ކުލަބު ވެލެންސިއާގެ ތާއީދު އޮތް ކަމަށް ބުނެ ސިޓީއެއްގައި ސޮއި ފޯޖުކޮށްފައިނުވާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްކަމަށް ކުރިމަތިލެއްވި މުފާވިޒު ހާޝިމް (މުފާ) ވިދާޅުވެއްޖެއެވެ.
އެފްއޭއެމުން އަންނަ ޖެނުއަރީ މަހުގެ 31 ވަނަ ދުވަހު އައު އިންތިޚާބެއް ބޭއްވުމަށް ނިންމާފައިވާއިރު، އެ އިންތިޚާބުގައި ވާދަކުރެއްވުމަށް ލިޔެކިޔުންތައް ހުށަހެޅުއްވި ދެ ކެންޑިޑޭޓުންނަކީ މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު މުފާގެ އިތުރުން ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) އެވެ. އެ ދެ ކެންޑިޑޭޓުންވެސް ވެލެންސިއާގެ ތާއީދު އޮތް ސިޓީއެއް ހުށަހަޅުއްވާފައިވާކަން ވަނީ ހާމަވެފައެވެ.
އެފްއޭއެމުގެ ރައީސްގެ މަގާމަށް ކުރިމަތިލައްވާ ކޮންމެ ކެންޑިޑޭޓަކުވެސް ފުރަތަމަ ޑިވިޝަނުގެ ތިން ކުލަބެއްގެ ތާއީދު އޮތްކަމުގެ ލިޔުމެއް ހުށަހަޅަން ޖެހެއެވެ. ޓޮމް އާއި މުފާވެސް ހުށަހެޅުއްވި ލިޔެކިޔުންތަކުގައި ވެލެންސިއާގެ ތާއީދު އޮތްކަމުގެ ލިޔުމެއް އޮތް ނަމަވެސް، ދާދިފަހުން އިންތިޚާބުވި ވެލެންސިއާގެ އައު ޗެއާމަން، ރާއްޖޭގެ ތަޖުރިބާކާރު ކުޅިވަރު ނޫސްވެރިޔާ އަބްދުﷲ އަޒްމީން ވަނީ ޓޮމްގެ ކެންޑިޑެސީ ފޯމު ހުށަހަޅުއްވަން އޭނާއާއެކު، އެފްއޭއެމް ހައުސްއަށް ވަޑައިގެންފައެވެ.
އެހެންކަމުން އެ މައްސަލަ ސާފުކޮށްދޭން، ވެލެންސިއާއިން ވަނީ އެފްއޭއެމުގެ އިލެކްޓޯރިއަލް ކޮމިޓީއަށް ސިޓީއެއް ފޮނުވާފައެވެ. އެ ސިޓީގައި ވަނީ ޓޮމްއަށް ތާއީދުކުރަން ދީފައިވާ ސިޓީގެ އިތުރުން، ދެން އޮތް ސިޓީގެ މައްސަލަ ކޮމިޝަނަރ އޮފް ސްޕޯޓްސް އާއި ޕޮލިހަށް ހުށަހަޅާފައިވާ ކަމަށް ބުނެފައެވެ.
މިކަމާ ގުޅިގެން ގުޅިގެން ސޯޝަލް މީޑިއާގައި ހިއްސާކުރެއްވި މެސެޖެއްގައި ކުލަބު އީގަލްސްގެ ވައިސް ޗެއާމަން މުފާ ވިދާޅުވީ ސޮއި ފޯޖުކުރަން އޭނާ ނުޖެހޭ ކަމަށާއި، އެގޮތުން ވެލެންސިއާގެ ސޮއި ނުލައިވެސް ފަސް ކުލަބެއްގެ ސޮއި ލިބިފައިވާ ކަމަށެވެ. އެހެންކަމުން ސޮއި ފޯޖުކުރަން ޖެހޭ ހާލަތުގައި ހުރީ އޭނާ ނޫން ކަމަށްވެސް ވިދާޅުވިއެވެ. މީގެ އިތުރުން މުފާ ވަނީ ފުލުހުން މި މައްސަލަ ވަކި ކޮޅަކަށް ބުރަނުވެ، އިންސާފުވެރި ތަހުގީގެއް ކުރުމަށްފަހު، ރައްޔިތުންނަށް ހަގީގަތް ހާމަކޮށްދެއްވުމަށް އެދިވަޑައިގެންފައެވެ.
އެފްއޭއެމުގެ އިލެކްޓޯރިއަލް ކޮމިޓީގެ އިތުރުން ފީފާ އާއި އޭއެފްސީއަށްވެސް ކޮޕީ ފޮނުވާފައިވާ އެ ސިޓީއާއެކު ވެލެންސިއާއިން ވަނީ އެ ކުލަބުގެ އައު ޗެއާމަނުގެ ގޮތުގައި އަޒްމީންގެ ނަން ކުޅިވަރު ކުލަބުތަކުގެ ބެލެނިވެރި ފަރާތް ކަމަށްވާ ސްޕޯޓްސް ކޮމިޝަނުގައި ރަޖިސްޓްރީކޮށްފައިވާކަން ހާމަކޮށް ދިނުމަށް އެދި ސިޓީއެއްވެސް ފޮނުވާފައެވެ. އެ ސިޓީއަށް ޖަވާބުދެއްވައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ސޮއިކުރައްވައި ފޮނުއްވި ޖަވާބު ސިޓީގައި ވަނީ ވެލެންސިއާގެ އައު ޗެއާމަނަކީ އަޒްމީނުކަން ކަށަވަރުކޮށްދެއްވާފައެވެ.
ރާއްޖޭގެ މީޑިއާއަކަށް ދިން އިންޓަވިއުއެއްގައި މުފާ ވަނީ ކޮމިޝަނަރ އޮފް ސްޕޯޓްސްވެސް މި ކަމުގައި ވަކި ފަރާތަކަށް ބުރަނުވެ ކަންކަން ނިންމުމަށް އެދޭ ކަމަށް ވިދާޅުވެފައެވެ.
އެފްއޭއެމުގެ ރައީސް ބައްސާމުގެ ދައުރު ހަމަވާން ހަ މަސް ދުވަސް ބާކީ އޮއްވައި، އަންނަ މަހު އިންތިޚާބެއް ބާއްވަން އެ އިދާރާގެ ހިންގާ ކޮމިޓީން ނިންމާފައިވާއިރު، ދާދި ފަހުން ކޮމިޝަނަރ އޮފް ސްޕޯޓްސް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް އަންގާފައެވެ. އެގޮތަށް އެންގީ ސުވާލު އުފެދޭ ކަންތައްތަކެއް ހުރުމުން ކަމަށް ވަނީ ބުނެފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވަނީ ވިދާޅުވެފައެވެ.