އެމްޕީއޭލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް ބީގައި ހަނިގޮތަކަށް ބީޖީ ސްޕޯޓްސް ކުލަބު ބަލިކޮށް، ޓެންޓް ސްޕޯޓްސް ކުލަބުން ފެށުން ރަނގަޅުކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުން ޓެންޓް މޮޅުވީ 1-0 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ޓެންޓުގެ އަޙްމަދު ރިލްވާނަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އެކަމަކު މި ހާފުގައި ލަނޑެއް ޖަހަން އެންމެ ރަނގަޅު ފުރުސަތެއް ލިބުނީ ބީޖީއަށެވެ. އެގޮތުން ފުރަތަމަ ހާފުގެ ފަހުކޮޅު ބީޖީއަށް ޕެނަލްޓީއެއް ލިބުނު ނަމަވެސް، އެ ޓީމުގެ މުޒްދާން ހަސަން ފޮނުވާލި ޕެނަލްޓީ ޓެންޓުގެ ގޯލްކީޕަރު މުޙައްމަދު ޝިފާން ވަނީ ދިފާއުކޮށްފައެވެ. މިއީ އޭރިއާ ތެރެއިން ބީޖީގެ ކެޕްޓަން މިގުދާދް ސައީދަށް، ޓެންޓުގެ ބިދޭސީ ކުޅުންތެރިޔާ އަޙްމަދު މަޙްމޫދު ކުރި ފައުލަކަށް ރެފުރީ ދިން ޕެނަލްޓީއެކެވެ.
މި މެޗުގައި ޓެންޓުން ލީޑު ނަގާފައިވަނީ މެޗުގެ 79 ވަނަ މިނެޓުގައެވެ. ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު މުޙައްމަދު އަހަދުﷲ އެވެ. އެކަމަކު ޓެންޓުން މި މެޗު ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗުގެ ފަހު މިނެޓުގައި އެ ޓީމުގެ ހުސެއިން މިފްރާހް ވަހީދަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.
މި މޮޅާއެކު ގްރޫޕް ބީގެ ފެށުން ޓެންޓުން ރަނގަޅުކުރިއިރު، މި ފަހަރުގެ މުބާރާތް ކުރިއަށްދަނީ ތިން ގުރޫޕަކަށް ބަހާލައިގެންނެވެ. މި މުބާރާތުގައި ޖުމްލަ 15 ޓީމެއް ވަނީ ބައިވެރިވެފައެވެ.