ޑިމޮކްރެޓްސްގެ ޓިކެޓުގައި މަޖިލީހަށް ވާދަކުރުމަށް ހުޅުވާލައިފި

މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ދަ ޑިމޮކްރެޓްސްގެ ޓިކެޓުގައި ވާދަކުރަން ބޭނުންވާ ފަރާތްތަކަށް ޕްރައިމަރީއަށް ކުރިމަތިލުމުގެ ފުރުޞަތު އެ ޕާޓީން ހުޅުވާލައިފިއެވެ.

ޑިމޮކްރެޓްސް އިން އެ ޕާޓީގެ މަޖިލިސް ޕްރައިމަރީ ބާއްވަން ނިންމާފައިވަނީ 17 ފެބްރުއަރީގައެވެ. އެ ޕްރައިމަރީގައި ވާދަކުރަން ބޭނުންވާ ފަރާތްތަކަށް 4 ފެބްރުއަރީ 2024 ވާ އާދީއްތަ ދުވަހުގެ ހަވީރު 4:00 އާ ހަމައަށް ފުރުޞަތު ވަނީ ހުޅުވާލާފައެވެ.

އެ ޕާޓީން ނެރުނު ބަޔާނެއްގައި ބުނީ ޕްރައިމަރީގައި ވާދަކުރެވޭނީ 4 ފެބްރުއަރީ 2024 ވާ އާދީއްތަ ދުވަހުގެ ހަވީރު 4:00 އާ ހަމައަށް ޕާޓީގެ ދަފްތަރުގައި ޖެހިފައިވާ މެންބަރުންނަށް ކަމަށެވެ. ޕްރައިމަރީގައި ވޯޓު ދެވޭނީވެސް އެ މުއްދަތުގައި ދަފްތަރުގައި ޖެހިފައިވާ މެންބަރުންނަށް ކަމަށްވެސް ވަނީ ބުނެފައެވެ.

ޕްރައިމްރީއަށް ކުރިމަތިލާ މެންބަރުންނަކީ ޤާނޫނުއަސާސީއާއި މަޖިލީހުގެ އިންތިޚާބުގެ ޤާނޫނުގައި ބަޔާންކޮށްފައިވާ ޝަރުތުތައް ފުރިހަމަވާ މީހަކަށް ވާން ޖެހޭނެ ކަމަށް ޑިމޮކްރެޓްސް އިން ބުނެއެވެ.

ދަ ޑިމޮކްރެޓްސް އިން ބުނި ގޮތުގައި އެ ޕާޓީގެ މަޖިލިސް އިންތިޚާބުގެ ޕްރައިމަރީގައި ވޯޓުލެވޭ މީހުންގެ ވަގުތީ ލިސްޓު 6 ފެބްރުއަރީގައި އާއްމު ކުރާނެއެވެ. އަދި ޝަކުވާތަކަށް ބެލުމަށްފަހު 11 ފެބްރުއަރީގައި ދާއިމީ ލިސްޓު އާއްމު ކުރާނެއެވެ.

ޕްރައިމަރީގައި ދާއިރާއަކަށް އެންމެ މެންބަރަކު ކުރިމަތިލައިފިނަމަ އެ މެންބަރަކަށް ޕްރައިމަރީއަކާ ނުލައި ޓިކެޓް ލިބޭނެކަމަށްވެސް ޑިމޮކްރެޓްސް އިން ބުންޏެވެ.

ދަ ޑިމްކޮރެޓްސް އިން ވަނީ މަޖިލިސް އިންތިޚާބުގައި ހުރިހާ އިންތިޚާބީ ދާއިރާއަކަށް ވާދަކުރުމަށް ނިންމާފައެވެ.