ސްޕެނިޝް ލީގުގައި ރޭ ރަށުން ބޭރުގައި ފަހު ވަގުތު ލަސް ޕަލްމާސް ބަލިކޮށް، ތާވަލުގެ ތިންވަނައަށް އެންމެ ފަހުގެ ޗެމްޕިއަން ބާސެލޯނާ ޖެހިލައިފިއެވެ.
ރަށުން ބޭރުގައި ކުޅުނު މެޗުން ބާސެލޯނާ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ލަސް ޕަލްމާސްއިން ވަނީ ލީޑު ނަގާފައެވެ. މެޗު ފަށައިގެން 12 ވަނަ މިނެޓުގައި ސަންޑްރޯ ރަމީރޭޒް ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ ބާސެލޯނާގެ ކުރީގެ ފޯވާޑް މޮރޮކޯގެ މުނީރް އަލް ހައްދާދީއެވެ.
މި މެޗުގެ ދެވަނަ ހާފުގައި ބާސެލޯނާއިން ކުޅުން ރަނގަޅުކޮށް ގިނަ ހަމަލާތަކެއް އުފެއްދިއިރު، މި ހާފު ފަށައިގެން 10 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. ސާޖިީ ރޮބާޓޯ ތަނަވަސްކޮށްދިން ފުރުސަތަކުން މި ލަނޑު ޖަހައިދިނީ ސްޕެއިނުގެ ފޯވާޑް ފެރާން ޓޮރޭސްއެވެ.
އަދި މި މެޗުން ބާސެލޯނާ މޮޅުވި ލަނޑު މެޗުގެ އިތުރު ވަގުތުގެ ތެރޭގައި ލިބުނު ޕެނަލްޓީއަކުން ކާމިޔާބުކޮށްދިނީ ޖަރުމަނުގެ މިޑްފީލްޑަރު އިލްކާއީ ގުންޑޮގާންއެވެ. މިއީ އޭރިއާ ތެރެއިން ގުންޑޮގާންއަށް ލަސް ޕަލްމާސްގެ ޑިފެންޑަރު ޑޭލީ ސިންކްގްރޭވަން ކުރި ފައުލަކާ ގުޅިގެން ދިން ޕެނަލްޓީއެކެވެ. އަދި މި ފައުލާ ގުޅިގެން ރެފުރީ ވަނީ ސިންކްގްރޭވަންއަށް ސީދާ ރަތް ކާޑެއް ދައްކާފައެވެ.
މި ނަތީޖާއާއެކު ބާސެލޯނާ ވަނީ ތާވަލުގެ ތިންވަނައަށް ޖެހިލާފައެވެ. ލީގުގެ އެއްވަނައިގައި އޮތް ރެއާލް މެޑްރިޑާއި ދެވަނައިގައި އޮތް ޖިރޯނާ އަށް ކުޅުނު 19 މެޗުން 48 ޕޮއިންޓް ލިބިފައިވާއިރު، ތިންވަނައިގައި އޮތް ބާސެލޯނާއަށް 19 މެޗުން ވަނީ 41 ޕޮއިންޓް ލިބިފައެވެ. އަދި ރޭގެ މެޗުން ބަލިވި ލަސް ޕަލްމާސް އޮތީ ތާވަލުގެ 10 ވަނައިގައި 19 މެޗުން ލިބުނު 25 ޕޮއިންޓާއެކުއެވެ.