ރާއްޖޭގައި ކުރިއަށްދާ މޫދު ކުޅިވަރުގެ އެންމެ ބޮޑު މުބާރާތް ކަމަށްވާ ދިވެހި ސާފް ލީގު އަތޮޅު ތެރެއަށް ގެންދަން ކުރެވުނީ ވަރަށް ޗެލެންޖިން މަސައްކަތެއް ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ) ގެ ރައީސް މުޙައްމަދު ސޮބާހު (ޗޭ) ވިދާޅުވެއްޖެއެވެ.
ސާފިން އެސޯސިއޭޝަނުން އަންނަނީ ދިވެހި ސާފް ލީގުގެ ނަމުގައި ރާއްޖޭގެ އެކި ހިސާބުތަކުގައި މުބާރާތްތައް ބާއްވައިގެން ލީގެއް ކުރިއަށްގެންދަމުންނެވެ. ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން ސޮބާހު ވިދާޅުވީ ސާފިން ލީގެއް އުފައްދަން ހިޔާލާއި ވިސްނުން ގެންގުޅުނުއިރު މުޅި ކުޅިވަރު ބޭސްވެފައި އޮތީ މާލެއަށް ކަމަށާއި، އަތޮޅު ތެރެއަށް އެ ކުޅިވަރު ފުޅާކުރަން ކުރި މަސައްކަތަކީ އުނދަގޫތަކެއް ދިމާވި ކަމެއް ކަމަށެވެ.
ސޮބާހު ވިދާޅުވީ ރަށްރަށުން ފާހަގަވެގެންދިޔަ ހުނަރުތަކާއެކު މުބާރާތް މުޅި ރާއްޖެއަށް ފުޅާކުރުމަށް ކުރެވިގެންދިޔައީ ބުރަ މަސައްކަތެއް ކަމަށެވެ. އެގޮތުން ރަށްރަށުގައި މީހުން ދިރިއުޅޭ ސަރަހައްދާ ދުރުގައި މުބާރާތް ބާއްވަން ކުރެވުނު މަސައްކަތް ސޮބާހު ވަނީ ފާހަގަކުރައްވާފައެވެ.
"އަޅުގަނޑުމެން ހުންނާނެ މުބާރާތް ބާއްވާފައި މީހުން ދިރިއުޅޭ ސަރަހައްދުން 30 ނުވަތަ 25 މިނެޓު ހިނގާފައި ގޮސް، ވަލުތެރެއިން ރަށުގެ ފުއްޓަރު ފަރާތުގައި މުބާރާތް ބާއްވާފައި.މުޙައްމަދު ސޮބާހު - އެމްއެސްއޭގެ ރައީސް
ސޮބާހު ވިދާޅުވީ އެފަދަ ތަންތަނުގައި މުބާރާތް ބޭއްވަން ބެލިއިރު އެ ތަންތަނުގައި ޒަރޫރީ ބޭނުންތައް ފުއްދެންވެސް ނެތް ކަމަށާއި، އެހެންކަމުން އެތަންތަނުގައި ފުރަތަމަ ގާއިމުކުރަން ޖެހުނީ އެފަދަ ސެޓަޕެއް ކަމަށެވެ. އަދި މުބާރާތްތައް ބޭއްވުމަށް ސަރަހައްދުތައް ކަނޑައެޅުމުގައި އެންމެ ބޮޑަށް ބަލަނީ ގިނަ އެތުލީޓުންނަށް ބައިވެރިވެވޭ ގޮތަކަށް ކަމަށާއި، އެ ސަރަހައްދެއްގައި ރާޅާއަޅާ ކޮމިއުނީޓީއަށް ބެލުމަށްފަހު މުބާރަތް ބާއްވާ ސަރައްހަދު ކަނޑައަޅާފައިވާނެ ކަމަށްވެސް ވިދާޅުވިއެވެ.
ސޮބާހު ވިދާޅުވީ އެގޮތަށް މުބާރާތް ބާއްވާއިރު ރާޅު ލިބޭ ސަރަހައްދުތަކަށްވެސް ވިސްނަންޖެހޭ ކަމަށެވެ. އަދި ރަށްރަށުގެ ކައުންސިލްތަކާއި، ޒުވާނުންނާއި، ޖަމުއިއްޔާތަކުން ވަރަށް ބޮޑު އެއްބާރުލުމެއް ލިބޭ ކަމަށާއި، މިހާރު ރާއްޖޭގެ އެކި ކަންކޮޅުތަކުން މުބާރާތް ބާއްވަން އެސޯސިއޭޝަނަށް ހުށެހެޅުން އަންނަ ކަމަށްވެސް ވިދާޅުވިއެވެ.
ސާފިން އެސޯސިއޭޝަނުން ކާމިޔާބުކަމާއެކު ރާއްޖޭގެ އެކި ހިސާބުތަކުގައި ދިވެހި ސާފް ލީގު ބާއްވަމުން އަންނައިރު، މި އަހަރުވެސް މާލޭގެ އިތުރުން ރާއްޖެތެރޭގެ ތިން ރަށެއްގައި މުބާރާތް ބޭއްވުމަށް ވަނީ ތާވަލުކޮށްފައެވެ. އެއީ ގދ. ގައްދޫ އާއި، ކ. ހިންމަފުށި އަދި މ. މުއްޔެވެ.