މުސްލިމުންނާ ކުރިމަތިލުމަށް ޔަހޫދީން ޢާއްމުންނަށް ގިނަ ޢަދަދެއްގެ ހަތިޔާރު ބަހަން ފަށައިފިއެވެ.
ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތާއި ޔަހޫދީ ފައުޖުތަކާ ދެމެދު ވަރުގަދަ ޙަމަލާތަކެއް ބަދަލުކުރަމުންދާ ދަނޑިވަޅެއްގައި އިސްތިޢުމާރުކޮށްފައިވާ ބިންތަކުގައި ދިރިއުޅޭ މުސްލިމުންނާ ކުރިމަތިލުމަށް ޔަހޫދީންވަނީ 500އަށްވުރެ ގިނަ ހަނގުރާމަވެރި ޖަމާޢަތް އެކުލަވާލައިފައެވެ. އަދި އެ ޖަމާޢަތްތަކަށް 20،000 ބަޑި ބަހާފައިވާކަމަށާއި ކުރިއަށް އޮތް ދުވަސްތަކުގައި އިތުރު 20،000 ބަހަން ނިންމާފައިވާކަމަށް ޔަހޫދީ އަސްކަރިއްޔާއިން ބުނެފައިވެއެވެ. ޔަހޫދީ އަސްކަރިއްޔާއިން ހަނގުރާމަވެރި ޖަމާޢަތްތަކެއް އެކުލަވާލައި ހަތިޔާރު ބެހުމުގެ ކުރިންވެސް ޔަހޫދީ ވަކިވަކި ފަރުދުންވަނީ މުސްލިމުންނާ ދެކޮޅަށް ހަތިޔާރު ނަގައި ޙަމަލާތައް ދީފައެވެ.
ޔަހޫދީން އިސްތިޢުމާރުކޮށްފައިވާ ފަލަސްޠީނުގެ ބިންތަކުގައި ދިރިއުޅޭ މީހުންގެ %21އަކީ ޢަރަބިންނެވެ. 2021ވަނަ އަހަރުގެ ތެރޭގައި ޙަމާސާއި ޔަހޫދީ ފައުޖުތަކާ ދެމެދު ހަނގުރާމަ ފެށުމުން އިސްތިޢުމާރުކޮށްފައިވާ ފަލަސްޠީނުގެ ބިންތަކުގައި ދިރިއުޅޭ މުސްލިމުންވަނީ ޔަހޫދީންނާ ދެކޮޅަށް ނުކުމެފައެވެ. އެހެންކަމުން އެފަދަ ކަމެއް ތަކުރާރުނުވުމަށް އަޅަންޖެހޭ ފިޔަވަޅުތައް އަޅާނެކަމަށް ޔަހޫދީ އަސްކަރިއްޔާއިންވަނީ ބުނެފައެވެ. އެ ގޮތުން ފަލަސްޠީނުގެ ބިންތަކުގައި ދިރިއުޅޭ މުސްލިމުން ޙަމާސަށް ތާޢީދުކޮށް އަދި ޔަހޫދީންނާ ދެކޮޅަށް ޝުޢޫރު ފާޅުކުރާނަމަ ހައްޔަރުކުރަމުންދާކަމަށްވެސް ޔަހޫދީ އަސްކަރިއްޔާއިންވަނީ ބުނެފައެވެ.