ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްކަމަށް ކުރިމަތިލެއްވި މުފާވިޒު ހާޝިމް (މުފާ)، ކުލަބު ވެލެންސިއާގެ ނަމުގައި ހުށަހެޅި ސިޓީއަކީ ފޯޖުކޮށްފައިވާ ސިޓީއެއް ކަމަށް ބުނެ މައްސަލަ ފުލުހަށް ހުށަހަޅައިފިއެވެ.
އެފްއޭއެމުން ވަނީ އަންނަ ޖެނުއަރީ މަހުގެ 31 ވަނަ ދުވަހު އައު އިންތިޚާބެއް ބޭއްވުމަށް ނިންމާފައިވާކަން ހާމަކޮށްފައެވެ. އެ އާއެކު އެ އިންތިޚާބުގައި ވާދަކުރެއްވުމަށް ލިޔެކިޔުންތައް ހުށަހެޅުއްވި ދެ ކެންޑިޑޭޓުންނަކީ މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު މުފާގެ އިތުރުން ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) އެވެ. އެ ދެ ކެންޑިޑޭޓުންވެސް ވެލެންސިއާގެ ތާއީދު އޮތް ސިޓީއެއް ހުށަހަޅުއްވާފައިވާކަން ވަނީ ހާމަވެފައެވެ.
އެފްއޭއެމުގެ ރައީސްގެ މަގާމަށް ކުރިމަތިލައްވާ ކޮންމެ ކެންޑިޑޭޓަކުވެސް ފުރަތަމަ ޑިވިޝަނުގެ ތިން ކުލަބެއްގެ ތާއީދު އޮތްކަމުގެ ލިޔުމެއް ހުށަހަޅަން ޖެހެއެވެ.ޓޮމް އާއި މުފާވެސް ހުށަހެޅުއްވި ލިޔެކިޔުންތަކުގައި ވެލެންސިއާގެ ތާއީދު އޮތްކަމުގެ ލިޔުމެއް އޮތް ނަމަވެސް، ދާދިފަހުން އިންތިޚާބުވި ވެލެންސިއާގެ އައު ޗެއާމަން، ރާއްހޭގެ ތަޖުރިބާކާރު ކުޅިވަރު ނޫސްވެރިޔާ އަބްދުﷲ އަޒްމީން ވަނީ ޓޮމްގެ ކެންޑިޑެސީ ފޯމު ހުށަހަޅަން އޭނާއާއެކު، އެފްއޭއެމް ހައުސްއަށް ވަޑައިގެންފައެވެ.
އެހެންކަމުން އެ މައްސަލަ ސާފުކޮށްދޭން، ވެލެންސިއާއިން ވަނީ އެފްއޭއެމުގެ އިލެކްޓޯރިއަލް ކޮމިޓީއަށް ސިޓީއެއް ފޮނުވާފައެވެ. އެ ސިޓީގައި ވަނީ ޓޮމްއަށް ތާއީދުކުރަން ދީފައިވާ ސިޓީގެ އިތުރުން، ދެން އޮތް ސިޓީގެ މައްސަލަ ކޮމިޝަނަރ އޮފް ސްޕޯޓްސް އާއި ޕޮލިހަށް ހުށަހަޅާފައިވާ ކަމަށް ބުނެފައެވެ.
އަދި ފީފާ އާއި އޭއެފްސީއަށްވެސް ކޮޕީ ފޮނުވާފައިވާ އެ ސިޓީއާއެކު އެ ކުލަބުން ވަނީ އައު ޗެއާމަނުގެ ގޮތުގައި އަޒްމީންގެ ނަން ކުޅިވަރު ކުލަބުތަކުގެ ބެލެނިވެރި ފަރާތް ކަމަށްވާ ސްޕޯޓްސް ކޮމިޝަނުގައި ރަޖިސްޓްރީކޮށްފައިވާކަން ހާމަކޮށް ދިނުމަށް އެދި ސިޓީއެއްވެސް ފޮނުވާފައެވެ. އެ ސިޓީއަށް ޖަވާބުދެއްވައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ސޮއިކުރައްވައި ފޮނުއްވި ޖަވާބު ސިޓީގައި ވަނީ ވެލެންސިއާގެ އައު ޗެއާމަނަކީ އަޒްމީނުކަން ކަށަވަރުކޮށްދެއްވާފައެވެ.
މި މައްސަލަތަކާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސްކަމަށް ވާދަކުރައްވާ އަދި ރައްޔިތުންގެ މަޖިލީހުގެ އދ. މަހިބަދޫ ދާއިރާގެ މެންބަރުކަންވެސް ކުރައްވަމުން އަންނަ ޓޮމް ވިދާޅުވީ ވެލެންސިއާގެ ލިޔުމެއް ކަމަށް ދެއްކުމަށް ސޮއިކުރުމުގައި އެ ކުލަބުގެ ބައެއް ބޯޑު މެންބަރުންނަށް ބިރުދައްކައިގެން، ފަތިސްގަޑީގައި ސޮއި ހޯދިކަމުގެ މައުލޫމާތު ލިބިފައިވާ ކަމަށެވެ. އެހެންކަމުން އެ މައްސަލަ އާއި ވެލެންސިއާގެ ލިޔުމެއް ފޯޖްކުރި މައްސަލަ ތަހުގީގުކޮށް ދިނުމަށް ފުލުހަށް ހުށަހަޅާނެ ކަމަށްވެސް ވިދާޅުވިއެވެ. އަދި ފުޓްބޯޅަ އެސޯސިއޭޝަނަށް އަރާފައިވާ "ވިގަނީގެ ކަންކަން ނުނިމެނީސް" މި ފަހަރު ހުއްޓާލުމެެއް ނެތް ކަމަށްވެސް ވިދާޅުވިއެވެ.
އެފްއޭއެމުގެ ރައީސް ބައްސާމް އަދީލް ޖަލީލްގެ ދައުރު ހަމަވާން ހަ މަސް ދުވަސް ބާކީ އޮއްވައި، އަންނަ މަހު އިންތިޚާބެއް ބާއްވަން އެ އިދާރާގެ ހިންގާ ކޮމިޓީން ނިންމާފައިވާއިރު، ދާދި ފަހުން ކޮމިޝަނަރ އޮފް ސްޕޯޓްސް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް އަންގާފައެވެ. އެގޮތަށް އެންގީ ސުވާލު އުފެދޭ ކަންތައްތަކެއް ހުރުމުން ކަމަށް ވަނީ ބުނެފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވަނީ ވިދާޅުވެފައެވެ.