އަފްޣާނިސްތާނާއި ޕާކިސްތާން ގުޅޭ ސަރަޙައްދީ ރޮނގުގައި ކައިރީގައި ދެ ޤައުމުގެ ފައުޖުތަކުގެ ދެމެދުގައި ހަމަލަ ބަދަލުކުރަން ފެށުމާ ގުޅިގެން ދެ ޤައުމުގެ ދެމެދުގައި އޮންނަ މައި ސަރަޙައްދީ ހުރަސް ބަންދުކޮށްފިއެވެ. ޠޮރްޚަމްގައި އޮންނަ "ޚައިބަރް ޕާސް"ގެ ނަން ދީފައިވާ ސަރަޙައްދީ ހުރަސް ބަންދުކޮށްފައިވާ ކަން އިޢުލާނު ކޮށްފައި ވަނީ ޕާކިސްތާނުންނެވެ.
ދެ ޤައުމުގެ ފައުޖުތަކުން ހަމަލަ ބަދަލު ކުރަން ފަށާފައި ވަނީ ގިނަ ޢަދަދެއްގެ ޢާންމުން ޚައިބަރް ޕާސް ކައިރިއަށް ޖަމާވެފައިވާ ކާރޫބާރޫ ބޮޑު ވަގުތެއްގައި ކަމަށް މަންޒަރު ފެނުނު މީހުން ބުންޏެވެ. އަފްޣާނިސްތާނުގައި ހަރަކާތްތެރިވާ ޠާލިބާނުންނާއި ޕާކިސްތާނުގެ ސަރަޙައްދީ ރޮނގު ބަލަހައްޓާ ސިފައިންނާ ދެމެދު ހިނގި ހަމަލަ ބަދަލުކުރުންތަކުގައި ޕާކިސްތާނުގެ ސިފައިންގެ މީހަކު ޒަޚަމުވެފައިވާ ކަމަށް މަންޒަރު ފެނުނު ފަރާތްތަކުން ބުނެއެވެ.
އަފްޣާނިސްތާނާއި ޕާކިސްތާނުން 2,600 ކިލޯމީޓަރުގެ ދިގު ސަރަޙައްދީ ރޮނގެއް ހިއްސާކުރާ އިރު، ޠޮރްޚަމްގައި އޮންނަ ސަރަޙައްދީ ހުރަހަކީ އަފްޣާނިސްތާނަށް މުދާ އެތެރެކުރެވެން އޮންނަ މައި އެއް މަގެވެ. މީގެ ކުރިން ވެސް ދެ ފަރާތުގެ ދެމެދުގައި ހިނގާފައިވާ ހަމަލަ ބަދަލުކުރުންތަކާ ގުޅިގެން ޚައިބަރް ޕާސް ބަންދު ކުރަން ޖެހިފައިވެއެވެ. ފެބްރުވަރީ މަހު ހިނގި މި ފަދަ ހާދިސާއަކާ ގުޅިގެން އެތަކެއް ދުވަހަކަށް ސަރަޙައްދީ ހުރަސް ބަންދުކުރިއެވެ.
ޚައިބަރް ޕާސް ބަންދުކުރަން ޖެހުނު ހާދިސާގައި ޒިންމާ އުފުލަން އަފްޣާނިސްތާނުގައި ވެރިކަން ކުރާ ޠާލިބާނުން ވެސް އަދި ޕާކިސްތާނުގެ އަސްކަރިއްޔާއިން ވެސް ދަނީ ދެކޮޅު ހަދަމުންނެވެ. ހަމަލަ ބަދަލުކުރަން ފެށީ ކޮން ފަރާތަކުން ކަން ސާފު ނޫން ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. 2021 ވަނަ އަހަރުގެ އޮގަސްޓު މަހު ޠާލިބާނުން އަފްޣާނިސްތާނުގެ ވެރިކަން ފޭރިގަތް ފަހުން ދެ ޤައުމުގެ ދެމެދުގައި އޮތް ގުޅުންތައް ހީނަރުވެފައިވާ ކަން ފާހަގަކުރެވެއެވެ.