ވަޠަނީ ޚިދުމަތުގެ ތަމްރީން ނިންމި 400 އެއްހާ ޒުވާނުންނަށް ވަޒީފާ ހަމަޖެހިއްޖެ

ސަރުކާރުން ފަށާފައިވާ ދިވެހި ވަޠަނީ ޚިދުމަތުގެ ޕްރޮގްރާމުގެ ދަށުން މިހާތަނަށް ޓްރެއިނިން ނިންމާފައިވާ ޒުވާނުންގެ ތެރެއިން 400 އެއްހާ ޒުވާނުންނަށް ވަޒީފާގެ ފުރުސަތުތައް ހަމަޖެހިފައިވާކަމަށް ދިފާޢީ އަދި ވަޠަނީ ޚިދުމަތާ ބެހޭ ވުޒާރާއިން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އިސްނެންގެވުމަށް ކުރިއަށްގެންދާ ދިވެހި ވަޠަނީ ޚިދުމަތުގެ ޕްރޮގްރާމް އިފްތިތާޙްކުރީ މިދިޔަ އަހަރުގެ އޮކްޓޫބަރުމަހުގެ 1 ވަނަ ދުވަހުއެވެ.

މި ޕްރޮގްރާމުގެ ކާމިޔާބީއާ ގުޅޭގޮތުން ޓީވީއެމްގެ ހެނދުނު ހެނދުނާ ޕްރޮގްރާމުގައި ވާހަކަދައްކަވަމުން ދިފާޢީ އަދި ވަޠަނީ ޚިދުމަތާ ބެހޭ ވަޒީރުގެ ނައިބު ފާތިމަތު މިޒުނާ ވިދާޅުވީ، ދިވެހި ވަޠަނީ ޚިދުމަތުގެ ޕްރޮގްރާމުގެ މަޤުޞަދަކީ ޤައުމާއި ދީންދެކެ ލޯބިވާ އަދި އަމިއްލަ ނަފްސަށް އިތުބާރުކޮށް އަނެކުންނަށް އިހުތިރާމްކުރާ ޖީލެއް ބިނާކުރުންކަމަށެވެ. އަދި މިއީ ދިރިއުޅުމުގެ ހުނަރުތަކާއި އިސްލާމީ ރިވެތި އަޙްލާޤު އަށަގަންނުވާ، ނަފްސާނީގޮތުންނާއި ޖިސްމާނީގޮތުންވެސް ޒުވާނުން ބާރުވެރިކޮށްދޭ މުހިންމު ޕްރޮގްރާމެއްކަން މިޒުނާ ފާހަގަކުރެއްވިއެވެ.

"ޤައުމާ ހަވާލުވާންތިބި ޒުވާނުންނަށް ދީނީ ކަންކަމަށް އަހުލުވެރިކުރުވުމަށް ވަރަށް ބޮޑު އިސްކަމެއް ދެވޭ. ޤައުމީ ކަންކަމުގައިވެސް ހޭލުންތެރިކަން އިތުރުކޮށް، މިއީ މިހާ ފުޅާކޮށް ޒުވާނުން ބިނާކުރުމަށް ކުރިއަށްގެންދެވޭ ފުރަތަމަ ޕްރޮގްރާމް." މިޒުނާ ވިދާޅުވިއެވެ.

މިޒުނާ ވިދާޅުވީ، ވަޠަނީ ޚިދުމަތުގެ ޕްރޮގްރާމް ފުރިހަމަ ކުރި ބައިވެރިންގެ ތެރެއިިން 543 ކުއްޖަކު ވަޒީފާއަށް އެދިފައިވާއިރު، 400 އެއްހާ ކުދިންނަށް މިހާރު ވަޒީފާ ހަމަޖެހިފައިވާކަމަށެވެ. އަދި އިތުރު ކުދިންނަށްވެސް ވަޒީފާ ހޯދުމުގެ މަސައްކަތް ކުރަމުންދާކަން ފާހަގަކުރައްވާ މިޒުނާ ވިދާޅުވީ، އެކުދިންނަށް ކެރިއަރ ގައިޑެންސްގެ ފުރުޞަތުތައް ފަހިކޮށްދީ، ކުދިން ބޭނުންވާ ދާއިރާތަކުން އެކަށީގެންވާ ވަޒީފާތައް ދިނުމަށް ވަރަށް ބޮޑަށް ބަލާކަމަށެވެ.

"ގުޅިގެން މަސައްކަތް ކުރަން އެނގޭ، ދީނީ ވާޖިބުތައް އަސާކުރަން އިސްކަންދޭ، ނަފްސާނީގޮތުން ދުޅަހެޔޮ، ކަންކަމުގައި އިސްނަގައި އަމިއްލަ ކަންކަން މެނޭޖްކޮށްގެން އުޅެވޭނެފަދަ ކުދިންނަށް އެބަހަދާލެވޭ. ވަޒީފާގެ މާހައުލަށް ނުކުންނަށް ބޭނުންވާ ފަންނީ ހުނަރުތައް ދަސްކޮށްދެވޭ." މިޒުނާ ވިދާޅުވިއެވެ.

ދިވެހި ވަޠަނީ ޚިދުމަތުގެ ޕްރޮގްރާމް މިހާރަށްވުރެ ފުޅާކުރުމަށް ސަރުކާރުން ދަނީ މަސައްކަތް ކުރަމުންނެވެ.

މި ތަމްރީން ނިންމާފައި 18 އަހަރު ނުފުރޭ ކުދިންނަށް، ފުރުޞަތުތައް ހޯދައިދިނުމަށް އިންޓާންޝިޕް ޕްރޮގްރާމެއް ފެށުމަށް ހަމަޖެހިފައިވާކަމަށް ދިފާޢީ އަދި ވަޠަނީ ޚިދުމަތާ ބެހޭ ވުޒާރާއިން ވަނީ ވިދާޅުވެފައެވެ. އަދި ޤައުމީ ދިފާޢީ ބާރުގެ އިންފްރާސްޓްރަކްޗަރތަކާއި ފެސިލިޓީތަކުގެ ފެންވަރު މަތިކުރުމަށް ގިރިފުށި އިތުރަށް ތަރައްޤީކުރަމުންދާއިރު، އެތަނުގައި ނެޝެނަލް ސަރވިސް ސެންޓަރެއް ޤާއިމުކުރުމަށް ނިންމާފައިވާކަމަށްވެސް އެ ވުޒާރާއިން ވިދާޅުވިއެވެ.