ޔޫކްރެއިންގެ ވެރިރަށް ކީވަށް ދިން ވަރުގަދަ ޑްރޯން ހަމަލަތަކެއް ދިފާޢުކޮށްފިއެވެ. ރަޝިޔާއިން ދީފައިވާ ޑްރޯން ހަމަލަތަކާ އެކު ކީވްގެ ބައެއް ސަރަޙައްދުތަކަށް ގެއްލުން ލިބިފައިވާ ކަމުގައި ޔޫކްރެއިންގެ އަސްކަރިއްޔާއިން ބުނެއެވެ. ނަމަވެސް، އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.
ޔޫކްރެއިންގެ އަސްކަރިއްޔާގެ އިސް އޮފިޝަލެއް ކަމުގައިވާ ސެރްހީ ޕޮޕްކޯ ވިދާޅުވީ، ރަޝިޔާއިން ބޭނުންކުރި އެއް ޑްރޯން ދިފާޢުކޮށް ވައްޓައިލުމުގެ ސަބަބުން ކީވްގައި ޢާންމުން ދިރިއުޅޭ އެޕާޓްމަންޓް ޢިމާރާތަކަށް ވަރަށް ބޮޑަށް ގެއްލުން ލިބިފައިވާ ކަމުގައެވެ. އަދި، އެ ޢިމާރާތުގައި ރޯވެފައިވާ ކަމުގައި ވެސް އޭނާ ވިދާޅުވިއެވެ.
ޕޮޕްކޯ ވިދާޅުވީ ކީވަށް ހަމަލަދޭން ރަޝިޔާއިން ބޭނުންކުރި 20 އަށްވުރެ ގިނަ ޑްރޯން ދިފާޢުކޮށް ވައްޓައިލާފައިވާ ކަމުގައެވެ. އޭގެ ތެރޭގައި ހިމެނެނީ އީރާނުގައި އުފައްދާފައިވާ "ޝާހިދު" މަރުކާގެ ޑްރޯންތައް ކަމުގައި ވެސް އޭނާ ވިދާޅުވިއެވެ.
ކީވަށް ވަރުގަދަ ޑްރޯން ހަމަލަތަކެއް ދީފައި މި ވަނީ، ރަޝިޔާގެ ބާރުގެ ދަށުގައި އޮތް ބައެއް ސަރަޙައްދުތަކަށް ވެސް ޑްރޯން ހަމަލަތަކެއް ދީފައިވާ ދަނޑިވަޅެއްގައެވެ. ރަޝިޔާގެ ދިފާޢީ ވުޒާރާއިން ބުނީ ކްރައިމިޔާއަށް ހަމަލަދޭން ބޭނުންކުރި އަށް ޑްރޯން ދިފާޢުކޮށް ވައްޓައިލާފައިވާ ކަމުގައެވެ. ކްރައިމިޔާއަކީ 2014 ވަނަ އަހަރު ރަޝިޔާގެ ފައުޖުތަކުން އަތްގަދަ ކޮށްފައިވާ ސަރަޙައްދެކެވެ.
މީގެ އިތުރުން، ކްރައިމިޔާގައި ގާއިމުކޮށްފައިވާ ރަޝިޔާގެ އަސްކަރީ މަރުކަޒުތަކަށް ހަމަލަދޭން މަސައްކަތްކުރި ޔޫކްރެއިންގެ ސިފައިންނާ އެކު ދަތުރު ކުރަމުން ދިޔަ ތިން އުޅަނދަށް ހަމަލަދީ، އެ މީހުން ނައްތައިލާފައިވާނެ ކަމުގައި ވެސް ރަޝިޔާގެ ދިފާޢީ ވުޒާރާއިން ބުންޏެވެ. ކްރައިމިޔާ ކައިރީގައި ހަރަކާތްތެރިވާ ރަޝިޔާގެ އަސްކަރީ މަނަވަރުތަކަށް ހަމަލަދޭން ޔޫކްރެއިނުން މީގެ ކުރިން ކަނޑުގައި ދުއްވާ ޑްރޯންތައް ބޭނުން ކޮށްފައިވާ ކަން ވެސް ފާހަގަ ކޮށްލަން ޖެހެއެވެ.
ރަޝިޔާއަށް ކީވަށް ހަމަލަދޭން މަސައްކަތްކޮށްފައި މި ވަނީ ޔޫކްރެއިންގެ އިރުމަތީގައިވާ ދޮނެޓްސްކުގެ ރަށެއް ކަމުގައިވާ ކޮސްޓިޔަންތިނިވްކާގެ ކާރޫބާރޫ ބޮޑު މާރުކޭޓަކަށް ނުރައްކާތެރި ހަމަލަތަކެއް ދިންތާ ދެ ދުވަސް ފަހުންނެވެ. ކޮސްޓިޔަންތިނިވްކާގެ މާރުކޭޓަކަށް ގިނަ ޢަދަދެއްގެ ޢާންމުން ޖަމާވެފައިވާ ވަގުތެއްގައި ދިން ހަމަލާގައި 17 މީހުން މަރުވިއެވެ. އޭގެ ތެރޭގައި ތުއްތު ކުއްޖަކު ހިމެނޭ ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވިއެވެ.
މާރުކޭޓަށް އަމާޒުކޮށް ދިން ހަމަލައާ ގުޅޭ ގޮތުން ރަޝިޔާއިން ވަކި އެއްޗެއް ހާމަކޮށްފައެއް ނުވެއެވެ. ގަސްދުގައި ޔޫކްރެއިންގެ ޢާންމުންގެ ގެދޮރާއި، ޢާންމުން ދިރިއުޅޭ ޢިމާރާތްތަކަށް ރަޝިޔާގެ ފައުޖުތަކުން ހަމަލަދެމުންދާ ކަމަށް ޔޫކްރެއިނުން ދަނީ ތުހުމަތު ކުރަމުންނެވެ. ނަމަވެސް، ރަޝިޔާއިން މި ފަދަ ތުހުމަތުތައް ދޮގު ކުރެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 565 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ.
އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.