ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ އުދުވާންތައް ވަގުތީ ގޮތުން މެދުކަނޑައިލުމުގެ ކުޑަ ވަގުތު ކޮޅެއް ކުރިން ޣައްޒާގައި ހުންނަ އ.ދގެ ސްކޫލަކަށް ޔަހޫދީން ބޮންއަޅައި 27 މީހުން ޝަހީދު ކޮށްލާފައިވާ ކަން ހާމަވެއްޖެއެވެ. ޔަހޫދީންގެ ހަމަލަތައް އަމާޒު ކޮށްފައި ވަނީ ޖަބާލިޔާ ރެފިއުޖީ ކޭމްޕުގައި ހުންނަ އ.ދއިން ހިންގާ ސްކޫލަކަށެވެ. މި ކަން ހާމަކޮށްފައި ވަނީ ޣައްޒާގައި ވެރިކަން ކުރާ ޙަމާސް ޖަމާޢަތުންނެވެ.
48 ދުވަހަށް ފަހު ޔަހޫދީންގެ އުދުވާންތައް ވަގުތީ ގޮތުން މެދުކަނޑައިލާފައި ވަނީ ނޮވެންބަރު 24 ވަނަ ދުވަހު ޣައްޒާ ގަޑިން ހެނދުނު 7 ޖެހިއިރުއެވެ. ޙަމާސް ޖަމާޢަތުން ބުނީ، އުދުވާންތައް މެދުކަނޑައިލުމުގެ ކުރިން ޔަހޫދީން ހަމަލަ ދީފައި ވަނީ ޖަބާލިޔާ ރެފިއުޖީ ކޭމްޕުގައި ހުންނަ އަބޫ ޙުސައިން ސްކޫލަށް ކަމުގައެވެ. އެއީ، ފަލަސްޠީނުގެ ރެފިއުޖީންނާ ބެހޭ އ.ދގެ އިދާރާ [ޔޫ.އެން ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)]ން ހިންގާ ސްކޫލެކެވެ.
އެ ސްކޫލް މި ވަގުތު ބޭނުން ކުރަމުން ދަނީ ޔަހޫދީންގެ ހަމަލަތަކުގައި ގެދޮރު ނެތި ކޮށްލާފައިވާ އެތަކެއް ސަތޭކަ ބަޔަކަށް ހިޔާވަހިކަމާއި ރައްކާތެރިކަން ފޯރުކޮށްދިނުމަށެވެ. އަދި، އެ ތަނުގައި ތިބި ފަލަސްޠީނުގެ ޢާންމުންނަށް ޔޫ.އެން.އާރް.ޑަބްލިޔު.އޭން ދިޔައީ ކާބޯތަކެއްޗާއި ސާފު ބޯފެން އަދި ޒަރޫރީ އެހެނިހެން ސާމާނު ފޯރު ކޮށްދެމުންނެވެ. އެއީ، ޣައްޒާގެ އުތުރުގައި ހުންނަ ސްކޫލެކެވެ.
އަބޫ ޙުސައިން ސްކޫލުގެ އިތުރުން ޣައްޒާގެ ހުންނަ އިންޑޮނީޝިޔާ ހޮސްޕިޓަލަށް ވެސް ޔަހޫދީން ވަނީ ހަމަލަތައް އަމާޒު ކޮށްފައެވެ. ޣައްޒާގެ ޞިއްޙަތާ ބެހޭ ވުޒާރާގެ ތަރުޖަމާނު އަޝްރަފް އަލް-ޤުދްރާ ވިދާޅުވީ އިންޑޮނީޝިޔާ ހޮސްޕިޓަލަށް ޔަހޫދީން ވަރުގަދަ ހަމަލަތަކެއް ދީފައިވާ ކަމުގައެވެ. އަދި، މި ހަމަލަތަކުގައި ހޮސްޕިޓަލުގެ ޢިމާރާތަށް ބޮޑެތި ގެއްލުންތަކެއް ލިބިފައިވާ ކަމުގައި ވެސް އޭނާ ވިދާޅުވިއެވެ. އެ ތަނުގައި މިހާރު ވެސް 200 އެއްހާ ބަލިމީހުންނާއި، ޞިއްޙީ ޚިދުމަތްތެރިން ތިބި ކަމުގައި އޭނާ ވިދާޅުވިއެވެ.
މީގެ އިތުރުން ޚާނީޔޫނުސްގެ ޝައިޚް ނާޞިރު އަވަށަށް ވެސް ޔަހޫދީން ވަނީ ރަޙުމު ކުޑަ ހަމަލަތަކެއް ދީފައެވެ. ޣައްޒާގެ ދެކުނުގައި އޮންނަ ޚާނީޔޫނުސްއަށް ދިން ހަމަލަތަކުގައި ފަސް މީހުން ޝަހީދު ކޮށްލާފައިވާއިރު، ގިނަ ޢަދަދެއްގެ ބަޔަކު ޒަޚަމުވެފައިވާ ކަމުގައި ވެސް ޙަމާސް ޖަމާޢަތުން މަޢުލޫމާތުދެއެވެ. އަދި، ޣައްޒާގެ އުތުރުގައި އޮންނަ ޝައިޚް ރަޟްވާން ކިޔާ ސަރަޙައްދަކަށް ދިން ހަމަލަތަކެއްގައި 10 މީހުން ޝަހީދު ކޮށްލާފައިވެއެވެ. މި ހުރިހާ ހަމަލަތަކެއް ދީފައި ވަނީ، އުދުވާންތައް ވަގުތީ ގޮތުން މެދުކަނޑައިލަން ވެފައިވާ އެއްބަސްވުމަށް އަމަލު ކުރަން ފެށުމުގެ ކުޑަ ވަގުތު ކޮޅެއް ކުރިންނެވެ.
ޣައްޒާގެ އިތުރުން ހުޅަނގު އައްސޭރީގައި ވެސް ޔަހޫދީ ފައުޖުން ދިޔައީ އުދުވާންތައް ހިންގަމުންނެވެ. މި އުދުވާންތަކުގައި 12 އަހަރުގެ ފިރިހެން ކުއްޖެއް ކަމުގައިވާ މުޙައްމަދު އިބްރާހީމް ފުއާދު އަދްލީ ޝަހީދު ކޮށްލާފައިވާ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުންޏެވެ. އަދްލީގެ މަރާ އެކު، އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ އުދުވާނުގައި ހުޅަނގު އައްސޭރީގައި ޝަހީދު ކޮށްލާފައިވާ މީހުންގެ ޢަދަދު ވަނީ 229 އަށް އަރާފައެވެ. އޭގެ ތެރޭގައި 52 ކުޑަކުދިން ވެސް ހިމެނެއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 14,800 އަށް އުފުލިފައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 36,000 އަށް އަރާފައެވެ.