަމުންނެވެ.