އެމްޕީއޭލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް ސީގައި ފަސޭހަކަމާއެކު ކުލަބު ޕީކޭ ބަލިކޮށް، ވިކްޓަރީ ސްޕޯޓްސް ކުލަބުން ފެށުން ރަނގަޅުކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުން ވިކްޓަރީ މޮޅުވީ 3-0 ގެ ނަތީޖާއަކުންނެވެ.
މުޅި މެޗު ޑޮމިނޭޓްކޮށްގެން ވިކްޓަރީން ކުޅުނުއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މުޗުގެ 35 ވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ކިރިގިސްތާނުގެ އެނެޓޮލީ ވްލާސިޗޭވް (ޓޯނީ) އެވެ. މި ލަނޑުގެ ކުރިން މާ ނުރައްކާތެރި ހަމަލާއެއް ވިކްޓަރީއަށް ފޮނުވާލާފައެއް ނުވެއެވެ.
މި މެޗުގައި ވިކްޓަރީން ލީޑު ފުޅާކޮށްފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އުޒްބެކިސްތާނުގެ މިޑްފީލްޑަރު ފާރުކް ޚައިދަރޯފެވެ. މިއީ އޭރިއާ ތެރެއިން ވިކްޓަރީގެ އިބްރާހީމް ރިޒުހާނަށް ޕީކޭގެ ކެޕްޓަން އަޙްމަދު ގިތުރީޒް ކުރި ފައުލަކާ ގުޅިގެން ރެފުރީ ދިން ޕެނަލްޓީއެކެވެ.
މުޅި މެޗުގައި ދިފާއަށް ވިސްނައިގެން ކުޅުނު ޕީކޭ ކޮޅަށް ވިކްޓަރީން ތިންވަނަ ލަނޑެއް ޖެހީ މެޗުގެ 74 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލަކަށް ކުޅެން އެރި ބެލަރޫސްގެ ފޯވާޑް އިވާން ވެރާސްއެވެ. އޭގެ ފަހުން މި މެޗުގެ ފަހުކޮޅު ޕީކޭގެ ގޯލްކީޕަރު ތޮލާލު ހަސަން (ޓޮޕްލަކް) ވަނީ ވިކްޓަރީން ފޮނުވާލި ގިނަ ހަމަލާތަކެއް ދިފާއުކޮށްފައެވެ.
މި މޮޅާއެކު ގްރޫޕް ސީގެ ފެށުން ވިކްޓަރީން ރަނގަޅުކުރިއިރު، މި ފަހަރުގެ މުބާރާތް ކުރިއަށްދަނީ ތިން ގުރޫޕަކަށް ބަހާލައިގެންނެވެ. މި މުބާރާތުގައި ޖުމްލަ 15 ޓީމެއް ވަނީ ބައިވެރިވެފައެވެ. މި މުބާރާތުގައި ދެން މެޗެއް އޮންނާނީ އަންނަ ހޮނިހިރު ދުވަހެވެ. އެ ދުވަހުގެ ހަވީރު ކުޅޭ ގުރޫޕް އޭގެ މެޗުގައި ބައްދަލުކުރާނީ ޖޭޖޭ ސްޕޯޓްސް އާއި ކުޑަ ހެންވޭރެވެ.