މަޖިލިސް އިންތިޚާބު އޮންނަ އާދީއްތަ ދުވަސް ސަރުކާރު ބަންދުވާނެ

ރައްޔިތުންގެ މަޖިލިސް އިންތިޚާބު ބާއްވާ ދުވަހު ސަރުކާރު ބަންދުވާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ. އެ ކޮމިޝަނުގެ ނައިބު ރައީސް އިސްމާއިލް ހަބީބު މިފަދައިން ވިދާޅުވީ މަޖިލިސް އިންތިޚާބުގެ ޤައުމީ ލަފާދޭ ކޮމިޓީގެ ބައްދަލުވުމުގައި ވާހަކަފުޅުދައްކަވަމުންނެވެ.

މަޖިލިސް އިންތިޚާބު ބާއްވަން އިލެކްޝަސް ކޮމިޝަނުން ނިންމާފައިވާ މަޗު 17 ވަނަ ދުވަހަކީ އާދީއްތަ ދުވަހަކަށްވުމުން ޤައުމީ ލަފާ ދޭ ކޮމިޓީން ވަނީ ކަންބޮޑުވުން ފާޅުކުރައްވާފައެވެ. އެކަމާ ގުޅިގެން ހަބީބު ވިދާޅުވީ މަޖިލިސް އިންތިޚާބު ބާއްވާ ދުވަސް ބަންދު ދުވަހެއްގެ ގޮތުގައި ކަނޑައެޅުމަށް ސަރުކާރަށް މިހާރު ހުށަހަޅުއްވާފައިވާ ކަމަށާއި އެ ދުވަސް ބަންދުވާނެ ކަމަށެވެ.

2018 ވަނަ އަހަރުގެ ރިޔާސީ އިންތިޚާބު ވެސް ބާއްވާފައިވަނީ އާދީއްތަ ދުވަހެއްގައިކަން ފާހަގަކުރައްވައި ހަބީބު ވިދާޅުވީ އެއީ އެކޮމިޝަނުން އަލަށް ކުރައްވާ ކަމެއް ނޫން ކަމަށެވެ. އަދި ކޮންމެ ސަރުކާރެއް އޮތް ކަމުގައިވި ނަމަވެސް އިންތިޚާބު ބާއްވާ ދުވަސް ބަންދުކޮށްދޭން އެދުމުން އެކަން އެގޮތަށް ކޮށްދޭ ކަމަށް އޭނާ ވިދާޅުވިއެވެ.

މަޖިލިސް އިންތިޚާބު ބާއްވާ ތާރީހު ރަމަޟާން މަހާ ދިމާވާތީ އިންތިޚާބު ކުރިއަށްދާނެ ވަގުތާ ގުޅޭގޮތުން ވެސް ޤައުމީ ލަފާދޭ ކޮމިޓީގައި ވަނީ މަޝްވަރާ ކުރައްވާފައެވެ. އެގޮތުން ބައްދަލުވުމުގައި ބައިވެރިވި ހުރިހާ ސިޔާސީ ޕާޓީތަކުންނާއި ގިނަ މުއައްސަސާތަކުން ވެސް އެިލެކްޝަންސް ކޮމިޝަނަށް ލަފާ ދެއްވީ ވީހާވެސް ގިނަ ވަގުތު ވޯޓުލުމަށް ދިނުމުގެ ގޮތުންނާއި ރައްޔިތުންނަށް ފަސޭހަވާނެހެން ހެނދުނު 9:00 އިން ހަވީރު 5:00 އާ ހަމައަށް ވޯޓުލުމުގެ ވަގުތު ކަނޑައެޅުއްވުމަށެވެ.

މި ބައްދަލުވުމުގައި ސިޔާސީ ޕާޓީތަކާއި މުއައްސަސާތަކުން ވޯޓުލާ ވަގުތު ބަދަލުކުރުމަށް ލަފާ އެރުވީ ރަމަޟާން މަހު އާންމުންގެ ދިރިއުޅުމުގެ ކަންކަން ހުންނަ ގޮތަށް ރިޢާޔަތް ކުރުމަށްފަހުއެވެ. އެގޮތުން، ރޯދަ ވީއްލުމަށް އާންމުނަށް ގެއަށް ދެވޭނެ ވަގުތު ލިބޭނެގޮތަށް ވަގުތު ކަނޑައެޅުމަށް ލަފާ އެރުއްވިއެވެ.

ދިވެހި ފުލުހުންގެ ޚިދުމަތުން ވެސް ވަނީ ޓްރެފިކް މައްސަލަތައް ދިމާވުމަކީ އެކަށީގެންވާ ކަމަކަށްވާތީ ހަވީރު 5:00 ގައި ވޯޓުލުން ބަންދުކުރުމަށް ލަފާ ދެއްވާފައެވެ.

ސިޔާސީ ޕާޓީތަކާއި މުއައްސަސާތަކުން ވަނީ އީސީން ކަނޑައަޅާ ވަގުތަށް ބަދަލު ނުގެނައުމަށް ވެސް ލަފާ އަރުއްވާފައެވެ. އަދި ވަގުތަށް އެއްވެސް ބަދަލެއް ގެންނަ ނަމަ އެކަން އެ ކޮމިޓީއާ މަޝްވަރާ ކުރުމަށާއި ސަބަބު ސާފުކޮށް އެންގުމަށްވެސް ލަފާދެއްވިއެވެ. އީސީން ވެސް ވަނީ މިހާރު އެ ކޮމިޝަނުން ކަނޑައަޅާފައިވާ ތާރީޚުތަކާއި ވަގުތުތަކަށް ބަދަލު ނުގެންނާނެ ކަމަށް ވިދާޅުވެފައެވެ.

އިންތިޚާބުގެ ޤައުމީ ލަފާދޭ ކޮމިޓީގައި ބައިވެރި ފަރާތްތަކުން ވަނީ އޮންލައިންކޮށް ރީ ރަޖިސްޓްރޭޝަން ކުރުމާ ގުޅިގެން ކަންބޮޑުވުންތައް ފާޅުކުރައްވާފައެވެ. ނަމަވެސް އީސީން ވަނީ އެއީ ޓެސްޓް ކުރުމަށްފަހު ކުރިއަށްގެންދާ ކަމެއް ކަމަށާއި އޮންލައިންކޮށް ރީ ރަޖިސްޓްރޭޝަނަށް ހުޅުވާލި ނަމަވެސް އޮންލައިންކޮށް ރަޖިސްޓްރީ ކުރުމުގައި ދަތިތައް ދިމާވާ ފަރާތްތަކަށް އެހީވުމަށް ހުރިހާ ރަށެއްގައި ފޯކަލް ޕޮއިންޓުތައް ބަހައްޓާނެ ކަމުގެ ޔަގީންކަން ދެއްވާފައެވެ.

އަންނަ މާޗު މަހު ބާއްވާ މަޖިލިސް އިންތިޚާބުގައި ރީ ރަޖިސްޓްރީ ވުމުގެ ފުރުސަތު އިލެކްޝަންސް ކޮމިޝަނުން ހުޅުވާލާނީ 1 ފެބްރުއަރީގައެވެ. އެ ކޮމިޝަނުން މި މަހުގެ ކުރީކޮޅު ވޯޓުލުމުގެ ޙައްގު ލިބޭ މީހުންގެ ލިސްޓު އާންމުކޮށް އެ ލިސްޓަށް ޝަކުވާ ހުށަހެޅުމުގެ ފުރުސަތުވެސް ހުޅުވާލިއެވެ.

މިއަހަރުގެ މަޖިލިސް އިންތިޚާބުގައި 93 ދާއިރާއަކަށް މެންބަރުން އިންތިޚާބުކުރާނެއެވެ. އަދި މި އިންތިޚާބުގައި 284،327 މީހަކަށް ވޯޓުލުމުގެ ޙައްގު ލިބެއެވެ.