ވޮލީބޯލް އެސޯސިއޭޝަން ކަޕުގެ ފިރިހެން ޑިވިޝަނުގައި މުޅިން އަލަށް ވާދަކުރި ސިޓީ ސްޕޯޓްސް ކުލަބުން މުބާރާތުގެ ތަށި އުފުލާލައިފިއެވެ.
ޒުވާނުންގެ މަރުކަޒުގެ އެތެރޭ ކޯޓުގައި މިރޭ ކުޅުނު ފައިނަލް މެޗު ސިޓީ ސްޕޯޓްސްއިން ކާމިޔާބުކުރީ ކުލަބް ވެމްކޯއާ ވާދަކޮށް ފަސޭހަކަމާއެކު ސީދާ ތިން ސެޓުންނެވެ. މި މެޗުގެ ސެޓުތައް ސިޓީ ސްޕޯޓްސް ކުލަބުން ގެންދިޔައީ 28-26، 25-17 އަދި 25-22 އިންނެވެ.
ކޯޗު މުޙައްމަދު ޝަރަފުގެ އިރުޝާދުގެ ދަށުުން މި ފަހަރުގެ މުބާރާތުގައި ތަފާތު ދެއްކި ސިޓީ ސްޕޯޓްސްގައި އިންޑޯ ކޯޓަށް މުޅިން އައު ގިނަ ކުޅުންތެރިންތަކެއް ހިމެނުނެވެ. އެ ޓީމުން ވަނީ މި މުބާރާތުގެ ސެމީ ފައިނަލުގައި ތަޖުރިބާކާރު ގިނަ ކުޅުންތެރިންތަކާއެކު ނުކުތް ކުލަބު އާބަންކޯވެސް ބަލިކޮށްފައެވެ.
މި މުބާރާތުގެ ޑްރީމް ޓީމުގައި ހިމެނުނީ ސިޓީ ސްޕޯޓްސްގެ އަލީ ނިމާލާއި، އަޙްމަދު ފާޒިލުގެ އިތުރުން ވެމްކޯގެ ހުސެއިން ޔޫސުފާއި، އަލީ ހުޒާމް (ހުޒާންޓެ) އާއި، އަޙްމަދު ނަބީލް އަދި އާބަންކޯގެ އާދަމް ފައިރޫޒާއި އިސްމާޢީލް ސާޖިދު (ކުޑަ ކާއްޓޭ) އެވެ.
އެންމެ އުއްމީދީ ކުޅުންތެރިއަކަށް ޕޮލިސް ކުލަބުގެ މުޙައްމަދު ލަތުފާން އަލީ ހޮވުނުއިރު، މުޅި މުބާރާތުގެ މޮޅު ކުޅުންތެރިއަކީ ސިޓީ ސްޕޯޓްސްގެ ފާޒިލެވެ. މީގެ އިތުރުން އެންމެ މޮޅު ކޯޗަކަށް ހޮވުނީ ސިޓީ ސްޕޯޓްސްގެ ކޯޗު ޝަރަފެވެ. މި މުބާރާތުގެ ތިންވަނަ ޓީމަކީ އާބަންކޯ އެވެ.