ރާއްޖޭގައި ކުޅެމުންދާ ކޮންމެ ކުޅިވަރަކީވެސް މުހިންމު ކުޅިވަރެއް ކަމަށާއި، ވަކި ކުޅިވަރެއް ތަފާތުކުރުމުގެ ސިޔާސަތެއް ނުގެންގުޅުއްވާނެ ކަމަށް ކުޅިވަރާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަފުޅު ދައްކަވަމުން ވަޒީރު ވިދާޅުވީ ރާއްޖޭގައި ވަރަށް ގިނަ ކުޅިވަރުތަކަކީ ގިނަ އެތުލީޓުންގެ ބައިވެރިވުމާއި، އަދި ކުލަބުތަށް ބައިވެރިވުން އޮވެގެން ކުރިއަށްދާ ކުޅިވަރުތަށް ކަމަށާއި، އަދި އެ ކުޅިވަރެއްގައި ވާދަކުރާ އެތުލީޓުން މަދު ނަމަވެސް، އެ ކުޅިވަރުން ބޭނުންވާ އެހީތެރިކަން ބޭނުންވާ މިންވަރަކަށް ފޯރުކޮށްދެވާނެ ކަމަށެވެ.
އެހެން ނަމަވެސް ރާއްޖޭގެ އެންމެ މަގުބޫލް ކުޅިވަރުތައް، އެންމެ ގިނަ އެތުލީޓުން ވާދަކުރާ ކުޅިވަރުތައް އަދި އެންމެ ގިނަ މުބާރާތްތައް ބާއްވާ ކުޅިވަރުތަކައް ޚަރަދުކުރުން އިތުރު ވާނެ ކަމަށް ވިދާޅުވިއެވެ. އަދި މިކަން ރާއްޖޭގެ ކުޅިވަރު ކޮމިއުނީޓީން ބަލައިގަންނާނެ ކަމަށްވެސް ވަޒީރު ވިދާޅުވިއެވެ.
"އަޅުގަނޑަކަށް އަދި އަޅުގަނޑުގެ މުވައްސަސާއަށްވެސް ވަކި ކުޅިވަރެއް މުހިންމެއް ނުވާނެ. ޚަރަދުކުރެވޭ ވަރު ޑިޕެންޑް ވާނީ ޕާފޯމްކުރާ ވަރަކަށް.ޢަބްދުﷲ ރާފިޢު - ކުޅިވަރާ ބެހޭ ވަޒީރު
ވަޒީރު ވިދާޅުވީ ކިތަންމެ މަދު އެތުލީޓެއް އެކުޅިވަރެއްގައި އުޅުނު ނަމަވެސް، އަދި ހަމަ އެހެންމެ މަދުން މުބާރާތްތައް ބޭއްވުނު ކަމުގައި ވިޔަސް، ވިސްނުންފުޅަކީ އެންމެން މަސައްކަތް ކޮށްގެން މުބާރާތްތައް އިތުރުކޮށް، ކުޅިވަރުގައި ޝާމިލުވާ އަދަދު އިތުރުކުރުން ކަމަށެވެ.
އަދި ކުޅިވަރު އިދާރާއަކަށްވެސް ވަކި ކުޅިވަރެއް މުހިންމު ނޫން ކަމަށާއި، އެހެންނަމަވެސް ޚަރަދު ކުރެވޭވަރު ކަނޑައެޅިގެންދާނީ އެ ކުޅިވަރަކުން ދައްކާ ޕާފޯމެންސްއިން ކަމަށްވެސް ވަނީ ވިދާޅުވެފައެވެ.