އިނގިރޭސި ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑް އަތުން 2-0 ގެ ނަތީޖާއަކުން ބަލިވެ، މެންޗެސްޓާ ޔުނައިޓެޑުގެ ބަލިވުމުގެ ސިލްސިލާއަށް ބޮޅެއް އިތުރުވެއްޖެއެވެ.
ވެސްޓް ހޭމުގެ ދަނޑުގައި ކުޅުނު މި މެޗުގެ ފުރަތަމަ ހާފުގައި އެއްވެސް ލަނޑެއް ފެނިފައެއް ނުވެއެވެ. މި ހާފުގައި ޔުނައިޓެޑުގެ އަލެހަންޑްރޯ ގަނާޗޯއަށް ލަނޑު ޖަހަން ރަނގަޅު ފުރުސަތެއް ލިބުނު ނަމަވެސް، ވެސްޓް ހޭމުގެ ކީޕަރު އަރެއޯލާ ވަނީ އެ ބޯޅަ ހުށިޔާރުކަމާއެކު ދިފާއުކޮށްފައެވެ.
މި ަމެޗުގައި ފެނިގެންދިޔަ ފުރަތަމަ ލަނޑު ވެސްޓް ހޭމުން ކާމިޔާބުކޮށްފައިވަނީ މެޗުގެ 72 ވަނަ މިނެޓުގައެވެ. ލޫކަސް ޕަކޭޓާ ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ ޖެރަޑް ބޮވެންއެވެ. އޭނާ މި ލަނޑު ކާމިޔާބުކޮށްފައިވަނީ ޕެނަލްޓީ އޭރިއާ ތެރެއަށް ވަނުމަށްފަހު ފޮނުވާލި ހަމަލާއަކުންނެވެ. މި މެޗުން ވެސްޓް ހޭމަށް ތިން ޕޮއިންޓް ކަށަވަރުކޮށްދިން ލަނޑު ކާމިޔާބުކޮށްދިނީ ފުރަތަމަ ލަނޑު ޖެހިތާ ހަ މިނެޓު ފަހުން މުހައްމަދު ކުޑުސްއެވެ.
ޔުނައިޓެޑުގެ ދަށް ފޯމާއެކު ގިނަ ބައެއްގެ ފާޑުކިޔުން އެ ޓީމަށް ވަނީ އަމާޒުވެފައެވެ. ލީގުގައި ޔުނައިޓެޑް އެންމެ ފަހުން ކުޅުނު ފަސް މެޗުގެ ތެރެއިން މޮޅުވެފައިވަނީ އެންމެ މެޗަކުންނެވެ. އޭގެތެރެއިން ތިން މެޗުން ވަނީ ބަލިވެފައެވެ.
ޔުނައިޓެޑް އަތުން ހޯދި މޮޅާއެކު ވެސްޓް ހޭމް އޮތީ ތާވަލުގެ ހަތްވަނައިގައެވެ. އެއީ ކުޅުނު 18 މެޗުން ލިބުނު 30 ޕޮއިންޓާއެކުއެވެ. ޔުނައިޓެޑް އޮތީ 28 ޕޮއިންޓާއެކު ތާވަލުގެ އަށްވަނައިގައެވެ. މިއީ ލީގުގައި ޔުނައިޓެޑް ބަލިވި އަށްވަނަ މެޗެވެ.
ލީގުގައި ޔުނައިޓެޑުން ދެން ބައްދަލުކުރާނީ ތާވަލުގެ ދެވަނައިގައި އޮތް އެސްޓަން ވިލާއާއެވެ. އަދި ވެސްޓް ހޭމް ނުކުންނާނީ އެއްވަނައިގައި އޮތް އާސެނަލާ ދެކޮޅަށެވެ.