އިނގިރޭސި ޕްރިމިއާ ލީގުގައި ރޭ ޝެފީލްޑް ޔުނައިޓެޑް އަތުން ހޯދި މޮޅާއެކު ތާވަލުގެ ތިންވަނައަށް އެންމެ ފަހުގެ ޗެމްޕިއަން މެންޗެސްޓާ ސިޓީ ޖެހިލައިފިއެވެ.
ސިޓީގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ.
ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުގެ ފުރަތަމަ ލަނޑު ފެނިގެންދިޔައީ މެޗުގެ 14 ވަނަ މިނެޓުގައެވެ. ޝެފީލްޑުގެ ޕެނަލްޓީ އޭރިއާގެ ބޭރުގައި ހުރެ ފޮނުވާލި ހަމަލާއެއް، ގޯލުގެ ތިރީ ކަނަށް އަމާޒުކޮށްލައިގެން މި ލަނޑު ކާމިޔާބުކޮށްދިނީ ރޮޑްރީއެވެ.
މި ލަނޑަށްފަހުވެސް ސިޓީން ވަނީ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން ސިޓީގެ ދެވަނަ ލަނޑު މެޗުގެ 61 ވަނަ މިނެޓުގައި ކާމިޔާބުކޮށްދިނީ ހޫލިއަން އަލްވަރޭޒެވެ. މިއީ ފިލް ފޮޑެން ތަނަވަސްކޮށްދިން ފުރުސަތަކުން އޭނާ ކާމިޔާބުކުރި ލަނޑެކެވެ.
މި މޮޅާއެކު ތާވަލުގެ ތިންވަނައިގައި ސިޓީ ޖެހިލީ ކުޅުނު 19 މެޗުން ލިބުނު 40 ޕޮއިންޓާއެކުއެވެ. ދެވަނައިގައި ކުޅުނު 20 މެޗުން ލިބުނު 42 ޕޮއިންޓާއެކު އެސްޓަން ވިލާ އޮތްއިރު، އެއްވަނައިގައި އޮތް ލިވަޕޫލަށްވެސް ހަމަ މި އަދަދަށް ވަނީ ޕޮއިންޓް ލިބިފައެވެ. ނަމަވެސް ލީގުގައި މިރޭ ކުޅޭ މެޗުން މޮޅުވެއްޖެނަމަ، ލިވަޕޫލަށް އެއްވަނައިގައި ލީޑު ފުޅާކުރެވޭނެއެވެ.