ވަރުގަދަ ޓީމަކާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްކަމުގެ ކެންޑިޑެސީ ފޯމު ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) ހުށަހަޅުއްވައިފިއެވެ.
"ޕީއެސްއެމް ސްޕޯޓްސް" އަށް މަޢުލޫމާތު ލިބިފައިވާގޮތުގައި ޓޮމް ކެންޑިޑެންސީ ފޯމު ހުށަހެޅުއްވީ ޓީސީ ސްޕޯޓްސް ކުލަބުގެ ފަރާތުންނެވެ. އަދި އެ ނަމަށް އެއްބާރުލުން ދީފައިވަނީ ކުލަބު ވެލެންސިއާއިންނެވެ.
ޓޮމްގެ ޓީމުގައި ނައިބު ރައީސުންގެ ގޮތުގައި ހުށަހެޅުއްވީ ރާއްޖޭގެ ކުރީގެ އެއްވަނަ ގޯލްކީޕަރު އިމްރާން މުޙައްމަދާއި، މާޒިޔާ ސްޕޯޓްސް އެންޑް ރެކްރިއޭޝަނުގެ ސީއީއޯ ހުސެއިން ޝާފިއުއެވެ. އަދި ހިންގާ ކޮމިޓީއަށް ހުށަހެޅުއްވި ނަންތަކަކީ އެފްއޭއެމުގެ ކުރީގެ ޖެނެރަލް ސެކްރެޓަރީ އަބްދުލްހަމީދު އަބްދުލްޣަފޫރު (އައްޑޯ) އާއި އެފްއޭއެމުގެ ކުރީގެ އިންޓަރިމް ރައީސް އަޙްމަދު ޝާހިރުގެ އިތުރުން މަހިބަދޫގެ އުލާ އިބްރާހީމާއި، ޓީސީގެ މުޙައްމަދު މިފްތާޙު އާއި، އަލީ ރިޒްވާން އަދި އަބްދުﷲ ނާސިޙެވެ.
ރައްޔިތުންގެ މަޖިލީހުގެ އދ. މަހިބަދޫ ދާއިރާގެ މެންބަރުކަންވެސް ކުރައްވަމުން އަންނަ ޓޮމް ވަނީ މީގެ ކުރިންވެސް އެފްއޭއެމުގެ ރައީސްގެ މަގާމު ފުރުއްވާފައެވެ. އެގޮތުން އެފްއޭއެމުގެ ރައީސްގެ މަގާމުގައި އޭނާ މަސައްކަތްކުރެއްވީ 2016 ވަނަ އަހަރުގެ މެއި މަހު ބޭއްވި އިންތިޚާބު ކާމިޔާބުކުރައްވައިގެންނެވެ. އެކަމަކު އެ މަގާމުގައި ޓޮމް މަސައްކަތްކުރައްވާފައިވަނީ ހަތަރު މަހަށްވުރެ ކުރު މުއްދަތަކަށެވެ.
އެގޮތުން އެ އަހަރުގެ ސެޕްޓެމްބަރު މަހު ތެރޭގައި ޓޮމް އާއެކު އިންތިޚާބުވި ހިންގާ ކޮމިޓީގެ ފަސް މެންބަރުން އިސްތިއުފާދެއްވުމާ ގުޅިގެން، އެ އެސޯސިއޭޝަނުގެ އަސާސީ ގަވާއިދާ އެއްގޮތަށް އައު އިންތިޚާބެއް ވަނީ ބާއްވާފައެވެ. އެ އިންތިޚާބުގައި ޓޮމްއާ ވާދަކުރައްވައި ކާމިޔާބު ހޯއްދެވީ މިހާރު އެ އިދާރާގެ ރައީސް ބައްސާމް އަދީލް ޖަލީލެވެ.
ފުޓްބޯޅައިގެ ހަރަކާތްތަކުން ދުރުގައި ހުރި ނަމަވެސް ކީޕަރު އިމްރާން ދަނީ އޭނާގެ އުފަން ރަށް ކަމަށްވާ މަހިބަދޫގައި ފުޓުބޯޅައިގެ ހަރަކާތްތައް ހިންގަމުންނެވެ. އަދި ޝާފިއު އަކީ މިހާރުގެ އެފްއޭއެމުގެ ރައީސް ބައްސާމުގެ އެކްސްކޯގައި ހިމެނިވަޑައިގެންނެވި މެމްބަރެކެވެ. ނަމަވެސް އޭނާ ވަނީ މީގެ ދެ މަހެއްހާ ދުވަސް ކުރިން އިސްތިއުފާދެއްވާފައެވެ.
އެފްއޭއެމުން މި މަހުގެ 17 ވަނަ ދުވަހު ނެރުނު ނޫސް ބަޔާނެއްގައި ބުނެފައިވަނީ އެ އިދާރާގެ ހިންގާ ކޮމެޓީގެ 20 ވަނަ ބައްދަލުވުމުގައި އަސާސީ ގަވާއިދާ އެއްގޮތްވާ ގޮތުގެ މަތިން 45 ދުވަހުގެ ތެރޭގައި އައު އިންތިޚާބެއް ބޭއްވުމަށް ނިންމާފައިވާ ކަމަށެވެ. އެހެންކަމުން އެގޮތަށް ހިންގާ ކޮމެޓީން ނިންމުމުން، އަންނަ ޖެނުއަރީ މަހުގެ 31 ވާ ބުދަ ދުވަހު އިންތިޚާބު ބޭއްވުމަށް ހަމަޖައްސާ އިއުލާންކުރާ ކަމަށްވެސް ވަނީ ބުނެފައެވެ.