ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް އެންގެވި ނަމަވެސް، އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވިދާޅުވެއްޖެއެވެ.
އެފްއޭއެމުން މީގެ ކުރިން ވަނީ އެ އިދާރާގެ ހިންގާ ކޮމިޓީގެ 20 ވަނަ ބައްދަލުވުމުގައި އަސާސީ ގަވާއިދާ އެއްގޮތްވާ ގޮތުގެ މަތިން އަންނަ ޖެނުއަރީ މަހުގެ 31 ވަނަ ދުވަހު އައު އިންތިޚާބެއް ބޭއްވުމަށް ނިންމާފައިވާކަން ހާމަކޮށްފައެވެ. އެކަމަކު ދާދި ފަހުން ނެރުނު ނޫސް ބަޔާނެއްގައި ކޮމިޝަނަރ އޮފް ސްޕޯޓްސް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް އަންގާފައެވެ. އެގޮތަށް އެންގީ ސުވާލު އުފެދޭ ކަންތައްތަކެއް ހުރުމުން ކަމަށް އެ ބަޔާނުގައި ވަނީ ބުނެފައެވެ.
އެފްއޭއެމުގެ ރައީސް ބައްސާމް އަދީލް ޖަލީލްގެ ދައުރު ހަމަވާން ހަ މަސް ދުވަސް ބާކީ އޮއްވައި، އަންނަ މަހު އިންތިޚާބެއް ބާއްވަން އެ އިދާރާގެ ހިންގާ ކޮމިޓީން ނިންމިއިރު، އެ ކޮމިޓީގެ ގާނޫނީ ސައްހަކަން ގެއްލިފައިވާ ކަމަށް ކޮމިޝަނަރުގެ ބަޔާނުގައި ވަނީ ބުނެފައެވެ.
އެފްއޭއެމުގެ އައު އިންތިޚާބު ބޭއްވުމުގެ މަސައްކަތް މި ވަގުތު އެ އިދާރާއިން ކުރަމުން އަންނައިރު، އެ އިދާރާގެ ހިންގާ ކޮމިޓީގެ ފަސް މެންބަރަކު އިސްތިއުފާދީ، ކޯރަމް ގެއްލިފައިވާ ދަނޑިވަޅުގައި، އެކަންކަމާ ގުޅޭ މައުލޫމާތު އޮޅުންފިލުވުމަށް ސްޕޯޓްސް ކޮމިޝަނުން އެދިފައިވީ ނަމަވެސް، މައުލޫމާތުތައް އެދިފައިވާ މުއްދަތުގައި ނުފޮނުވާ ކަމަށް އެ ކޮމިޝަނުން ވަނީ ބުނެފައެވެ. އަދި އެ މެންބަރުން އިސްތިއުފާ ދެއްވައި ފޮނުވާފައިވާ ސިޓީތަކުގެ ކޮޕީ ސްޕޯޓްސް ކޮމިޝަނަށް ލިބިފައިވާކަންވެސް ވަނީ ފާހަގަކޮށްފައެވެ.
އޭގެ ތެރެއިން ތިން މެމްބަރުން އިސްތިއުފާ ދެއްވާފައިވަނީ މި މަހުގެ 15 ގައި ކަމަށް ސްޕޯޓްސް ކޮމިޝަނުގެ ބަޔާނުގައި ވަނީ ފާހަގަކޮށްފައެވެ. އަދި އަނެއް ދެ މެންބަރުންގެ ތެރެއިން އެއް މެންބަރަކު އިސްތިއުފާ ދެއްވާފައިވަނީ ސެޕްޓެމްބަރު 16 ގައި ކަމަށާއި، އަދި އޮކްޓޯބަރު މަހުގެ 5 ވަނަ ދުވަހުވެސް މެންބަރަކު އިސްތިއުފާދެއްވާފައިވާ ކަމަށްވެސް ވަނީ ބުނެފައެވެ. މީގެ އިތުރުން އެ އެސޯސިއޭޝަނުގެ ޖެނެރަލް ސެކްރެޓަރީގެ މަގާމުން ހުސެއިން ޖަވާޒް (ޖަވާ) ނޮވެމްބަރު މަހުގެ 24 ވަނަ ދުވަހު އިސްތިއުފާދެއްވިއިރު، އެ މަގާމަށް މެންބަރަކު އައްޔަނުކޮށްފައި ނުވާކަމަށް ސްޕޯޓްސް ކޮމިޝަނުން ވަނީ ބުނެފައެވެ.
އެހެންކަމުން އެފްއޭއެމުގައި ޖެނެރަލް ސެކްރެޓަރީއެއް މިވަގުތު ނެތުމާއި، އެސޯސިއޭޝަނުގެ ހިންގާ ކޮމިޓީގެ ކޯރަމުވެސް ގެއްލިފައިވާތީ، އެސޯސިއޭޝަނުގެ ކަންކަން އިތުރަށް ކުރިއަށް ގެންދިއުމުގައި، ފީފާ އާއި އޭއެފްސީ އަދި މޯލްޑިވްސް އޮލިމްޕިކް ކޮމިޓީ (އެމްއޯސީ) އާއެކު އިތުރަށް މަޝްވަރާކޮށް، ގޮތެއް ނިމެންދެން އިންތިޚާބުގެ ކަންކަން ހުއްޓާލުމަށް ސްޕޯޓްސް ކޮމިޝަނުން ވަނީ އަންގާފައެވެ.
އެހެން ނަމަވެސް އެފްއޭއެމުގެ ޖެނެރަލް ސެކްރެޓަރީގެ މަގާމު މިހާރު ފުރުއްވަމުން އަންނަ ޖައުޝަން ވިދާޅުވީ ސްޕޯޓްސް ކޮމިޝަނަރ ފޮނުއްވި ސިޓީގެ ޖަވާބު މިހާރު އަރުވާފައިވާނެ ކަމަށެވެ. އަދި ސްޕޯޓްސް ކޮމިޝަނުން ނެރުނު ބަޔާނުގެ މައުލޫމާތު އެންމެ ރަނގަޅު ނޫން ކަމަށާއި، އެހެންކަމުން އިންތިޚާބުގެ ކަންކަން ހުއްޓާލާފައިނުވާ ކަމަށްވެސް ވަނީ ވިދާޅުވެފައެވެ. މީގެ އިތުރުން ޖައުޝަން ވަނީ ފީފާ އާއި އޭއެފްސީގެ ލަފާގެ މަތިން ކުރަން ހުރި ކަންކަން ކުރާނެ ކަމަށްވެސް ވިދާޅުވެފައެވެ.
އެފްއޭއެމުގެ އިންތިޚާބުގެ ކަންކަން ހުއްޓާލުމަށް ސްޕޯޓްސް ކޮމިޝަނުން އަންގާފައިވާއިރު، އެ އިންތިޚާބުގައި ވާދަކުރެއްވުމަށް ދެ ކެންޑިޑޭޓަކު ވަނީ ލިޔެކިޔުންތައް ހުށަހަޅާފައެވެ. އެއީ ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) އާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު މުފާވިޒު ހާޝިމު (މުފާ) އެވެ.