އިތުރު އެލަވެންސާއެކު މަޖިލިސް އިންތިޚާބަށް އޮފިޝަލުން ހޯދަނީ

މާރިޗު މަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ވޯޓުލާ މަރުކަޒުތަކުގައި ހަރަކާތްތެރިވުމަށް 7000އެއްހާ އޮފިޝަލުން ބޭނުންވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަނުން ވަނީ މަޖިލިސް އިންތިޚާބަށް ބޭނުންވާ އޮފިޝަލުން ހޯދަން އިޢުލާންކޮށްފައެވެ. އެކޮމިޝަނުން ހުޅުވާލި މި ފުރުސަތުގައި އޮފިޝަލުންނަށް ވާން ބޭނުންވާ ފަރާތްތަކުން އެކަމަށް އެދެންޖެހޭނީ އެ ކޮމިޝަނުގެ ޕޯޓަލް މެދުވެރިކޮށެވެ. ޕޯޓަލްއަށް ލޮގިން ކުރެވޭނީ އީ-ފާސް މެދުވެރިކޮށް ކަމަށް އެކޮމިޝަނުން ވިދާޅުވެއެވެ.

އިލެކްޝަންސް ކޮމިޝަނުންގެ ރައީސް ފުއާދު ތައުފީޤު ވިދާޅުވީ، މަޖިލިސް އިންތިޚާބަށް 7000 އެއްހާ އޮފިޝަލުން ބޭނުންވާކަމަށެވެ. މި އިންތިޚާބުގައި އޮފިޝަލުންނަށް ވެވޭނީ 18 އަހަރާއި 65 އަހަރާ ދެމެދުގެ އެއްވެސް ސިޔާސީ ޕާޓީއެއްގެ އިސް މަޤާމެއް އަދާ ނުކުރާ ފަރާތްތަކަށެވެ.

އޮފިޝަލުންގެ ހުންނަން ޖެހޭ އިތުރު ޝަރުތުތައް:

• އެއްވެސް ކެންޑިޑޭޓެއްގެ ކެމްޕެއިން ޙަރަކާތްތަކުގައި ޢަމަލީ ގޮތުން ބައިވެރިވާ މީހަކު ކަމުގައި ނުވުން
• އޮފިޝަލަކަށްވުމަށް އެދި ފޯމު ހުށަހެޅި ދާއިރާ/ރަށަށް ކުރިމަތިލާ ކެންޑިޑޭޓެއްގެ މަންމައެއް، ބައްޕައެއް، ދަރިއެއް، އަންބެއް، ފިރިއެއް، އެއްބަނޑުއެއްބަފާ، އެއްބަނޑު ނުވަތަ އެއްބަފާ މީހަކަށް ނުވުން
• އޮފިޝަލެއްގެ މަސްޢޫލިއްޔަތު އަދާކުރެވޭނެ ތަޢުލީމާއި ތަޖުރިބާ ހުރުން
• ޞިއްޙީ ގޮތުން ޤާބިލު މީހަކު ކަމުގައިވުން
• ޖިނާއީ ކުށެއްގެ ޙުކުމް ތަންފީޒުކުރަމުންދާ މީހަކު ކަމުގައި ނުވުން
• ސްކޫލް ދަރިވަރަކަށް ނުވުން

ރައްޔިތުންގެ މަޖިލިސް އިންތިޚާބު މިއަހަރުގެ ރަމަޟާން މަހާ ދިމާވާތީ އޮފިޝަލުންނަށް އުޖޫރައިގެ އިތުރުން ރަމަޟާން މަހުގެ އެލަވެންސެއް ދިނުމަށް އިލެކްޝަންސް ކޮމިޝަނުން ވަނީ ނިންމަވާފައެވެ. އެގޮތުން އުޖޫރައިގެ އިތުރުން ރަމަޟާން އެލަވެންސްގެ ގޮތުގައި 500 ރުފިޔާ ލިބޭނެ ކަމަށް އީސީން ވިދާޅުވިއެވެ.

މީގެ އިތުރުން ކެއުމާއި ސައި، އިލެކްޝަންސް ކޮމިޝަނުން ހަމަޖައްސައި ނުދޭނަމަ ކޮންމެ އޮފިޝަލަކަށް ރޯދަވީއްލުމުގެ ގޮތުގައި 250 ރުފިޔާއާއި ތަރާވީހުގެ ގޮތުގައި 100 ރުފިޔާ ދިނުމަށްވެސް އެ ކޮމިޝަނުން ވަނީ ނިންމަވާފައެވެ.

މަޖިލިސް އިންތިޚާބުގައި އޮފިޝަލުންގެ އުޖޫރަ

• ވޯޓުލާ މަރުކަޒުގެ ވެރިޔާ: 2،650 ރުފިޔާ
• މަރުކަޒުގެ ވެރިޔާގެ އެހީތެރިޔާ: 2،350 ރުފިޔާ
• އޮފިޝަލް: 2،250 ރުފިޔާ
• ރިޒާވް އޮފިޝަލް: 1000 ރުފިޔާ

އާންމު އިންތިޚާބުތަކުގައި އޮފިޝަލުން ހޯދުމުގައި ދަތިތައް ހުންނަކަން ފާހަގަކޮށް މަޖިލިސް އިންތިޚާބުގައި އޮފިޝަލުންގެ އުޖޫރަ ބޮޑުކޮށްފައިވާކަމަށް އީސީން ވަނީ ވިދާޅުވެފައެވެ. އެގޮތުން، އެކަމަށް ބޭނުންވާ އިތުރު ބަޖެޓު މިހާރު ހަމަޖެހިފައިވާކަމަށް ވެސް އެ ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި ވަނީ ވިދާޅުވެފައެވެ.

މި އިންތިޚާބުގައި އޮފިޝަލުންނަށްވުމަށް އެދި ހުށަހެޅުމުގެ ފުރުސަތު ހުޅުވާލާފައިވަނީ މާޗު 5 ވާ އަންގާރަ ދުވަހުގެ މެންދުރު 15:00 އާ ހަމައަށެވެ. އަންނަ މަހުގެ 24 ވަނަ ދުވަހުން ފެށިގެން އޮފިޝަލުން ތަމްރީން ކުރުމުގެ ޕްރޮގްރާމްތައް އީސީން ފަށްޓަވާނެއެވެ.

މިއަހަރުގެ މަޖިލިސް އިންތިޚާބު 17 މާރިޗުގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމަވާފައެވެ. އެ ތާރީޚު ކަނޑައެޅީ އިންތިޚާބު، ރަމަޟާން މަހާ ދިމާވާތީއާއި ރަމަޟާން މަހުގެ ފަހުގެ ތާރީޚެއްގައި ބާއްވާނަމަ އިދާރީ ހުރަސްތަކެއް ހުރުމުން ކަމަށް އިލެކްޝަންސް ކޮމިޝަނުން ވިދާޅުވެއެވެ.