އެމްޕީއޭލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް އޭގައި މިއަދު ހަވީރު އެލްޓީ ސްޕޯޓްސް ކުލަބާ ދެކޮޅަށް ކުޅުނު މެޗު ފަސޭހަކަމާއެކު މަސްއޮޑި ސްޕޯޓްސް ކުލަބުން ކާމިޔާބުކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުން މަސްއޮޑި މޮޅުވީ 4-0 ގެ ނަތީޖާއަކުންނެވެ. އަދި މި މުބާރާތުގައި ކުޅުނު ފުރަތަމަ މެޗުންވެސް މަސްއޮޑި ވަނީ މަހިބަދޫ ސްޕޯޓްސް ކުލަބު އަތުން 4-0 ގެ ނަތީޖާއަކުން މޮޅުވެފައެވެ.
މިއަދު ހަވީރު ކުޅުނު މެޗުގައި މަސްއޮޑީގެ ފަރާތުން މޮޅު ކުޅުމެއް ފެނިގެންދިޔައިރު، ފުރަތަމަ ހާފުގައި އެ ޓީމުން ވަނީ ދެ ލަނޑު ކާމިޔާބުކޮށްފައެވެ. އެގޮތުން މެޗުގެ 16 ވަނަ މިނެޓުގައި ކެޕްޓަން އިބްރާހީމް ވަހީދު ހަސަން (އިއްބެ) ދިން ބޯޅައެއްގައި އޭރިއާ ބޭރުން ފޮނުވާލި ހަމަލާއަކުން އައްޒާމް އަބްދުﷲ ވަނީ މަސްއޮޑިއަށް ލީޑު ނަގައިދީފައެވެ. މި މެޗުގައި މަސްއޮޑިން ލީޑުފުޅާކުރީ މެޗުގެ 31 ވަނަ މިނެޓުގައެވެ. ބިދޭސީ މިޑްފީލްޑަރު ޖަޚޮނޯފް ސަރްދޯރު ނަގައިދިން ކޯނަރަކުން މި ލަނޑު ކާމިޔާބުކޮށްދިނީ ބިދޭސީ ފޯވާޑް އޮޑިލީ ފީލިކްސްއެވެ.
މި މެޗުގެ ދެވަނަ ހާފުވެސް މަސްއޮޑިން އެއްކޮށް ކޮންޓްރޯލް ކޮށްގެން ކުޅުނު ނަމަވެސް، މި ހާފުގައި އެ ޓީމަށް މާ ގިނަ ނުރައްކާތެރި ހަމަލާތަކެއް އުފެއްދިފައެއް ނުވެއެވެ. އެކަމަކު މެޗުގެ ފަހު މިނެޓުގައި އޭރިއާ ތެރެއިން ލިބުނު ބޯޅައަކުން ބަދަލަކަށް ކުޅެން އެރި ހުސެއިން ޝަރީފް ވަނީ މަސްއޮޑީގެ ތިންވަނަ ލަނޑު ޖަހައިދީފައެވެ. އަދި މެޗުގެ އިތުރު ވަގުތުގެ ތެރޭގައި ލިބުނު ޕެނަލްޓީއަކުން ސަރްދޯރު ވަނީ އެ ޓީމުގެ ހަތަރުވަނަ ލަނޑު ކާމިޔާބުކޮށްދީފައެވެ.
މި މޮޅާއެކު މަސްއޮޑިން ވަނީ މުބާރާތުގައި ކުޅުނު ދެ މެޗުންވެސް މޮޅުވެ ހަ ޕޮއިންޓް ހޯދާފައެވެ. މި ފަހަރުގެ މުބާރާތް ކުރިއަށްދަނީ ތިން ގުރޫޕަކަށް ބަހާލައިގެންނެވެ. އަދި މި އަހަރުގެ މުބާރާތުގައި ޖުމްލަ 15 ޓީމެއް އަންނަނީ ވާދަކުރަމުންނެވެ.