އޭޝިއަން ޝޫޓިން ކޮންފެޑެރޭޝަނުން އާންމުކުރި 2023 ވަނަ އަހަރުގެ 10 މީޓަރު އެއާ ޕިސްޓަލްގެ ރޭންކިންގެ 34 ވަނައިގައި ރާއްޖޭގެ އެންމެ ވަރުގަދަ އެއް ޝޫޓަރު ޒިޔާން ޒިޔާއު ހިމެނިއްޖެއެވެ.
މިއީ ރާއްޖޭގެ ޝޫޓިން ތާރީޚުގައި ދިވެހި އެތުލީޓަކު ރޭންކިންގެ މިހާ ހިސާބަށް ދިޔަ ފުރަތަމަ ފަހަރެވެ. އޭޝިއާ ބައްރުގައި ގިނަ އަދަދެއްގެ ޝޫޓަރުން ހިމެނޭއިރު، މި ކެޓެގަރީން ޒިޔާން 34 ވަނައިގައި އޮތީ ޖުމްލަ 293 ރޭޓިން އާއެކުއެވެ. މި ރޭޓިންގެ އެއްވަނައިގައި އޮތީ ވިއެޓްނާމުގެ ޕަމް ގުއަންގް ހީއެވެ. ދެވަނައިގައި ހިމެނެނީ ދެކުނު ކޮރެއާގެ ލީ ވޮންހޯއެވެ.
މީގެ އިތުރުން ރާއްޖޭގެ އަރަމުން އަންނަ ޝޫޓަރު އަލީ މާހީ ވަނީ 10 މީޓަރު އެއާ ޕިސްޓަލްގެ އޭޝިއާ ރޭންކިންގެ 53 ވަނަ ލިބިފައެވެ. އެއީ ޖުމްލަ 18 ރޭޓިން ޕޮއިންޓާއެކުއެވެ.
އިންޓަނޭޝަނަލް ޝޫޓިން ސްޕޯޓްސް ފެޑެރޭޝަން (އައިއެސްއެސްއެފް) އިން އިންތިޒާމުކޮށްގެން ބޭއްވި 53 ވަނަ ވޯލްޑް ޝޫޓިން ޗެމްޕިއަންޝިޕުގައިވެސް ޒިޔާން ވަނީ ރާއްޖެ ތަމްސީލުކޮށްފައެވެ. އަދި ޒިޔާން އަކީ ރާއްޖޭގެ ޝޫޓިންގެ ރިކޯޑުތަކެއް ބަލަހައްޓަމުން އަންނަ އެތުލީޓެކެވެ. އަދި ގިނަ ގޭމްސްތަކެއްގައިވެސް ޒިޔާން ވަނީ ރާއްޖެ ތަމްސީލުކޮށްދީފައެވެ.