ލިވަޕޫލް ބަލިނުކުރެވުނަސް އާސެނަލަށް އަދިވެސް އެއްވަނަ

އިނގިރޭސި ޕްރިމިއާ ލީގުގައި ރޭ ލިވަޕޫލާ 1-1 ގެ ނަތީޖާއަކުން އެއްވަރުވެ، ތާވަލުގެ އެއްވަނަ އާސެނަލުން ދަމަހައްޓައިފިއެވެ.

ލިވަޕޫލް ދަނޑުގައި ކުޅުނު މި މެޗުގައި އާސެނަލުން ލީޑު ނެގީ ހަވަަނަ މިނެޓުގައި ގަބްރިއެލް މަގާޅައެސް ބޮލުން ޖެހި ލަނޑުންނެވެ. މިއީ ހިލޭ ޖެހުމަކުން އާސެނަލުގެ ކެޕްޓަން މާޓިން އޮޑެގާޑް ނެގި ބޯޅައަކުން ޖެހި ލަނޑެކެވެ. އޭގެ ފަހުން، އޮޑެގާޑް އަތުގައި ޖެހުނު ބޯޅައަކަށް ޕެނަލްޓީއެއް ހޯދަން ލިވަޕޫލުން ކުރި އެޕީލް ކާމިޔާބެއް ނުވިއެވެ.

މި މެޗުގައި ލިވަޕޫލުން އެއްވަރުކުރީ 30 ވަނަ މިނެޓުގައި މުހައްމަދު ސަލާހު ޖެހި ލަނޑުންނެވެ. މިއީ ޓްރެންޓް އަލެކްޒެންޑަ-އާނޯލްޑް ދިން ބޯޅައަކުން ސަލާހު ޖެހި މޮޅު ލަނޑެކެވެ. މި ލަނޑާއެކު ސަލާހު ވަނީ ޕްރިމިއާ ލީގުގައި 151 ލަނޑު ހަަމަކޮށް، ލީގު ތާރީޚުގައި އެންމެ ގިނަ ލަނޑު ޖެހި ގަދަ 10 ކުޅުންތެރިންގެ ތެރެެއިން ޖާގަ ހޯދާފައެވެ.

ލީގުގައި ރޭ ކުޅުނު އެހެން މެޗުތަކުގެ ނަތީޖާތަކަށް ބަލާއިރު، ފުލަމް ދަނޑުގައި ބާންލީން ވަނީ 2-0 ގެ ނަތީޖާއަކުން މޮޅުވެފައެވެ. އަދި ލޫޓަންއިން 1-0 ގެ ނަތީޖާއަކުން ނިއުކާސަލް ޔުނައިޓެޑް ބަލިކުރިއިރު، ނޫނޯ އެސްޕިރީޓޯ ސަންޓޯގެ ކޯޗުކަމުގައި ނޮޓިންހަމް ފޮރެސްޓް ކުޅުނު ފުރަތަމަ މެޗުން ބޯންމަތު އަތުން ބަލިވީ 3-2 ގެ ނަތީޖާއަކުންނެވެ.

ރޭ ލިވަޕޫލް ދަނޑުގައި ކުޅެގެން ހޯދި ޕޮއިންޓަކާއެކު، އާސެނަލް އޮތީ ތާވަލުގެ އެއްވަނައިގައެވެ. އެއީ 18 މެޗުން 40 ޕޮއިންޓް ހޯދައިގެންނެވެ. ދެވަނައިގައި ލިވަޕޫލް އޮތީ 18 މެޗުން 39 ޕޮއިންޓް ހޯދައިގެންނެވެ. ތިންވަނައިގައި އޮތް އެސްޓަން ވިލާއަށްވެސް ވަނީ 18 މެޗުން 39 ޕޮއިންޓު ލިބިފައެވެ. ހަތަރެއްގައި އޮތީ ރޭ އެވަޓަން އަތުން 2-1 ގެ ނަތީޖާއަކުން މޮޅުވެ، 18 މެޗުން 36 ޕޮއިންޓް ހޯދާފައިވާ ޓޮޓްނަމް ހޮޓްސްޕާއެވެ. އެންމެ ފަހުގެ ޗެމްޕިއަން، މެންޗެސްޓާ ސިޓީ މިހާރު ފަސްވަނައިގައި އޮތީ 17 މެޗުން 34 ޕޮއިންޓާއެކުއެވެ.