އިނގިރޭސި ޕްރިމިއާ ލީގުގައި ރޭ އެންމެ ފަހުގެ ޗެމްޕިއަން މެންޗެސްޓާ ސިޓީ ފަހަތުން އަރައި އެވަޓަން ބަލިކޮށްފިއެވެ.
ރަށުން ބޭރުގައި ކުޅުނު މެޗު ސިޓީން ކާމިޔާބުކުރީ 3-1 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ ސިޓީންނެވެ. އެކަމަކު މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އެވަޓަނުންނެވެ. މެޗުގެ 29 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖެކް ހެރިސަންއެވެ.
އޭގެ ފަހުން މި މެޗުގެ ފުރަތަމަ ހާފުގައި އެވަޓަންގެ ގޯލްކީޕަރު ޖޯޑަން ޕިކްފަޑް ވަނީ ސިޓީން ފޮނުވާލި ގިނަ ހަމަލާތަކެއް ދިފާއުކޮށްފައެވެ. އެގޮތުން ސިޓީ ހޫލިއަން އަލްވަރޭޒް ފޮނުވާލި ދެ ހަމަލާއެއް ފާހަގަކޮށްލެވެއެވެ.
މި މެޗުގައި ސިޓީން ނަތީޖާ އެއްވަރުކޮށްފައުވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފިލް ފޯޑެންއެވެ. އަދި މެޗުގެ 64 ވަނަ މިނެޓުގައި ލިބުނު ޕެނެލްޓީއަކުން އަލްވަރޭޒް ވަނީ ސިޓީއަށް ލީޑު ނަގައިދީފައެވެ. މި މެޗުގައި ސިޓީގެ ތިންވަނަ ލަނޑު މެޗު ނިމެން ހަތަރު މިނެޓަށް ވެފައިވަނިކޮށް ކާމިޔާބުކޮށްދިނީ ބެނާޑޯ ސިލްވާއެވެ.
މި މޮޅާއެކު ތާވަލުގެ ހަތަރުވަނައަށް ސިޓީ ވަނީ ކުރިއަށް ޖެހިލާފައެވެ. އެ ޓީމަށް ވަނީ ކުޅުނު 18 މެޗުން 37 ޕޮއިންޓް ލިބިފައެވެ. އަދި މި މެޗުން ބަލިވުމާއެކު އެވަޓަން ވަނީ ރެލިގޭޝަން ޒޯނާ ގާތަށް ވެއްޓިފައެވެ.