އިނގިރޭސި ލީގު ކަޕުގެ ކުއާޓާ ފައިނަލުގައި ޕެނަލްޓީ ޖަހައިގެން ނިއުކާސަލް ޔުނައިޓެޑް ބަލިކޮށް، މުބާރާތުގެ ސެމީ ފައިނަލުގެ ޖާގައެއް ޗެލްސީން ހޯދައިފިއެވެ.
ޗެލްސީގެ ދަނޑުގައި ރޭ ކުޅުނު މެޗުގެ ފުރިހަމަ ވަގުތު ހަމަވިއިރު، ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. އެއާއެކު ނަތީޖާ ނެރުމަށް ޖެހި ޕެނަލްޓީގައި ޗެލްސީ ކުރިހޯދީ 4-2 ގެ ނަތީޖާއަކުންނެވެ.
ރޭގެ މެޗުގެ ވަރަށް ކުރީކޮޅު ނިއުކާސަލުން ވަނީ ލީޑު ނަގާފައެވެ. މެޗު ފަށައިގެން 16 ވަނަ މިނެޓުގައި ޗެލްސީގެ ފަހަތުން ހެދުނު ގޯހެއްގެ ފައިދާ ނަގައި މި ލަނޑު ނިއުކާސަލަށް ކާމިޔާބުކޮށްދިނީ ތަޖުރިބާކާރު ފޯވާޑް ކަލުމް ވިލްސަންއެވެ. މި ލަނޑާއެކު މި މެޗުން ނިއުކާސަލް މޮޅުވަން ދަނިކޮށް، ޗެލްސީން ނަތީޖާ އެއްވަރުކޮށްފައިވަނީ މެޗުގެ އިތުރު ވަގުުތުގެ ދެވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މިކައިލޯ މުޑްރިކެވެ.
އެއާއެކު ނަތީޖާ ނެރުމަށް ޕެނަލްޓީ ޖެހިއިރު، ޗެލްސީ ވަނީ ހަތަރު ޕެނަލްޓީވެސް ކާމިޔާބުކޮށްފައެވެ. އެކަމަކު ނިއުކާސަލުގެ ހަތަރު ޕެނަލްޓީގެ ތެރެއިިން އެ ޓީމަށް ކާމިޔާބު ކުރެވުނީ ދެ ޕެނަލްޓީއެވެ. އެގޮތުން އެ ޓީމުގެ ކިއެރަން ޓްރިޕިއޭ ފޮނުވާލި ޕެނަލްޓީ ގޯލާ އަމާޒުނުވެ ބޭރަށް ދިޔައިރު، މެޓް ރިޗީ ފޮނުވާލި ޕެނަލްޓީ ޗެލްސީގެ ގޯލްކީޕަރު ޖޯޖޭ ޕެޓްރޮވިޗް ވަނީ ހުޝިޔާރުކަމާއެކު ދިފާއުކޮށްފައެވެ.
މި މޮޅާއެކު މި މުބާރާތުގެ ސެމީއަށް ޗެލްސީ ދަތުރުކުރިއިރު، ރޭ ކުޅުނު ކުއާޓާ ފައިނަލް އަނެއް މެޗުގައި ފުލަމުން ވަނީ ޕެނަލްޠީގައި އެވަޓަން ބަލިކޮށް ސެމީގެ ޖާގައެއް ހޯދާފައެވެ. އަދި މިޑްލްސްބްރާއިން ވަނީ 3-0 ގެ ނަތީޖާއަކުން ޕޯޓް ވޭލް ބަލިކޮށް ސެމީއަށް ދަތުރުކޮށްފައެވެ.