އެމްޕީއޭލް ދެވަނަ ޑިވިޝަން ފުޓްބޯޅަ މުބާރާތުގެ ފުރަތަމަ މެޗުގައި ފަސޭހަކަމާއެކު މަހިބަދޫ ސްޕޯޓްސް ކުލަބު ބަލިކޮށް، މަސްއޮޑި ސްޕޯޓްސް ކުލަބުން ފެށުން ރަނގަޅުކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު މަސްއޮޑިން ކާމިޔާބުކުރީ 4-0 ގެ ނަތީޖާއަކުންނެވެ.
މި މެޗުގައި ގިނައިރު ބޯޅަ ގެންގުޅެ މަސްއޮޑިން ގިނަ ހަމަލާ އުފެއްދިއިރު، މެޗުގެ ކުރީކޮޅު މަހިބަދޫގެ ގޯލްކީޕަރު އަޙްމަދު ނައުފަލް ވަނީ ރަނގަޅު ހަމަލާތަކެއް ދިފާއުކޮށްފައެވެ. އެކަމަކު މެޗުގެ 38 މިނެޓުގައި މަސްއޮޑިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އިބްރާހީމް ވަހީދު ހަސަން (އިއްބެ) އެވެ. މިއީ އޭނާ މި ސީޒަނުގައި ކުޅުނު ރަސްމީ ފުރަތަމަ މެޗެވެ.
މި މެޗުގެ ދެވަނަ ހާފުގައި ފުރަތަމަ ހަމަލާ އުފެއްދީ މަހިބަދޫންނެވެ. އެގޮތުން ދެވަނަ ހާފުގެ ކުރީކޮޅު މަހިބަދޫގެ އަބްދުﷲ އައްޒާމް ފޮނުވާލު ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. މި މެޗުގައި މަސްއޮޑިން ލީޑު ފުޅާކުރީ މެޗުގެ 73 ވަނަ މިނެޓުގައި އަބްދުﷲ ޒިޔާން ކާމިޔާބުކުރި ލަނޑުންނެވެ.
އޭގެ ދެ މިނެޓު ފަހުން އެ ޓީމުގެ ތިންވަނަ ލަނޑު ލިބުނު ޕެނެލްޓީއަކުން ކާމިޔާބުކޮށްދިނީ ބިދޭސީ ކުޅުންތެރިޔާ އިސްލާމް ފިކްރީއެވެ. އަދި މަސްއޮޑީގެ ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ހުސެއިން ޝަރީފެވެ.
މި މުބާރާތުގެ ގްރޫޕް އޭގައި ކުޅުނު ފުރަތަމަ މެޗުން މަސްއޮޑި މޮޅިވިއިރު، މުބާރާތް ކުރިއަށްދަނީ ތިން ގުރޫޕަކަށް ބަހާލައިގެންނެވެ. މި އަހަރުގެ މުބާރާތުގައި ޖުމްލަ 15 ޓީމެއް ވަނީ ބައިވެރިވެފައެވެ.