ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރާކާރުގެ ފުރަތަމަ 14 ހަފުތާގެ ތެރޭގައި ރާވާފައިވާ މަގުޗާޓުގައި ހިމެނޭ ފުޓްސަލް އާއި ނެޓްބޯޅަ އެރީނާގެ ކޮންސެޕްޓް ޑިޒައިންކުރުމުގެ މަސައްކަތް ނިންމާލައިފިއެވެ.
ޕީއެސްއެމުން ގެނެސްދިން "ހަފުތާ 14" ޕްރޮގްރާމުގައި ވާހަދައްކަވަމުން ކުޅިވަރާއި ހަށިހެޔޮ ކަމާބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޒް ވިދާޅުވީ އެ ދެ މަޝްރޫއުގައިވެސް މިހާރު ކޮންސެޕްޓް ޑިޒައިނިންގެ މަސައްކަތް ނިންމާލެވިފައިވާ ކަމަށާއި، މިހާރު ކުރިއަށްދަނީ އެކަންކުރަން ބޭނުންވާނެ ބިން ކަނޑައެޅުމުގެ މަސައްކަތް ކަމަށެވެ. އަދި ހަފުތާ 14 ގައި ހިމެނޭ މަޝްރޫއުތަކުގެ ދަށުން އެ ދެ އެރީނާވެސް ގާއިމުވެގެންދާނީ މާލެ ސަރަހައްދުގައި ކަމަށްވެސް ވިދާޅުވިއެވެ.
ރިޔާޒް ވިދާޅުވީ ބޭނުންވާ ބިން ކަނޑައެޅުމުން އަމަލީ މަސައްކަތް ފެށިގެން ކުރިއަށްދާއިރު، އެއަށްފަހު މަޝްރޫއު ޓެންޑާކުރުމަށް ފޮނުވާލެވޭނެ ކަމަށެވެ. އަދި ކޮންސެޕްޓް ޑިޒައިންކޮށް ނިންމާލާފަވާއިރު، ކޮންމެ އެރިނާއެއްގައިވެސް މަދުވެގެން ފަސް ޕިޗު ހިމެނެނޭ ކަމަށްވެސް ވިދާޅުވިއެވެ.
ރިޔާޒް ވިދާޅުވީ ބިން ކަނޑައެޅުމުން ތަފްސީލު ކުރެހުންތަކާއެކު މަސައްކަތް ނިންމާލެވޭނެ އަންދާޒާ ތާރީޚެއް އެނގިގެންދާނެ ކަމަށެވެ. އެހެން ނަމަވެސް މިވަގުތު އެންމެ ބޮޑު އަމާޒަކީ ހަފުތާ 14 ގެ ތެރެއިން މި ދެ އެރީނާގެވެސް އަމަލީ މަސައްކަތް ފެށުން ކަމަށްވެސް ވިދާޅުވިއެވެ.
"މި ވަގުތު ކުރެވެމުން މިދަނީ މިކަމަށް ބިން ކަނޑައެޅުމުގެ މަސައްކަތް. ހަފުތާ 14 އެކުލަވާލާފައިވާ ގޮތުން މާލެ ސަރަހައްދުގައި މިކަން ގާއިމުކުރެވިގެން މި ދަނީ.މުޙައްމަދު ރިޔާޒް - ކުޅިވަރާއި ހަށިހެޔޮ ކަމާބެހޭ ވުޒާރާގެ ސްޓޭޓް މިނިސްޓަރު
ހަފުތާ 14 ތެރޭގައި ހިމެނޭ ފުޓްސަލް އާއި ނެޓްބޯޅަ އެރީނާގެ ކޮންސެޕްޓް ޑިޒައިން ނިންމާލިއިރު، ކުޅިވަރު ކުޅޭތަންނާއި ދަނޑުތަކުގައި މިނިމަން ހެލެތް ރިކުއާމެންޓް ކަނޑައެޅުމުގެ އޫސޫލުގެ މަސައްކަތް ނިންމައި، ދުޅަހެޔޮ ޖީލެއް ބިނާކުރަމަށް ތައްޔާރުކުރާ "ފިޓް މޯލްޑިވިސް ޕޯޓަލް" ސޮޕްޓްވެއާގެ ތަފްސީލުތައްވެސް މީގެ ކުރިން ވަނީ ނިންމާލާފައެވެ.