ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމިޓީގެ ތިން މެންބަރަކު މިއަދު އިސްތިއުފާދެއްވި ނަމަވެސް، ރައީސްގެ މަގާމު ބައްސާމް އަދީލް ޖަލީލަށް ނުގެއްލޭ ކަމަށް އެ އިދާރާގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވިދާޅުވެއްޖެއެވެ.
މިއަދުގެ ވަގުތެއްގައި އިސްތިއުފާގެ ސިޓީ އެފްއޭއެމަށް ހުށަހަޅާފައިވަނީ ހިންގާ ކޮމިޓީގައި ހިމެނިވަޑައިގަންނަވާ ދަ ގްރާންޑޭ ސްޕޯޓްސް ކުލަބުގެ މުޙައްމަދު ޝިފާއު އާއި، ޓީސީ ސްޕޯޓްސް ކުލަބުގެ މުއައްސިސް އަޙްމަދު ނަޝީދު (ޑޭވް) އަދި ހިންގާ ކޮމިޓީގައި ހިމެނިވަޑައިގަންނަވާ އަންހެން މެންބަރު އާމިނަތު ޝާނީޒެވެ.
އަދި މީގެ ދެ މަހެއްހާ ދުވަސް ކުރިން އެފްއޭއެމުގެ ނައިބު ރައީސަކަށް ހުންނެވި، މާޒިޔާ ސްޕޯޓްސް އެންޑް ރެެކްރިއޭޝަނުގެ ސީއީއޯ ހުސެއިން ޝާފިއު (ކޮއްކީ) އާއި ހިންގާ ކޮމިޓީގެ މެންބަރު އަދި ކުލަބު ގްރީން ސްްޓްރީޓްސްގެ ރައީސް މުއާވިޔަތު ޚަލީލް ވަނީ މަގާމުން އިސްތިއުފާދެއްވާފައެވެ. އެއާއެކު ބައްސާމުގެ ހިންގާ ކޮމިޓީގައި ހިމެނިވަޑައިގަންނަވާ ފަސް މެންބަރަކު މިވަނީ އިސްތިއުފާދެއްވާފައެވެ.
އެފްއޭއެމުގެ އަސާސީ ގަވާއިދު ބުނާގޮތުން ޖުމްލަ ނުވަ މެމްބަރުންގެ މައްޗަށް އެކުލެވޭ އެފްއޭއެމުގެ ހިންގާ ކޮމިޓީން ފަސް މެންބަރަކު އިސްތިއުފާދެއްވައިނަމަ ކޯރަމް ގެއްލޭނެއެވެ. އެކަމަކު އެފްއޭއެމުން މީގެ ކުރިން ވަނީ ކޮއްކީ އާއި މުއާވިޔަތުގެ އިސްތިއުފާއަށްފަހު، އެ އެސޯސިއޭޝަނުގެ ޑެޕިއުޓީ ޖެނެރަލް ސެކްރެޓަރީއަކަށް ހުންނެވި އަބްދުﷲ ޝިބާއު، ހިންގާ ކޮމިޓީއަށް އައްޔަންކުރައްވާފައެވެ. އެކަމަކު އެ ނިންމުމުގެ ސައްހަކަން ކަނޑައެޅޭނީ އެކްސްޓްރާ އޯޑީނަރީ ކޮންގްރެސްއެއް ބާއްވައިގެން، މެންބަރު ކުލަބުތަކުން ފާސްކޮށްދީގެންނެވެ.
"ޕީއެސްއެމް ސްޕޯޓްސް" އަށް މައުލޫމާތުދެއްވަމުން ޖައުޝަން ވިދާޅުވީ އަސާސީ ގަވާއިދު ބުނާގޮތުން އެފްއޭއެމުގެ ހިންގާ ކޮމިޓީއަށް ޝިބާއު އައްޔަންކުރުމާއެކު، އެކްސްޓްރާ އޯޑީނަރީ ކޮންގްރެސްއެއް ބޭއްވެންދެން ހިންގާ ކޮމިޓީގެ މެންބަރެއްގެ ގޮތުގައި ޝިބާއު ކަނޑައެޅޭނެ ކަމަށެވެ. އެހެންކަމުން އެފްއޭއެމުގެ ކޯރަމް ނުގެއްލޭ ކަމަށްވެސް ވިދާޅުވިއެވެ.
މީގެ އިތުރުން ޖައުޝަން ވަނީ އެފްއޭއެމަށް މިއަދު ލިބުނު އިސްތިއުފާގެ ސިޓީގެ ތާރީޚާ މެދު ފުށުއެރުންތަކެއް ހުރިކަން ފާހަގަކުރައްވާފައެވެ. އެގޮތުން ތިން މެންބަރަކު އިސްތިއުފާދެއްވައި މިއަދުގެ ވަގުތެއްގައި އެފްއޭއެމަށް ސިޓީ ހުށަހެޅުއްވި ނަމަވެސް، އެ ސިޓީތަކުގައި ހިމަނާފައިވާ ތާރީޚަކީ މި މަހު 15 ވަނަ ދުވަސް ކަމަށް ޖައުޝަން ވިދާޅުވިއެވެ. އަދި އޭގެ ތެރެއިން ޝާނީ އާއި ޑޭވް، މި މަހު 17 ވަނަ ދުވަހު ބޭއްވި ހިންގާ ކޮމިޓީގައި ބައްދަލުވުމުގައި ބައިވެރިވިކަންވެސް ޖައުޝަން ވަނީ ފާހަގަކުރައްވާފައެވެ.
ދާދި ފަހުން އެފްއޭއެމުން ވަނީ އެ އިދާރާގެ ހިންގާ ކޮމިޓީގެ 20 ވަނަ ބައްދަލުވުމުގައި އަސާސީ ގަވާއިދާ އެއްގޮތްވާ ގޮތުގެ މަތިން އަންނަ ޖެނުއަރީ މަހުގެ 31 ވަނަ ދުވަހު އައު އިންތިޚާބެއް ބޭއްވުމަށް ނިންމާފައިވާކަން ހާމަކޮށްފައެވެ. އެކަމަކު އެފްއޭއެމުގެ އިންތިޚާބާ ބެހޭ ކަންތައްތަކެއް ސާފުކޮށްދިނުމަށް އެދި، ކޮމިޝަނާ އޮފް ސްޕޯޓްސް މުޙައްމަދު ތޮލާލް ވަނީ އެފްއޭއެމަށް ސިޓީއެއް ފޮނުއްވާފައެވެ.
އެފްއޭއެމުން އައު އިންތިޚާބެއް ބާއްވާނެކަން އިއުލާންކޮށްފައިވާއިރު، އެ އިންތިޚާބުގައި ވާދަނުކުރައްވާނެކަން ބައްސާމް ވަނީ އިއުލާން ކުރައްވާފައެވެ. އެ އިންތިޚާބުގައި ވާދަކުރައްވާނެކަން މިހާތަނަށް އިއުލާންކުރައްވާފައިވަނީ މީގެ ކުރިންވެސް އެ މަގާމު ފުރުއްވި ގައުމީ ޓީމުގެ ކުރީގެ ފޯވާޑް އަދި ރައްޔިތުންގެ މަޖިލީހުގެ އދ. މަހިބަދޫ ދާއިރާގެ މެންބަރު އަޙްމަދު ތޯރިގު (ޓޮމް) އެވެ.