ގައުމީ އަދި ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބާއްވާ ތަންތަނުގައި ހުރުން ލާޒިމުކުރާ ސިއްހީ ޚިދުމަތް ފޯރުކޮށްދިނުމަށް ބޭނުންވާ ވަސީލަތްތައް ގާއިމުކުރުމާ ގުޅޭ ގޮތުން ކުޅިވަރާ ބެހޭ ވުޒާރާއިން މޯލްޑިވްސް އޮލިމްޕިކް ކޮމިޓީ (އެމްއޯސީ) އާއެކު އެއްބަސްވުމެއްގައި ސޮއިކޮށްފިއެވެ.
ކުޅިވަރު ކުޅޭ ތަންތަނުގައި ހުރުން ލާޒިމުކުރާ ސިއްހީ ޚިދުމަތް ފޯރުކޮށްދިނުމުގެ އުސޫލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރާކާރުގެ ފުރަތަމަ 14 ހަފުތާގެ ތެރޭގައި ކުޅިވަރުގެ ވުޒާރާއިން އެކުލަވާލާފައިވާ މަގު ޗާޓުގައި ހިމެނޭ ކަމެކެވެ.
މިކަމާ ގުޅޭ ގޮތުން އެމްއޯސީ އާއެކު ކުޅިވަރާ ބެހޭ ވުޒާރާއިން މިއަދު ވަނީ މެމޮރެންޑަމް އޮފް އަންޑަސްޓޭންޑިން (އެމްއޯޔޫ) އެއްގައި ސޮއިކޮށްފައެވެ. ހ. ބޯޅަގޭގައި ބޭއްވި މި ރަސްމިއްޔާތުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ކުޅިވަރާ ބެހޭ ވަޒީރު ޢަބްދުﷲ ރާފިޢުއެވެ. އަދި އެމްއޯސީގެ ފަރާތުން ސޮއިކުރެއްވީ އެ ކޮމިޓީގެ ރައީސް މުޙައްމަދު އަބްދުލް ސައްތާރު (ޗަމްޕީ) އެވެ.
މި ރަސްމިއްޔާތުގައި ވަޒީރު ވަނީ ރައީސް ޑރ. މުޙައްމަދު މުޢިއްޒު ވެވަޑައިގެންނެވި "ހަފުތާ 14" ގެ ވައުދުތަކުގައި މިކަމަށް އިސްނެންގުވުމަކީ ވަރަށް މުހިންމު ކަމެއް ކަމަށް ފާހަގަކުރައްވާފައެވެ. އަދި މި ރަސްމިއްޔާތުގައި އެމްއޯސީގެ ރައީސް ވަނީ ކުޅިވަރާ ގުޅޭ ހުރިހާ ކަމެއްގައި ވުޒާރާއާ ގާތުން ގުޅިގެން މަސައްކަތް ކުރުމަށް އެމްއޯސީން އަބަދުވެސް މަސައްކަތްކުރައްވާނެ ކަމަށް ވިދާޅުވެފައެވެ.
މީގެ ކުރިން ޕީއެސްއެމުން ގެނެސްދިން "ހަފުތާ 14" ޕްރޮގްރާމުގައި ވާހަދައްކަވަމުން ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޒް ވިދާޅުވީ މި އުސޫލު އެކުލާވާލުމުގައި ކަމާ ގުޅުންހުރި ދާއިރާގެ ބޭބޭފުޅުންގެ ލަފަޔާއި މަޝްވަރާ ހޯއްދެވި ކަމަށެވެ. އަދި އުސޫލު ކަނޑައެޅުި ކުޅިވަރު ކުޅޭ ތަންތަނުގައި ސިއްހީ ވަސީލަތްތައް ގައީމުކުރުމުގެ މަސައްކަތް ކުރަމުންދާއިރު، ދާއިމީކޮށް ގާއިމުކުރެވެން ހުރި ދިމާތަކުގައި އުސޫލާ އެއްގޮތަށް ވަސީލަތްތައް ބެހެއްޓުމުގެ މަސައްކަތް ކުރިއަށް ހުރި ދުވަސްތަކުގައި ފެށިގެންދާނެ ކަމަށްވެސް ވިދާޅުވިއެވެ. އަދި މި ވަގުތަށް ދާއިމީކޮށް ވަސީލަތްތައް ގާއިމުކުރެވެން ނެތް ތަންތުނަގައިވެސް ދާއިމީކޮށް އެ މަސައްކަތް ފެށޭނެ ގޮތްތައް ރާވަމުންދާނެ ކަމަށްވެސް ވަނީ ވިދާޅުވެފައެވެ.
ކުޅިވަރާ ބެހޭ ވުޒާރާއިން އެމްއޯސީ އާއެކު އެމްއޯޔޫގައި ސޮއިކުރިއިރު، މި މަޝްރޫއު ރަސްމީކޮށް އިފްތިތާހުކުރުމަށް ހަމަޖެހިފައިވަނީ މި މަހުގެ 15 ވަނަ ދުވަހެވެ.