ފުލަމް އަތުން ޗެލްސީއަށް ހަނި މޮޅެއް

އިނގިރޭސި ޕްރިމިއާ ލީގުގައި މިރޭ ފުލަމްއާ ދެކޮޅަށް ކުޅުނު މެޗުން ހަނި ގޮތަކަށް ޗެލްސީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 1-0 ގެ ނަތީޖާއަކުންނެވެ.

މި މެޗުގެ ފުރަތަަމަ ހާފުގައިި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ހާފުގައި ދެ ޓީމުންވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން އޭރިއާ ތެެރެއިން ފުލަމުގެ ހެރީ ވިލްސަން ފޮނުވާލި ހަމަލާއެއް، ޗެލްސީގެ ގޯލްކީޕަރު ޖޯޖީ ޕެޓްރޮވިޗް ވަނީ ހުޝިޔާރުކަމާއެކު ދިފާއުކޮށްފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ޗެލްސީން ކާމިޔާބުކޮށްފައިވަނީ ފުރަތަމަ ހާފުގެ އިތުރު ވަގުތުގެ ތެރޭގައެވެ. ލިބުނު ޕެނަލްޓީއަކުން މި ލަނޑު ކާމިޔާބުކޮށްދިނީ ޒުވާން މިޑްފީލްޑަރު ކޯލް ޕާމާއެވެ. މިއީ މި ސީޒަނުގައި މެންޗެސްޓާ ސިޓީ ދޫކޮށް ޗެލްސީއާ ގުޅުނު ފަހުން ޕާމާ، އެ ޓީމަށް ކުޅެދިން 17 މެޗުގައި ކާމިޔާބުކުރި ނުވަވަނަ ލަނޑެވެ. މި ޕެނަލްޓީއަކީ އޭރިއާ ތެރެއިން ޗެލްސީގެ ރަހީމް ސްޓާލިންއަށް ފުލަމްގެ ޑިފެންޑަރު އީސާ ޑިއޮޕް ކުރި ފައުލަކާ ގުޅިގެން ރެފުރީ ދިން ޕެނަލްޓީއެކެވެ.

މި މެޗުގެ ދެވަަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގެ ކުރީކޮޅު އޭރިއާ ތެެރެއިން ލިބުނު ހުސް ފުރުސަތެއްގައި ޗެލްސީގެ ފޯވާޑް ސްޓާލިން ފޮނުވާލި ބާރު ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އޭގެ ފަހުން މި ހާފުގައި ފުލަމްގެ ފޯވާޑް ރައުލް ހިމެނޭޒް އާއި ޗެލްސީގެ މިޑްފީލްޑަރު ކޯނޯ ގަލެގާއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. މީގެ ތެރެއިން ގެލެގާ ފޮނުވާލި ހަމަލާވެސް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ.

މި މޮޅާއެކު ޗެލްސީ އޮތީ ތާވަލުގެ އަށްވަނައިގައި ކުޅުނު 21 މެޗުން ލިބުނު 31 ޕޮއިންޓާއެކުއެވެ. އަދި މެޗުން ބަލިވި ފުލަމް އޮތީ ކުޅުނު 21 މެޗުން ލިބުނު 24 ޕޮއިންޓާއެކު ތާވަލުގެ 13 ވަނައިގައެވެ.