ޔުއެފާ ޗެމްޕިއަންސް ލީގުގެ ގުރޫޕް އެފްގައި ރޭ ނިއުކާސަލް ޔުނައިޓެޑް ބަލިކޮށް ޔޫރޮޕާ ލީގުގެ ޖާގައެއް އޭސީ މިލާނުން ހޯދައިފިއެވެ.
ނިއުކާސަލްގެ ދަނޑުގައި ކުޅުނު މެޗު މިލާނުން ކާމިޔާބުކުރީ ފަހަތުން އަރައި 2-1 ގެ ނަތީޖާއަކުންނެވެ.
ރޭގެ މެޗުގައި ފުރަތަމަ ލަނޑު ޖަހާ ލީޑު ނެގީ ނިއުކާސަލްއިންނެވެ. މެޗުގެ 33 ވަނަ މިނެޓުގައި ލެވިސް މިލީ ދިން ބޯޅައަކުން މި ލަނޑު ކާމިޔާބުކޮށްދިނީ ޖޯލިންޓަންއެވެ.
ނަމަވެސް ދެވަނަ ހާފު ފަށައިގެން 14 ވަނަ މިނެޓުގައި މިލާނުން ވަނީ ނަތީޖާ ހަމަހަމަކޮށްފައެވެ. އޮލިވިއޭ ޖިރޫޑް އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ކްރިސްޓިއަން ޕުލިސިކެވެ. އަދި މެޗުގެ 84 ވަނަ މިނެޓުގައި ނޮއާގެ އެހީތެރިކަމާއެކު ސެމުއެލް ޗުކުވޭޒީ ވަނީ ލަނޑެއް ޖަހައި، މި މެޗުން މިލާން މޮޅުކޮށްދީފައެވެ.
މި ނަތީޖާއާއެކު ޔޫރޮޕާ ލީގުގެ ޖާގައެއްވެސް ނުލިބި ނިއުކާސަލް ވަނީ މުބާރާތުން ކަޓާފައެވެ. އެގޮތުން ނިއުކާސަލް ފުލުގައި އޮތީ ކުޅުނު ހަ މެޗުން ލިބުނު ފަސް ޕޮއިންޓާއެކުއެވެ. އަދި ޔޫރޮޕާ ލީގުގެ ޖާގައެއް ހޯދި މިލާން އޮތީ ތާވަލުގެ ތިންވަނައިގައި ހަ މެޗުން އަށް ޕޮއިންޓާއެކުއެވެ.