ޗައިނާގެ ބައެއް ސަރަޙައްދުތަކުގައި ނޭވާލާ ނިޒާމުގެ ބަލިތަކާއި ނިއުމޯނިޔާ ހަލުވިކަމާ އެކު ފެތުރެމުންދާ ކަން ހާމަވެއްޖެއެވެ. އެންމެ ހަލުވި ކަމާ އެކު ނިއުމޯނިޔާ ފެތުރެމުން ދަނީ ކުޑަކުދިންގެ މެދުގައެވެ. މި ކަމާ ގުޅިގެން ދުނިޔޭގެ ޞިއްޙަތު ޖަމުޢިއްޔާ [ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)]ން ވަނީ، މި ބަލިތަކާ ގުޅޭ މަޢުލޫމާތު ހާމަ ކުރުމަށް ޗައިނާގެ ސަރުކާރަށް އިލްތިމާސް ކޮށްފައެވެ.
ޗައިނާގެ ބައެއް ސަރަޙައްދުތަކުގައި ނޭވާލާ ނިޒާމުގެ ބަލިތައް ހަލުވިކަމާ އެކު ފެތުރެމުންދާ ކަން ފުރަތަމަ ހާމަ ކޮށްފައި ވަނީ އެ ޤައުމުގެ ޞިއްޙަތާ ބެހޭ އިދާރާ [ނޭޝަނަލް ހެލްތް ކޮމިޝަން (އެން.އެޗް.ސީ)]ންނެވެ. އެ އިދާރާއިން މި ކަމާ ގުޅޭ މަޢުލޫމާތު އެންމެ ފުރަތަމަ ހިއްޞާ ކޮށްފައި ވަނީ ނޮވެންބަރު 13 ވަނަ ދުވަހުއެވެ.
އެ އިދާރާއިން ބުނީ، ނޭވާލާ ނިޒާމުގެ ބަލިތަކާއި ނިއުމޯނިޔާ ފެތުރުން އިތުރުވެފައި ވަނީ، ކޮވިޑް-19އާ ގުޅިގެން އަޅާފައިވާ ރައްކާތެރި ކަމުގެ ފިޔަވަޅުތަކަށް ލުއިދިނުމުން ކަމުގައެވެ. އަދި، އެއަށްފަހު ޢާންމު ބަލިތައް ފަތުރާ 'އިންފްލުއެންޒާ'، 'މައިކޯޕްލާސްމާ ނިއުމޯނިޔައި'، ކުޑަކުދިންނަށް ބަލިފަތުރާ ބެކްޓީރިޔާ، އަދި 'ރެސްޕިރޭޓަރީ ސިންކްޝަލް ވައިރަސް' (އާރް.އެސް.ވީ) ފެތުރުމުން ޢާންމުވެފައިވާ ކަމުގައެވެ.
މިހާރު ފެތުރެމުންދާ ބަލިތަކާ ގުޅޭ ފުރިހަމަ މަޢުލޫމާތު ހާމަ ކުރަން ޑަބްލިޔު.އެޗް.އޯއިން ޗައިނާއަށް ގޮވައިލާފައިވާއިރު، 2019 ވަނަ އަހަރުގެ ފަހުކޮޅު ޗައިނާގެ ވޫހާންގައި ކޮވިޑް-19 ފެތުރެން ފެށުމާ އެކު ވެސް އެ ޤައުމަށް މި ފަދަ ސުވާލުތަކެއް އަމާޒުކޮށްފައި ވަނިކޮށް ކަން ފާހަގަ ކޮށްލަން ޖެހެއެވެ. އެ ފަހަރު ވެސް، ޑަބްލިޔު.އެޗް.އޯއިން ވަނީ ކޮވިޑް-19އާ ފެތުރެމުންދާ ގޮތާ ގުޅޭ މަޢުލޫމާތު ހާމަ ކުރަން އެ ޤައުމަށް އެތަކެއް ފަހަރެއްގެ މަތިން ގޮވައިލާފައެވެ.
ޑަބްލިޔު.އެޗް.އޯއިން ބުނީ ޗައިނާގެ އުތުރުގެ ބައެއް ސަރަޙައްދުތަކުގައި ދިރިއުޅޭ ކުޑަކުދިންގެ މެދުގައި ހަލުވިކަމާ އެކު ނިއުމޯނިޔާ ފެތުރެމުންދާ ކަމުގައެވެ. މިއީ، ނޮވެންބަރު 13 ވަނަ ދުވަހު ޗައިނާގެ އެން.އެޗް.ސީން އިޢުލާނު ކޮށްފައިވާ ނޭވާލާ ނިޒާމުގެ ބަލިތަކާ ގުޅުން ހުރި ކަމެއް ކަން އަދި ސާފު ނޫން ކަމުގައި ޑަބްލިޔު.އެޗް.އޯގެ ޕްރޮގްރާމް ފޯ މޮނިޓަރިންގް އެމަރޖިންގް ޑިސީސަސް (ޕްރޯމެޑު)ން ބުންޏެވެ.
މި ބަލިތަކާ ގުޅޭ އިތުރު ތަހުލީލުތައް ހަދަން ޑަބްލިޔު.އެޗް.އޯއިން ބޭނުންވެއެވެ. އަދި، މި ބަލިތަކާ ގުޅޭ 'އެޕިޑިމިއޮލޮޖިކް' އަދި 'ކްލިނިކަލް' މަޢުލޫމާތުގެ އިތުރުން ޗައިނާއިން މިހާތަނަށް ހަދާފައިވާ ތަހުލީލުތަކުގެ ނަތީޖާތައް ހިއްސާ ކުރުމަށް ޑަބްލިޔު.އެޗް.އޯއިން ވަނީ އެ ޤައުމަށް އަންގާފައެވެ. ޑަބްލިޔު.އެޗް.އޯއިން ކަނޑައަޅާފައިވާ މިންގަނޑުތަކަށް ބަލާއިރު، ޗައިނާއިން 24 ގަޑިއިރުގެ ތެރޭގައި މި ހުރިހާ މަޢުލޫމާތެއް އެ ޖަމުޢިއްޔާއަށް ފޯރުކޮށްދޭން ޖެހޭނެއެވެ.
މި ބަލިތަކާ ގުޅޭ މަޢުލޫމާތު ހާމަ ކުރުމަށް ޑަބްލިޔު.އެޗް.އޯއިން ޗައިނާގެ ސަރުކާރަށް ގޮވައިލާފައި މި ވަނީ، މި ބަލިތަކާ ގުޅޭ މަޢުލޫމާތު ހޯދަން ނޫސްވެރިން ސުވާލު ކުރަމުންދާތީ ކަމުގައި އެ ޖަމުޢިއްޔާއިން ބުނެއެވެ. ނޮވެންބަރު 13 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ކުޑަކުދިންގެ މެދުގައި ނިއުމޯނިޔާ ޢާންމުވެފައިވާ ކަން ޗައިނާއިން ހާމަކޮށްފައި ނެތް ނަމަވެސް، ތައިވާނުގެ ނޫހެއް ކަމުގައިވާ އެފް.ޓީ.ވީ ނިއުސްއިން ވަނީ މި ކަމާ ގުޅޭ ރިޕޯޓެއް ޝާއިޢު ކޮށްފައެވެ.
ކޮވިޑް-19އާ ގުޅިގެން އަޅާފައި އޮތް ރައްކާތެރި ކަމުގެ ފިޔަވަޅުތައް ޗައިނާއިން އުވައިލާފައި ވަނީ 2022 ވަނަ އަހަރުގެ ޑިސެންބަރު މަހުގެ ތެރޭގައެވެ. މިއީ، ފިޔަވަޅުތައް އުވައިލި ފަހުން ޗައިނާއަށް ފިނި މޫސުމާ ކުރިމަތިވާ ފުރަތަމަ ފަހަރެވެ. ކޮވިޑާ ގުޅިގެން އަޅާފައިވާ ފިޔަވަޅުތައް އުވައިލުމާ ގުޅިގެން އެހެން ޤައުމުތަކުގައި ވެސް ނޭވާލާ ނިޒާމުގެ ބަލިތައް ފެތުރުން އިތުރުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.