ވޮލީބޯލް އެސޯސިއޭޝަން ކަޕުގެ އަންހެން ޑިވިޝަނުގެ ފައިނަލުގައި ޕޮލިސް ކުލަބު ބަލިކޮށް، ކުލަބު ވެމްކޯއިން ތަށި މިލްކުކޮށްފިއެވެ.
ޒުވާނުންގެ މަރުކަޒުގެ އެތެރޭ ކޯޓުގައި މިރޭ ކުޅުނު ފައިނަލް މެޗު ވެމްކޯއިން ކާމިޔާބުކުރީ ޕޮލިސް އަތުން ސީދާ ތިން ސެޓުންނެވެ.
މިއާއެކު ވެމްކޯއިން ތަށި މިލްކުކުރިއިރު، އެ ޓީމުން ތިން ފަހަރުވެސް ޗެމްޕިއަންކަން ހޯދާފައިވަނީ ޕޮލިސް ބަލިކޮށްގެންނެވެ. އެގޮތުން މި އަހަރުގެ އިތުރުން 2019 ވަނަ އަހަރާއި، މެދުކެނޑުމަކަށްފަހު މިދިޔަ އަހަރު ބޭއްވި މުބާރާތުގެ ފައިނަލުގައިވެސް ވެމްކޯ ވާދަކޮށްފައިވަނީ ޕޮލިސް ކުލަބާއެވެ.
މިރޭ ކުޅުނު ފައިނަލް މެޗު ވެމްކޯއިން ފަސޭހަކަމާއެކު ކާމިޔާބުކުރި ނަމަވެސް، މި މެޗުގެ ފުރަތަމަ ސެޓު ރަނގަޅަށް ފެށީ ޕޮލިހުންނެވެ. އެކަމަކު ވެމްކޯއިން ވަނީ ކުޅުން ރަނގަޅުކޮށް 25-21 އިން މި ސެޓު ކާމިޔާބުކޮށްފައެވެ. އަދި ދެވަނަ ސެޓު ވަރަށް ވާދަވެރިކޮށް ފެނިގެންދިޔައިރު، މި ސެޓު ވެމްކޯއިން ގެންދިޔައީ 25-23 އިންނެވެ. މި މެޗުގެ ތިންވަނަ ސެޓުގައި ވެމްކޯއިން އިތުބާރާއެކު ކުޅުނުއިރު، އެ ޓީމުން ވަނީ 25-17 އިން ސެޓު ކާމިޔާބުކޮށް ޗެމްޕިއަންކަން ހޯދާފައެވެ.
މި މުބާރާތުގެ ޑްރީމް ޓީމުގައި ހިމެނުނީ ވެމްކޯގެ ފާތިމަތު ޖޫޒާން ޒަރީރު، ހައްވާ ނާޒިމާ، އައިޝަތު މާޖިދާ، އާމިނަތު އަރީޝާގެ އިތުރުން ޕޮލިސް ކުލަބުގެ ހައްވާ ރާޝިދާ އާއި އަލްމާ ސްޕޯޓްސް ކުލަބުގެ ހައްވާ ސަޚާއެވެ.
އެންމެ އުއްމީދީ ކުޅުންތެރިއަކަށް ވެމްކޯގެ މާޔާ ހުސެއިން ސޮލާހު ހޮވުނުއިރު، އެންމެ މޮޅު ބިދޭސީ ކުޅުންތެރިއަކީ އެ ޓީމުގެ ޖެސިކާ ސޮއަރޭސްއެވެ. އަދި މުޅި މުބާރާތުގެ މޮޅު ކުޅުންތެރިއަކީ ވެމްކޯގެ މާޖިދާއެވެ. މީގެ އިތުރުން އެންމެ މޮޅު ކޯޗަކަށް ހޮވުނީ ވެމްކޯގެ ޚާލިދު މުޙައްމަދެވެ. މި މުބާރާތުގެ ތިންވަނަ ޓީމަކީ އަލްމާ ސްޕޯޓްސް ކުލަބެވެ.