ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލުގެ އިތުބާރު ނެތްކަމުގެ މައްސަލަ ހުށަހަޅަން، އެ އެސޯސިއޭޝަނުގެ މެންބަރު ކުލަބުތަކުގެ ސޮއި ހޯދުމުގެ މަސައްކަތް ފަށައިފިއެވެ.
މި މަސައްކަތް ފެއްޓެވީ އެ އިދާރާގެ ކުރީގެ ރައީސް އަދި މަހިބަދޫ ދާއިރާގެ މެންބަރު އަޙްމަދު ތޯރިގު (ޓޮމް) އެވެ. އަންނަ އަހަރު ބާއްވާ އިންތިހާބުގައި އެފްއޭއެމުގެ ރައީސްގެ މަގާމަށް ވާދަކުރައްވާނެކަން، މީގެ ކުރިންވެސް އެ މަގާމު ފުރުއްވި ގައުމީ ޓީމުގެ ކުރީގެ ފޯވާޑް ޓޮމް ވަނީ މިދިޔަ އޮކްޓޯބަރު މަހުގެ ތެރޭގައި އިއުލާން ކުރައްވާފައެވެ.
ސޯޝަލް މީޑިއާގައި ހިއްސާކުރި ޕޯސްޓެއްގައި ޓޮމް ވިދާޅުވީ އެފްއޭއެމުގެ ރައީސް ބައްސާމުގެ އިތުބާރުނެތްކަމުގެ މައްސަލަ ހުށަހެޅުމަށް ކުލަބުތަކުގެ ސޮއި ހޯދުމުގެ މަސައްކަތް ފެށިފައިވާ ކަމަށެވެ. އަދި ފުޓްބޯޅައަށް ކިރިޔާވެސް ކުލުނެއް ހުރިނަމަ ރީތިގޮތަކީ ބައްސާމް އިސްތިއުފާދިނުން ކަމަށްވެސް ވަނީ ބުނެފައެވެ.
އެފްއޭއެމުގެ އަސާސީ ގަވާއިދުގައި ބުނާގޮތުން އެ އެސޯސިއޭޝަނުގެ މެންބަރު ކުލަބުތަކުގެ ތެރެއިން ތިންބައިކުޅަ ދެ ބައި ކުލަބުތަކުން، ހުށަހަޅައިފިނަމަ އިތުބާރު ނެތްކަމުގެ މައްސަލައިގައި ވޯޓުނެގުމަށް ކޮންގްރެސްއެއް ބާއްވައި، އިތުބާރު ނެތްކަމަށް ފެނޭތޯ ވޯޓަށް އަހަން ޖެހޭނެއެވެ.
ބައްސާމުގެ އިތުބާރު ނެތްކަމުގެ މައްސަލަ ހުށަހަޅަން މަސައްކަތްކުރަމުން އަންނައިރު، އޭނާގެ ޕާސްޕޯޓު ދާދި ފަހުން ވަނީ ހިފަހައްޓާފައެވެ. ބައްސާމުގެ ޕާސްޕޯޓް ހިފަހައްޓާފައި މިވަނީ އެފްއޭއެމަށް ދުނިޔޭގެ ފުޓްބޯޅަައިގެ މައި ޖަމުއިއްޔާ (ފީފާ) އިން ފޮނުވާ ފައިސާ ނަހަމަ ގޮތުގައި ބޭނުންކުރާކަމުގެ ސީރިއަސް ތުހުމަތުތަކެއް ކުރެވިފައި ވަނިކޮށެވެ.
މީގެ ކުރިން ބޭއްވި ނޫސްވެރިން ބައްދަލުވުމެއްގައި ވާހަކަފުޅުދައްކަވަމުން ޕްރޮސިކިއުޓަރ ޖެނެރަލް އަލްއުސްތާޛް ހުސައިން ޝަމީމު ވިދާޅުވީ އެފްއޭއެމަށް ފީފާއިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން މިހާތަނަށް ބެލި ބެލުމުން އެ އިދާރާގެ ރައީސް ބައްސާމަކީ އެންމެ އިސްކޮށް ތުހުމަތުކުރެވޭ ފަރާތް ކަމަށެވެ.