ރާއްޖޭގައި ފެންވަރު ރަނގަޅު ލީގެއް އޮތުމަކީ ރާޅާއެޅުންތެރިންނާއި، ކަމާ ގުޅުންހުރި ހުރިހާ އެންމެވެސް ދެކެމުން އައި ހުވަފެނެއް ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ) ގެ ރައީސް މުޙައްމަދު ސޮބާހު (ޗޭ) ވިދާޅުވެއްޖެއެވެ.
ސާފިންއަކީ މި ފަހުން ބޮޑު ކުރިއެރުމެއް ހޯދަމުން އަންނަ ކުޅިވަރުތަކުގެ ތެރޭގައި ހިމެނޭ ކުޅިވަރެކެވެ. އެގޮތުން އެ އެސޯސިއޭޝަނުން އަންނަނީ ދިވެހި ސާފް ލީގުގެ ނަމުގައި ރާއްޖޭގެ އެކި ހިސާބުތަކުގައި މުބާރާތްތައް ބާއްވައިގެން ލީގެއް ކުރިއަށްގެންދަމުންނެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން ސޮބާހު ވިދާޅުވީ ވޭތުވެދިޔަ ދެ އަހަރު ދުވަހުގެ ތެރޭގައި ކުރެވުނު މަސައްކަތާއެކު ރާއްޖޭގެ ސާފިންއަށް ބޮޑު ބަދަލެއް ގެނެވިފައިވާ ކަމަށެވެ. އެ ބަދަލު ގެނައުމަށް ރާއްޖޭގެ ސާފިން ކޮމިއުނިޓީ އާއީ، އެސޯއިސއޭޝަނުގެ ހިންގާ ކޮމިޓީގެ އިތުރުން އޮތަޅުކުގެ ކައުންސިލާއި، ސަރުކާރުން ވަރަށް ބޮޑު އެއްބާރުލުމެއް ލިބގެންދިޔަ ކަމަށްވެސް ވިދާޅުވިއެވެ.
ސޮބާހު ވިދާޅުވީ ރާއްޖޭގެ ރާޅާއެޅުންތެރިންގެ މެދުގައި ވޯލްޑް ސާފިން ލީގަކީ ވަރަށް މަގުބޫލު މުބާރާތެއް ކަމަށާއި، ރާއްޖޭގައި އެ ފެންވަރުގެ ލީގެއް ތާއާރަފުކުރުމަކީ މުޅި ކޮމިއުނިޓީ އާއި ރާޅާއެޅުމަށް ޝައުގުވެރިކަން ހުންނަ ފަރާތްތަކުން ދެކެމުން އައި ބޮޑު ހުވަފެނެއް ކަމަށެވެ.
"އަޅުގަނޑުމެން ދަތުރުކުރި ރަށްތަކުގެ ކައުންސިލުތަކުން ދިން އެއްބާރުލުން، ހަމަ އެއާކު ކިނޮޅަސް، މުލި، ގައްދޫ، ހިންމަފުށި. މި ރަށްތަކުގެ ރައްޔިތުން ގުޅިގެން ކުރި މަސައްކަތް. މިއީ އަސްލު ލީގުގެ ހަގީގީ ކާމިޔާބުވެރިންނަކީ.މުޙައްމަދު ސޮބާހު - އެމްއެސްއޭގެ ރައީސް
ސޮބާހު ވިދާޅުވި ރާއްޖޭގައި އޮތް ދިވެހި ސާފް ލީގަކީ ވަރަށް ގިނަ ބައެއްގެ މަސައްކަތުން ތައާރަފުކުރެވުނު ލީގެއް ކަމަށެވެ. އަދި ނަތީޖާއަށް ބަލާއިރު ކޮވިޑަށް ފަހުގައި އެހާ ފުރިހަމަ ލީގެއް ބޭއްވިގެންދިޔުމުގެ އަސްލަކީ އެއީ ކަމަށްވެސް ވިދާޅުވިއެވެ.
ރާއްޖޭގެ އެކި ހިސާބުތަކުގައި މުބާރާތްތައް ބާއްވައިގެން ސާފިން ލީގެއް ބާއްވަމުން އަންނައިރު، އެމްއެސްއޭއިން ވަނީ އޭޝިއަން ސާފިން ޗެމްޕިއަންޝިޕް ފުރަތަމަ ފަހަރަށް ރާއްޖޭގައި މިދިޔަ އަހަރު ބާއްވާފައެވެ.