އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގައި ނިއު ރޭޑިއަންޓް ސްޕޯޓްސް ކުލަބާއި ދަ ގްރާންޑޭ ސްޕޯޓްސް ކުލަބު ބައްދަލުކުރަން އޮތް މެޗު، މޫސުން ގޯސްވުމާ ގުޅިގެން ފަސްކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅެން އޮތް މެޗަކީ ނިއު ރޭޑިއަންޓުން މި މުބާރާތުގައި ކުޅެން އޮތް ފުރަތަމަ މެޗެވެ. އެކަމަކު މާލެ ސަރަަހައްދަށް ކުރަމުން އަންނަ ވިއްސާރައިގެ ސަބަބުން، އެ މެޗު ފެށެން ގާތްވެފައިވަނިކޮށް ވަނީ މެޗު ފަސްކުރަން ނިންމާފައެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ މެޗު ފަސްކުރަން ނިންމީ ދެ ޓީމުގެ އޮފިޝަލުންނާ މަޝްވަރާ ކުރުމަށްފަހު ކަމަށެވެ. އެއިރު ދެ ޓީމުގެ ކުޅުންތެރިން ވަނީ މެޗު ކުޅުމަށް ދަނޑަށް ހާޒިރުވެފައެވެ.
ނިއު ރޭޑިއަންޓާއި ދަ ގްރާންޑޭ ބައްދަލުކުރަން އޮތް މެޗު ފަސްކުރިއިރު، އެ މެޗު ކުޅުމަށް މިހާރު ހަމަޖައްސާފައިވަނީ ޖެނުއަރީ މަހުގެ 19 ވަނަ ދުވަހެވެ. ގައުމީ ފުޓްބޯޅަ ދަނޑުގެ ލައިޓްތަކުގެ މައްސަަލަ ހައްލުނުވާތީ، މި ސީޒަނުގެ ދެވަނަ ޑިވިޝަން ފުޓްބޯޅަ މުބާރާތުގެ މެޗުތައް ކުޅެމުން އަންނަނީ ހަމައެކަނި ހަވީރު ވަގުތުގައެވެ.
ނިއު ރޭޑިއަންޓުގެ ފުރަތަމަ މެޗު ފަސްކުރުމުން، ދެން އެ ޓީމުން މި މުބާރާތުގައި ކުޅޭ ފުރަތަމަ މެޗަކަށް ވާނީ ޖެނުއަރީ މަހުގެ 13 ވަނަ ދުވަހު ކުލަބު ޓީނޭޖާ ދެކޮޅަށް ކުޅޭ މެޗެވެ. މި ފަހަރު ނިއު ރޭޑިއަންޓް އޮތީ ދެވަނަ ޑިވިޝަނުގެ ގްރޫޕް ބީގައެވެ. އެ ގްރޫޕްގައި ދެން އޮތީ ދަ ގްރާންޑޭ އާއި ޓީނޭޖުގެ އިތުރުން ބީޖީ ސްޕޯޓްސް ކުލަބު އަދި ޓެންޓް ސްޕޯޓްސް ކުލަބެވެ. ތިން ގުރޫޕަކަށް ބަހާލައިގެން ކުރިއަށްދާ މި މުބާރާތުގައި ޖުމްލަ 15 ޓީމެއް ވަނީ ބައިވެރިވެފައެވެ.