އެފްރިކާ ކަޕް އޮފް ނޭޝަންސް ފުޓްބޯޅަ މުބާރާތް ބާއްވާ ގައުމު އައިވަރީ ކޯސްޓާއި ގާނާއަށް ކެޓުމުގެ ބިރާ ކުރިމަތިވިއިރު، މިސްރާއި ނައިޖީރިއާއިން ދެވަނަ ބުރުގެ ޖާގަ ހޯދައިފިއެވެ.
އައިވަރީ ކޯސްޓް ކެޓީ ގުރޫޕްގެ ފަހު މެޗުގައި އީކުއިޓޯރިއަލް ގިނީ އަތުން 4-0 ލަނޑުން ބަލިވެގެންނެވެ. ފުރަތަމަ ހާފުގެ 42 ވަނަ މިނެޓުގައި އެމިލިޔޯ އެންސޫގެ ލަނޑުން ގިނީން ލީޑު ނެގިއިރު އެޓީމުން ލީޑުފުޅާކުރީ 73 ވަނަ މިނިޓުގައި ޕަބްލޯ ގެނެޓް، ގޯލާ 25 ޔާޑު ދުރުން ފޮނުވާލި ހިލޭ ޖެހުމަކުންނެވެ. ގިނީގެ ތިންވަނަ ލަނޑު އެންސޫ ޖެހިއިރު މެޗު ނިމެން ދެ މިނިޓަށް ވެފައިވަނިކޮށް ޔަނިކް ބައިލާ ވަނީ އައިވަރީ ކޯސްޓްއަށް ހަތަރުވަނަ ލަނޑު ކާމިޔާބުކޮއްފައެވެ.
މި ގުރޫޕުން ނައިޖީރިއާ ވަނީ ގިނީ ބިސާއޯ ބަލިކޮށް މުބާރާތުގެ ނޮކައުޓް ބުރުން ޖާގަ ހޯދާފައެވެ. މި ނަތީޖާއާއެކު އައިވަރީ ކޯސްޓްއަށް ތިންވަނަ ލިބުނީ ތިން ޕޮއިންޓާއެކު އެވެ. ނައިޖީރީއާ ދެވަނައިގައި އޮތީ ހަތް ޕޮއިންޓާއެކު އޮތް އިރު މި އަދަދަށް ޕޮއިންޓް ހޯދައިގެން ލަނޑުގެ ތަފާތުން އެއްވަނައިގަ އޮތީ އީކުއޭޓްރަލް ގިނީ އެވެ.
މުބާރާތުގައި ހަ ގުރޫޕުން ތިންވަނައިގައި އެންމެ ރަނގަޅު ނަތީޖާއެއް ހޯދާ ހަތަރު ޓީމަކަށް މުބާރާތުގެ ގަދަ 16 ބުރުން ޖާގަ ލިބިގެންދާނެ އެވެ. އެހެންކަމުން އައިވަރީ ކޯސްޓަށް އިތުރު އިންތިޒާރެއް ކުރަން ޖެހުނު އިރު ކޭޕްވާޑް އަތުން އެއްވަރުވެ މިސްރުވެސް ވަނީ މުބާރާތުގެ ގަދަ 16 ބުރިގެ ޖާގަ ޔަގީންކޮށްފައެވެ.
ފުރަތަމަ ހާފުގެ އިތުރު ވަގުތު ތެރޭގައި ބެންޗްމިލޯ ޓަވަރޭޒް ގޯލުން ކޭޕްވާޑުން ލީޑު ނެގިއިރު މެޗުގެ ދެވަނަ ހާފު ފެށިތާ މާގިނައިރެއް ނުވެ ދެވަނަ ހާފުގައި ކުޅެން ނުކުތް މިސްރުގެ މަހްމޫދް ޓްރެޒެގޭޓް ވަނީ ނަތީޖާ ހަމަހަމަކޮށްފަ އެވެ. އެހެން ނަމަވެސް މެޗުގެ އިތުރުވަގުތުގައި ފެނިގެންދިޔަ ލަނޑުތަކުގެ ޑްރާމާއާއެކު މެޗު އެއްވަރުވީ މުސްތަފާ މުހައްމަދު ލަނޑުން ލީޑު ނެގިއިރު އިތުރުވަގުތުގެ ފަހު މިނިޓުގައި ކޭޕްވާޑުން ނަތީޖާ ހަމަހަމަކުރީ ބްރެއަން ޓެކްސިއަރާގެ ލަނޑުންނެވެ. ގާނާ މުބާރާތުގައި ހާސްކޮށްލީ މޮޒަންބީކް އަތުން 2-2 ލަނޑުން އެއްވަރުވުމުންނެވެ.
މެޗުގެ ފުރަތަމަ ދެ ލަނޑު ގާނާއިން ކާމިޔާބުކުރީ ލިބުނު ޕެނަލްޓީއަކުން ޖޯޑަން އަޔޫ އެވެ. މޮޒަންބީކް ޖެހި ދެ ލަނޑުވެސް ޖެހީ އިތުރު ވަގުތުގެ ތެރޭގައި ގެނީ ކަޓަމޯ އާއި ރެއިނިލް މަންޑަވާއެވެ. މި ނަތިޖާ އެކު ގާނާ އަށް އިތުރު އިންތިޒާރެއް ކުރަން ޖެހުނު އިރު ގުރޫޕުގެ ތިންވަނައިގަ އޮތީ ދެ ޕޮއިންޓާއެކުއެވެ. މިސްރަށް ދެވަނަ ލިބުނީ ތިންޕޮއިންޓާ އެކުއެވެ. ކޭޕްވާޑް އެއްވަނައިގައި އޮތީ 7 ޕޮއިންޓާއެކުއެވެ.