އިނގިރޭސި ޕްރިމިއާ ލީގުގައި ރޭ ކްރިސްޓަލް ޕެލަސްއާ ދެކޮޅަށް ކުޅުނު މެޗުން ފަހު ވަގުތު މޮޅުވެ ޗެލްސީން މުހިންމު ތިން ޕޮއިންޓް ހޯދައިފިއެވެ.
އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 2-1 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ޗެލްސީން ގިނައިރު ބޯޅަ ގެންގުޅުނު ނަމަވެސް، ގިނަ ހަމަލާ އުފައްދާފައިވަނީ ޕެލަސްއިންނެވެ. ޒުވާން ޓީމަކާއެކު ކުޅުނު ޗެލްސީން ވަނީ މި މެޗުގެ ވަރަށް ކުރީކޮޅު ލީޑު ނަގާފައެވެ. މެޗު ފަށައިގެން 13 ވަނަ މިނެޓުގައި މަލޯ ގުސްޓޯ ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ މިހައިލޯ މުޑްރިކެވެ. އެކަމަކު މެޗުގެ ފުރަތަމަ ހާފު ނިމުމުގެ ކުރިން ޕެލަސްއިން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މިޝޭލް އޮލީސޭއެވެ.
މި މެޗުގެ ދެވަނަ ހާފުގައި ތިއާގޯ ސިލްވާ ނަގައިދިން ހުރަހަކުން ޗެލްސީގެ ނިކޮލަސް ޖެކްސަން ލަނޑެއް ޖެހި ނަމަވެސް، ވީއޭއާރުން އެ ލަނޑު ބަލައިގެންފައެއް ނުވެއެވެ. އެކަމަކު މެޗު ނިމެން ދެ މިނެޓަށް ވެފައި ވަނިކޮށް ލިބުނު ޕެނަލްޓީއަކުން ނޯނީ މަޑުއެކޭ ވަނީ ޗެލްސީއަށް އަލުން ލީޑު ނަގައިދީފައެވެ.
ރޭގެ މެޗުން ޗެލްސީ މޮޅުވިއިރު، މި މެޗަކީ ޗެލްސީގެ ތާރީޚުގައި އެންމެ ޒުވާން ޓީމެއް ލީގުގައި ކުޅުނު މެޗެވެ. އެގޮތުން ރޭ ކުޅުނު ޗެލްސީ ޓީމުގެ އެވްރެޖް އުމުރަކީ 23 އަހަރާއި 21 ދުވަހެވެ. އަދި މިއީ އެންމެ ފަހުން ލީގުގައި ޗެލްސީގެ ދަނޑުގައި އެ ޓީމު މޮޅުވި ތިންވަނަ މެޗެވެ. ޗެލްސީ ވަނީ ލީގުގައި މި އަހަރު އަމިއްލަ ދަނޑުގައި ހަ މެޗުން މޮޅުވެފައެވެ. އަދި ރޭ ހޯދި މޮޅާއެކު ޗެލްސީ ވަނީ ލީގުގައި ކުޅުނު 19 މެޗުން 25 ޕޮއިންޓް ހޯދައި، ތާވަލުގެ 10 ވަނައަށް ކުރިއަށްޖެހިލާފައެވެ.
ރޭގެ މެޗުން ޕެލަސް ބަލިވިއިރު، އެ ޓީމު އެންމެ ފަހުން ލީގު މެޗަކުން މޮޅުވެފައިވަނީ ހުސްވި މަހުގެ ހަތަރުވަނަ ދުވަހެވެ. އެއާއެކު ޕެލަސް އޮތީ ރެލިގޭޝަން ޒޯނުގައި މިވަގުތު އޮތް ލޫޓަން ޓައުންއާ ތިން ޕޮއިންޓާ ގާތުގައެވެ.