ލަންކާ މުބާރާތުން ރާއްޖޭގެ ފެތުންތެރިންނަށް އިތުރު މެޑަލްތަކެއް

ސްރީ ލަންކާގެ ކެންޑީގައި މިހާރު ކުރިއަށްދާ އެ ގައުމުގެ ނެޝަނަލް އަދި ޖޫނިއަރ ޝޯޓްކޯސް މުބާރާތުގެ ދެވަނަ ދުވަހު ރާއްޖޭގެ ފެތުންތެރިން އިތުރު މެޑަލްތަކެއް ހޯދައިފިއެވެ.

އެގޮތުން ލަންކާގެ ކެންޑީ ހިލްވުޑް ކޮލެޖް ސްވިމިން ޕޫލުގައި ކުރިއަށްދާ މި މުބާރާތުގައި އިއްޔެ ރާއްޖޭގެ ކުރިއަރަމުން އަންނަ ފެތުންތެރިޔާ މުޙައްމަދު ރިހާން ޝިހާމް ވަނީ 400 މީޓަރު މެޑްލީ ރޭހުން ލޯ މެޑަލް ހޯދާފައެވެ. ރިހާން ލޯ މެޑަލް ހޯދީ ރޭހުގައި ވާދަކުރި އަށް ފެތުންތެރިންނާ ވާދަކޮށް ފަސް މިނެޓު 3.53 ސިކުންތުން ރޭސް ނިންމައިގެންނެވެ. މިއީ ރޭހުގެ ދެވަނަ ހޯދި ލަންކާގެ ފެތުންތެރިޔާއަށްވުރެ 0.23 މިލިސިކުންތުގެ ތަފާތު ވަގުތެކެވެ.

އަދި މި މުބާރާތުން ރާއްޖޭގެ ކުރިއަރަމުން އަންނަ ފެތުންތެރިޔާ ލޫތު މުޙައްމަދު ހުސައިން ވަނީ 200 މީޓަރު ބްރެސްޓްސްޓްރޯކް ރޭހުން ލޯ މެޑަލް ހޯދާފައެވެ. އިއްޔެ ކުރިއަށްދިޔަ 200 މީޓަރު ބްރެސްޓްސްޓްރޯކް ރޭހުން ލޫތު މެޑަލް ހޯދީ ރޭހުގައި ވާދަކުރި ނުވަ ފެތުންތެރިންނާ ވާދަކޮށް، ފައިނަލުގައި ދެ މިނެޓު 50.43 ސިކުންތުން ރޭސް ނިންމައިގެންނެވެ. މިއީ ރާއްޖޭން ބޭރުގައި ފެތުމުގެ މުބާރާތަކުން ލޫތު ހޯދި ފުރަތަމަ މެޑެއްޔެވެ.
 
މީގެ އިތުރުން ރާއްޖޭގެ ފިރިހެން ޖޫނިއަރ ޓީމު ވަނީ 100 މީޓަރު ފްރީސްޓައިލް ރިލޭ ރޭހުން ރިހި މެޑަލް ހޯދާފައެވެ. ފިރިހެން ޓީމުން ރިހި މެޑަލް ހޯދީ ލަންކާގެ ކޮލެޖުތަކާއި އެކިއެކި ކުލަބުތައް ހިމެނޭގޮތުން 10 ޓީމަކާ ވާދަކޮށް، ފައިނަލުގައި ހަތަރު މިނެޓު 14.71 ސިކުންތުން ރޭސް ނިންމައިގެންނެވެ. މި ޓީމުގައި ހިމެނުނީ ޔާސީން މުޙައްމަދު ޔޫސުފާއި، ޝައިމް ހުސައިން އިބްރާހީމާއި، ލޫތުގެ އިތުރުން އިސްމާޢީލް އަޖުމަލް މޫސާއެވެ.

އަދި ސީނިއަރ ފިރިހެން ޓީމުން އިއްޔެ ވަނީ 50 މީޓަރު ފްރީސްޓައިލް ރިލޭ ރޭހުން ލޯ މެޑަލް ހޯދާފައެވެ. މި ޓީމުން ލޯ މެޑަލް ހޯދީ ލަންކާގެ އެންމެ ވަރުގަދަ މޮޅެތި ފެތުންތެރިން ހިމެނޭހެން އެކިއެކި ކުލަބުތަކާއި ކޮލެޖުތަކުގެ 15 ޓީމަކާ ވާދަކޮށް، ފައިނަލުގައި އެއް މިނެޓު 14.41 ސިކުންތުން ރޭސް ނިންމައިގެންނެވެ. މިއީ ރޭހުން ދެވަނަ ހޯދި ޓީމަށްވުރެ 0.52 މިލިސިކުންތުގެ ތަފާތު ވަގުތެކެވެ. ލޯ މެޑެލް ހޯދި ޓީމުގައި ހިމެނެނީ މުޙައްމަދު އާން ހުސައިނާއި، އަލީ އިއްމާނާއި ރިހާނުގެ އިތުރުން ހުސައިން ހާއިޝް މުޙައްމަދެވެ.

މި މަހުގެ 30 ގެ ނިޔަލަށް ކުރިއަށްދާ މުބާރާތުގެ ދެވަނަ ދުވަހު ރާއްޖޭގެ ފެތުންތެރިން ގިނަ މެޑަލްތަކެއް ހޯދިއިރު، މުބާރާތުގެ ފުރަތަމަ ދުވަހުވެސް ދިވެހި ފެތުންތެރިން ވަނީ ރަން ވަނަތަކެއް ހޯދާފައެވެ. މި މުބާރާތުގައި ރާއްޖެ ހިމެނޭހެން ލަންކާގެ އެކި ކުލަބުތަކާއި ކޮލެޖުތަކުން ޖުމްލަ 49 ޓީމު ވާދަކުރެއެވެ.