ޣައްޒާގެ ޖަބާލިޔާ ރެފިއުޖީ ކޭމްޕަށް ޔަހޫދީން ދީފައިވާ ރަޙުމު ކުޑަ ހަމަލައަކީ 'ހަނގުރާމައިގެ ކުށެއް'ގެ ގޮތުގައި ބެލޭނެ ކަމުގައި އ.ދގެ އިންސާނީ ހައްޤުތަކާ ބެހޭ އިދާރާއިން ބުނެފިއެވެ. ދެ ދުވަހުގެ މަތިން ޖަބާލިޔާގައި ދިރިއުޅޭ ކުށެއް ނެތް މުސްލިމުންނަށް އަމާޒުކޮށް ޔަހޫދީ ފައުޖުން ދީފައިވާ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 195 އަށް އަރާފައެވެ. އަދި، ސުންނާފަތި ކޮށްލާފައިވާ ޢިމާރާތްތަކުގެ ދަށުގައި އަދިވެސް 120 އަށްވުރެ ގިނަ މީހުން ތާށިވެފައިވާ ކަމުގައި ޣައްޒާގެ އޮފިޝަލުން ވިދާޅުވެއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,805 އަށް އަރާފައިވާއިރު، އޭގެ ތެރޭގައި 3,500 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
"ޖަބާލިޔާ ރެފިއުޖީ ކޭމްޕަށް ދީފައިވާ ހަމަލަތަކުގައި ޝަހީދުކޮށްލާފައިވާ، އަދި ޒަޙަމު ކޮށްލާފައިވާ މީހުންގެ ޢަދަދަށް ބަލާއިރު، އަދި އެ ކޭމްޕަށް ދީފައިވާ ގެއްލުންތަކަށް ބަލާއިރު، އެ ހަމަލަތަކަކީ 'ހަނގުރާމައިގެ ކުށެއް'ގެ ގޮތުގައި ބެލުމުގެ ފުރުޞަތު އެބައޮތް. މިއީ ވަރަށް ކަންބޮޑުވާ މައްސަލައެއް،" އ.ދގެ އިންސާނީ ހައްޤުތަކާ ބެހޭ އިދާރާއިން އެކްސް (ކުރީގެ ޓްވިޓަރ)ގައި ޝާއިޢުކުރި ޕޯސްޓެއްގައި ބުންޏެވެ.
ޖަބާލިޔާ ކޭމްޕަށް ރަޙުމު ކުޑަ ހަމަލަތަކެއްދީ، ކުށެއް ނެތް ގިނަ ޢަދަދެއްގެ މުސްލިމުންތަކެއް ގަތުލު ކޮށްލާފައި ވަނީ އެ ތަނުގައި ފިލައިގެން އުޅުނު ޙަމާސް ޖަމާޢަތުގެ ދެ ކޮމާންޑަރެއް ޝަހީދު ކޮށްލުމުގެ ބޭނުމުގައި ކަމުގައި ޔަހޫދީ ފައުޖުން ބުނެއެވެ. އަދި، ޙަމާސްގެ އިސް ކޮމާންޑަރެއް ކަމުގައިވާ އިބްރާހީމް ބިޔާރީ ޝަހީދު ކޮށްލާފައިވާނެ ކަމުގައި ވެސް ޔަހޫދީ ފައުޖުން ބުނެއެވެ. ނަމަވެސް، ޙަމާސް ޖަމާޢަތުން ބުނީ ޖަބާލިޔާއަށް ޔަހޫދީ ފައުޖުން ހަމަލަ ދީފައިވާ ވަގުތުގައި ބިޔާރީ އެ ތަނުގައި ނެތް ކަމުގައެވެ.
އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވެސް ވަނީ ޖަބާލިޔާ ރެފިއުޖީ ކޭމްޕަށް ޔަހޫދީން ދީފައިވާ ރަޙުމު ކުޑަ ހަމަލަތަކާ ގުޅިގެން ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ، މި ހަމަލަތަކުގައި ކުށެއް ނެތް ކުޑަކުދިންނާއި އަންހެނުންގެ ގިނަ ޢަދަދެއްގެ ބަޔަކު ޝަހީދުކޮށްލާ، އެ މީހުންގެ ގެދޮރު ސުންނާފަތި ކޮށްލާފައިވާތީ އެ ކަމާ މެދު ކަންބޮޑުވެ ވަޑައިގަންނަވާ ކަމުގައެވެ.
އެ ކޭމްޕަށް ހަމަލަދީ ކުށެއް ނެތް މުސްލިމުންގެ ގިނަ ޢަދަދެއްގެ ބަޔަކު ރަޙުމު ކުޑަކޮށް ޝަހީދު ކޮށްލާފައި މި ވަނީ، ޣައްޒާގައި ހާލުގައި ޖެހިފައިވާ އެތަކެއް މިލިޔަން މުސްލިމުންނަށް އިންސާނީ އެހީތެރިކަން ފޯރުކޮށްދޭން ޒަޔަނިސްޓު އިސްރާޢީލުން ހުރަސް އަޅަމުންދާ މައްސަލައަކީ ބައިނަލްއަޤުވާމީ ޖިނާޢީ ކޯޓު ކަމުގައިވާ އިންޓަރނޭޝަނަލް ކްރިމިނަލް ކޯޓް (އައި.ސީ.ސީ)ގެ އިޙްތިޞާޞްގެ ދަށުން އެ ކޯޓަށް ބެލޭނެ މައްސަލައެއް ކަމުގައި އެ ކޯޓުގެ ޕްރޮސިކިޔުޓަރެއް ކަމުގައިވާ ކަރީމް ޚާން ވިދާޅުވެފައިވާ ދަނޑިވަޅެއްގައެވެ.
މި ގަތުލުއާންމާ ގުޅޭ ގޮތުން ވާހަކަފުޅު ދައްކަވަމުން އައި.ސީ.ސީގެ ޕްރޮސިކިޔުޓަރ ޚާން ވިދާޅުވީ ޣައްޒާގައި ހާލުގައި ޖެހިފައިވާ އެތަކެއް މިލިޔަން ޢާންމު ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ހުރަސް އެޅުމަކީ ބައިނަލްއަޤުވާމީ ޤާނޫނުތަކުގެ ދަށުން ޔަހޫދީންނަށް ކުރެވޭނެ ކަމެއް ނޫން ކަމުގައެވެ. އަދި، ޒަޔަނިސްޓު އިސްރާޢީލުން މިހާރު ކުރަމުން އެ ދަނީ ހަނގުރާމައިގެ ކުށެއް ކަމުގައެވެ.
ޖަބާލިޔާ ކޭމްޕަށް ދީފައިވާ ރަޙުމު ކުޑަ ހަމަލަތަކަކީ ހަނގުރާމައިގެ ކުށެއްގެ ގޮތުގައި ބެލުމުގެ ފުރުޞަތު އޮންނާނެ ކަމުގައި އ.ދގެ އިންސާނީ ހައްޤުތަކާ ބެހޭ އިދާރާއިން ބުނެފައިވާއިރު، އެ ފަދަ މައްސަލަތައް ބެލުމަކީ އައި.ސީ.ސީގެ އިޙްތިޞާޞްގައި ހިމެނޭ ކަމެކެވެ. ހަނގުރާމައިގެ ތެރެއިން ޢާންމުންނަށާއި، އެ މީހުންގެ ގެދޮރަށް ގަސްދުގައި ހަމަލަ ދިނުމަކީ ޖެނީވާ ކޮންވެންޝަންގެ ދަށުން މަނާ ކަމެކެވެ. ނަމަވެސް، ޔަހޫދީން ޣައްޒާގައި ކުރަމުން އެ ދަނީ ހަނގުރާމައެއް ނޫނެވެ. އެ މީހުން ހިންގަމުން އެ ދަނީ ގަތުލުއާންމެކެވެ. ލާއިންސާނީ ބޮޑު ޖަރީމާއެކެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.