ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މި އަހަރަށް 25 މިލިޔަން ރުފިޔާގެ ބަޖެޓެއް ކަނޑައެޅިިއިރު، ރާއްޖޭގައި ވޮލީއަށް ކުރާ ޚަރަދަށް ބަލާއިރު މިއީ ކުޑަ ބަޖެޓެއް ކަމަށް ވޮލީގެ ތަޖުރިބާކާރުން ބުނެފިއެވެ.
ވީއޭއެމުން ދާދި ފަހުން ބޭއްވި އަހަރީ އާންމު ޖަލްސާގައި ވަނީ މި އަހަރަށް 25 މިލިޔަން ރުފިޔާގެ ބަޖެޓެއް ފާސްކޮށްފައެވެ. މިއީ ވޮލީގެ ތާރީޚުގައި މިހާތަނަށް ފާސްކުރި އެންމެ ބޮޑު ބަޖެޓެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަދައްކަވަމުން ތަޖުރިބާކާރު ވޮލީ ކޯޗު މުޙައްމަދު ޝަރަފް ބުނީ ވޮލީގެ މެއިން ސްޕޮންސަރަކީ ދިވެހި ދައުލަތް ކަމަށާއި، އެހެންކަމުން ދައުލަތުން ވޮލީއަށް ކުރާ ޚަރަދަށް ބަލާއިރު 25 މިލިޔަނަކީ ވަރަށް ކުޑަ އެއްޗެއް ކަމަށެވެ. އަދި ރާއްޖޭގެ ވޮލީއަށް ވަރަށް ބޮޑު ޚަރަދެއް ކުރެވޭ ކަމަށާއި، އެކަމަކު އެ ޚަރަދުތައް ކުރެވެނީ އެންމެ ފައިދާހުރި ގޮތަށްތޯ ސުވާލު އުފެދޭ ކަމަށްވެސް ބުންޏެވެ. އެހެންކަމުން އެންމެ ރަނގަޅަށް އެ ޚަރަދު ކުރެވޭނީ ވޮލީ އެސޯސިއޭޝަނުގެ ތެރެއިން، ވޮލީއަށް ބަސްބުނާ މީހުންގެ ލަފަޔާއެކުގައި ކަމަށްވެސް ޝަރަފް ވަނީ ބުނެފައެވެ.
މި ޕްރޮގުރާމުގައި ވާހަކަދައްކަވަމުން ވޮލީގެ ކޯޗު އަޙްމަދު އަދީލް (ބޭބެ) ބުނީ ވީއޭއެމުން 25 މިލިޔަން ރުފިޔާގެ ބަޖެޓެއް ކަނޑައެޅިއިރު، ސްޕޮންސަރުންނާއި ސަރުކާރުގެ އެހީގައި އެކަމަށް ފައިސާ ހޯދޭނެ ގޮތްތަކަކާ މެދު ވިސްނާފައިވާ ކަމަށެވެ. އަދި މެންބަރު ކުލަބުތަކާ ވާހަކަދެކެވި، ވޮލީއަށް ފައިދާވާނެ ކަންތައްތަކަށް އެ ފައިސާ ޚަރަދުކުރުމަށް ނިންމާފައިވާ ކަމަށްވެސް ވަނީ ބުނެފައެވެ.
އަދީލް ބުނީ ވަރަށް ގިނަ ބައިނަލްއަގުވާމީ މުބާރާތްތައް ރާއްޖޭގައި ބޭއްވުމަށް މި އަހަރު ހަމަޖެހިފައިވާ ކަމަށާއި، އަދި ވޮލީގެ ގިނަ ކަންތައްތަކެއްވެސް ބަޖެޓުގައި ހިމަނާފައިވާ ކަމަށެވެ. އަދި އަތޮޅުތަކުގައި ވޮލީބޯޅަ އިތުރަށް ފުޅާކުރުމަށް ގިނަ ކަންތަކެއް ރޭވިފައިވާއިރު، މިއީ ވަރަށް އުއްމީދީ ބަޖެޓެއް ކަމަށްވެސް ވަނީ ބުނެފައެވެ.
މީގެ އިތުރުން ތަޖުރިބާކާރު ކޯޗު މުޙައްމަދު ނަދީމް ބުނީ ރާއްޖޭގައި ވޮލީ ކުރިއެރުވޭނީ ޑިވެލޮޕްމަންޓް ޕްރޮގުރާމުތައް ގިނަ ކޮށްގެން ކަމަށާއި، އެގޮތުން މި ފަހަރުގެ ޕްލޭންގައި ބައިނަލްއަގުވާމީ ޖޫނިއާ ގިނަ މުބާރާތްތަކެއްގައި ބައިވެރިވުމަށް ނިންމާފައިވާ ކަމަށެވެ. އެހެންކަމުން މި ބަޖެޓުން އެކަމަށް ފައިދާކުރާނެ ކަމަށްވެސް ބުންޏެވެ.
ނަދީމް ބުނީ ވޮލީ ކުޅޭނެ ވަކިތަނެއް ނެތުމުން ގިނަ ދަތިތަކެއް އަދިވެސް ކުރިމަތިވާ ކަމަށާއި، އެހެންކަމުން ވޮލީ ކުޅޭނެ ތަނެއް ހެދުމަށް ބޮޑު ޚަރަދެއް ދާނެ ކަމަށެވެ. އެ ހުރިހާ ކަމަކަށް ބަލާއިރު، މިއީ ބޮޑު ބަޖެޓެއް ނޫން ކަމަށްވެސް ވަނީ ބުނެފައެވެ.
ވީއޭއެމުން މި އަހަރަށް 25 މިލިޔަން ރުފިޔާގެ ބަޖެޓެއް ކަނޑައެޅިިއިރު، ރާއްޖޭގައި ލޯކަލް މުބާރާތްތައް ބޭއްވުމަށް ވަނީ 9.7 މިލިޔަން ރުފިޔާ ހިމަނާފައެވެ. އަދި ބައިނަލްއަގުވާމީ މުބާރާތްތައް ރާއްޖޭގައި ބޭއްވުމަށް 3.9 މިލިޔަން ރުފިޔާ ބަޖެޓުގައި ހިމެނިއިރު، ބޭރުގެ މުބާރާތްތައްތަކުގައި ވާދަކުރުމަށާއި ޓްރެއިނިން ކޭމްޕުތަކަށް ވަނީ 8.6 މިލިޔަން ރުފިޔާ ހިމަނާފައެވެ. މީގެ އިތުރުން ވީއޭއެމުގެ އިދާރީ މަސައްކަތްތަކަށް ވަނީ 3.5 މިލިޔަން ރުފިޔާ ނަޖެޓުގައި ހިމަނާފައެވެ.