މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން މި އަހަރު ބޭއްވި އެންމެ ފަހު މުބާރާތް ކަމަށްވާ 9 ބޯލް އެސޯސިއޭޝަން ކަޕުގެ ޗެމްޕިއަންކަން އަހުސަން ހާޝިމް ހޯދައިފިއެވެ.
ގައުމީ ބިލިއާޑް ސެންޓަރުގައި ކުރިއަށްދިޔަ މި މުބާރާތުގެ ޗެމްޕިއަންކަން އަހުސަން ހޯދީ ފައިނަލުގައި މުޙައްމަދު ދުންޔާޒާއި ވާދަކޮށް 5-11 ފްރޭމުން މެޗު ކާމިޔާބުކޮށްގެންނެވެ.
ފައިނަލު ކުރިއަށްދިޔައީ ރޭސް ޓު 11 ފްރޭމަށެވެ. ގޭމުގެ ކުރީކޮޅު ދުންޔާޒާއި އަހުސަން ފެނުނީ ދާދި ހަމަހަމަކޮށެވެ. ނަމަވެސް އަހުސަން ވަނީ ފަހުކޮޅު ދެއްކި ހިތްވަރާއެކު ކާމިިޔާބުކުރި ފްރޭމްތަކުން މި މެޗު ކާމިޔާބުކޮށްފައެވެ.
ޖުމްލަ 73 ކުޅުންތެރިން ވާދަކުރި މި މުބާރާތް ކުރިއަށް ގެންދިޔައީ 16 ގުރޫޕަކަށް ބަހާލައިގެންނެވެ. ނޮކައުޓް ބުރު ކުރިއަށް ގެންދިޔައީ ކޮންމެ ގުރޫޕަކުން އެންމެ މޮޅު ދެ ކުޅުންތެރިންނާ އެކު އެވެ.
މުބާރާތުގެ ފައިނަލަށް އަހުސަން ދަތުރުކޮށްފައިވަނީ ސެމީ ފައިނަލުގައި އަލީ ފަޔާޒް ބަލިކޮށްގެންނެވެ. އަދި ދުންޔާޒް ފައިނަލަށް ދަތުރުކުރީ ސެމީ ފައިނަލުގައި ފަތުހުﷲ ޖަމީލް ބަލިކޮށްގެންނެވެ.
އަހުސަން ވަނީ މި އަހަރު އޮތް 9 ބޯލް ޗެމްޕިއަންޝިޕުވެސް ކާމިޔާބުކޮށްފައެވެ. އަދި 2021 ވަނަ އަހަރުގެ އެސޯސިއޭޝަން ކަޕުވެސް ކާމިޔާބުކޮށްފައިވެއެވެ.