ބައިނަލްއަޤްވާމީ ރޮބޮޓިކްސް މުބާރާތެއްގައި ވާދަކުރުމަށް ރާއްޖެއިން ތައްޔާރުވެއްޖެ

ބައިނަލްއަޤްވާމީ ރޮބޮޓިކްސް މުބާރާތެއްގައި ވާދަކުރުމަށް ރާއްޖެއިން ތައްޔާރުވެއްޖެއެވެ. 190 އަށް ވުރެ ގިނަ ޤައުމުގެ ކުދިން ބައިވެރިވާ "2026 ފަރސްޓް ގްލޯބަލް ޗެލެންޖު" ގައި ދިވެހިރާއްޖެ ތަމްސީލުކުރަނީ "ޓީމް މޯލްޑިވްސް" އިންނެވެ. މި އިވެންޓް ކުރިއަށްދާނީ މިއަހަރުގެ އޮކްޓޫބަރު 7 އިން 10 އަށް، ދެކުނު ކޮރެއާގެ އިންޗިއޮންގައެވެ.

އޮލިމްޕިކްސްގެ އުސޫލުން ބާއްވާ މި މުބާރާތުގައި، އެއް މިންގަނޑެއްގެ ސްޓޭންޑަޑް ކިޓެއް ބޭނުންކޮށްގެން ރޮބޮޓެއް ޑިޒައިންކޮށް ޕްރޮގްރާމްކުރުމަށްފަހު، އެކި ޤައުމުތަކުގެ ޓީމުތައް ގުޅިގެން ތަފާތު ޓާސްކުތައް ފުރިހަމަކޮށް ޕޮއިންޓް ހޯދާނެއެވެ. މިއަހަރުގެ މުބާރާތުގެ ޝިއާރަކީ "އިގްނައިޓިންގ އިނޮވޭޝަން" އެވެ. މި ޝިއާރުގެ ދަށުން ވާދަކުރާ މެންބަރުން މަސައްކަތްކުރާނީ ރޮބޮޓިކްސް އާއި އިންޖިނިއަރިންގ ބޭނުންކޮށްގެން، ޖަންގަލިތަކުގައި އަލިފާން ރޯވުން ހުއްޓުވުމާއި، ލިބޭ ގެއްލުންތައް ކުޑަކުރުމަށް އީޖާދީ ޙައްލުތަކެއް ހޯދުމަށެވެ.

މިއަހަރުގެ ޤައުމީ ޓީމުގައި ޖުމްލަ 10 މެންބަރުން ހިމެނެއެވެ. އެއީ މުބާރާތަށް ދަތުރުކުރާ 5 މެންބަރުންނާއި، ރާއްޖޭގައި ތިބެގެން އޮންލައިންކޮށް އެހީތެރިކަން ފޯރުކޮށްދޭ ހޯމް ޓީމުގެ 5 މެންބަރުން ހިމެނެއެވެ.

ދަތުރުކުރާ ޓީމު:
* ޔޫނުސް މުޙައްމަދު އަޙްމަދު (ލީޑް ޑިވެލޮޕަރ)
* ޢާއިޝަތު އީޝަލް އިސްމާޢީލް (ބިލްޑަރ)
* ޒައިދާން މުޙައްމަދު ޒަމީރު (ޑްރައިވަރ)
* ޢާއިޝާ ބިންތި ޠަލްޙަތު އަޙްމަދު (ޑިޒައިން އެންޑް ޕްލޭނިންގ)
* މާހިލް މުޙައްމަދު ސިނާން ޢަލީ (ޑިޒައިން އެންޑް ޕްލޭނިންގ)

ހޯމް ޓީމު:
* ޙައްވާ ޔުޒްކާ ޔޫސުފް
* ނޫރީން އަޝްޢާ މުޙައްމަދު
* ޔޫސުފް ޔުޢާން އަޙްމަދު
* ޢައްމާރު ބިން ޒުބައިރު
* އާމިނަތު ޝަޔާން ޞާލިޙް

މި މުބާރާތަށް ޓީމު ތައްޔާރުކުރުމަށްޓަކައި ސްޓެމް ސެޓިފައިޑް މަރުކަޒެއް ކަމަށްވާ "ފޯލޫޕް ކޯޑިންގ އެކެޑަމީ" އިން ދަނީ ޚާއްޞަ ޓެކްނިކަލް ތަމްރީނުތަކެއް ދެމުންނެވެ. ފޯލޫޕް ކޯޑިންގ އެކަޑަމީގެ ސީއީއޯ ރިޔާޟް އަދި ވިމެން އިން ޓެކް މޯލްޑިވްސްގެ ނައިބު ރައީސާ މިހްނާ ޒާހިރު ވަނީ މިފަދަ ފުރުޞަތުތަކުގެ ސަބަބުން ދިވެހި ޒުވާނުންނަށް ކޯޑިންގ އާއި ރޮބޮޓިކްސްގެ ދާއިރާއިން އަމަލީ ހުނަރުތައް ތަރައްޤީކޮށް، ދުނިޔޭގެ ފެންވަރުގައި ވާދަކުރުމުގެ އިތުބާރު ލިބިގެންދާނެކަން ފާހަގަކުރައްވާފައެވެ.

މިއަހަރު ޓީމް މޯލްޑިވްސްގެ ލީޑް ޕާޓްނަރަކީ އެމްޑަބްލިއުއެސްސީއެވެ. މީގެ އިތުރުން އިނޭބްލިންގ ޕާޓްނަރުންގެ ގޮތުގައި ވިޒިޓް މޯލްޑިވްސް، އައިލެންޑް އާޓް، އަދި އެލައިޑް އިންޝުއަރަންސް ކޮމްޕެނީ ހިމެނެއެވެ.

ފަރސްޓް ގްލޯބަލްގެ ރާއްޖޭގެ ޕާޓްނަރު ކަމަށްވާ ވިމެން އިން ޓެކް މޯލްޑިވްސްގެ އިސްނެގުމުގެ ދަށުން 2023 ވަނަ އަހަރުން ފެށިގެން ރާއްޖޭގެ ޓީމު މި މުބާރާތުގައި ބައިވެރިވަމުން އަންނައިރު، ފާއިތުވި އަހަރު ޕެނަމާގައި ބޭއްވުނު މުބާރާތުގައި ޓީމް މޯލްޑިވްސް ވަނީ ދުނިޔޭގެ ގަދަ 50 ގެ ތެރޭގައި ހިމެނިފައެވެ.