ބްރެޒިލްގެ ދެކުނުގައިވާ ހިއު ގްރަންޖެ ދު ސޫ ސްޓޭޓަށް އެރި ބާރުގަދަ ތޫފާނަކާ ގުޅިގެން ހިނގި ނުރައްކާތެރި ހާދިސާތަކުގައި މަރުވި މީހުންގެ ޢަދަދު 27 އަށް އަރައިފިއެވެ. ތޫފާނާ އެކު ބޯކޮށް ވާރޭވެހި ކޯރުތައް ފުރިގެން ބަންޑުންވުމާ ގުޅިގެން މަގުތަކުގައި ފެންބޮޑުވެ ޢާންމުންގެ ގެދޮރަށް ވަނީ ފެންވަދެފައެވެ. އަދި، ބޮޑެތި ގެއްލުންތަކެއް ވަނީ ލިބިފައެވެ.
ހިއު ގްރަންޖެ ދު ސޫގެ ގަވަރުނަރު އެދުއާރްދޮ ލެއީޗި ވިދާޅުވީ މެދުކެނޑުމެއްނެތި ބޯކޮށް ވާރޭވެހުމާ ގުޅިގެން އެ ސްޓޭޓްގެ 60 އަށްވުރެ ގިނަ ރަށުގައި ފެންބޮޑުވެފައިވާ ކަމުގައެވެ. މިއީ، ފަހުގެ ތާރީޚެއްގައި އެ ސްޓޭޓަށް ކުރިމަތިވި އެންމެ ނުރައްކާތެރި ޤުދުރަތީ ކާރިސާ ކަމުގައި ވެސް އޭނާ ވިދާޅުވިއެވެ.
ފެންބޮޑުވުމާ ގުޅިގެން ހިނގާފައިވާ އެކި ހާދިސާތަކުގައި މަރުވި މީހުންގެ ޢަދަދު 27 އަށް އަރާފައިވާއިރު، އޭގެ ތެރެއިން 15 މީހުންނަކީ އެއް ގެއެއްގައި ދިރިއުޅޭ 15 މީހުންނެވެ. އެ މީހުން މަރުވެފައި ވަނީ 50,000 މީހުންގެ އާބާދީއެއް އޮންނަ މޫކޫއިންނެވެ. ފެންބޮޑުވުމާ ގުޅިގެން ގިނަ ޢަދަދެއްގެ ގެދޮރާއި ޢިމާރާތްތަކަށް ގެއްލުން ލިބިފައިވާއިރު، 3,700 އަށްވުރެ ގިނަ މީހުންގެ ގެފޮރު ހަލާކުވެ، އެ މީހުން މަގުމަތިވެފައިވާ ކަމުގައި އޮފިޝަލުން ވިދާޅުވިއެވެ.
މޫކޫގައި ހާލުގައި ޖެހިފައިވާ އެތަކެއް ސަތޭކަ ބަޔަކަށް ވަގުތީ ހިޔާވަހިކަން ފޯރުކޮށްދޭން އެ ރަށުގެ އޮފިޝަލުން ދަނީ މަސައްކަތް ކުރަމުންނެވެ. އެ ރަށުގައި ގެދޮރު ނެތިފައިވާ ގިނަ ޢަދަދެއްގެ ބަޔަކު މި ވަގުތު ތިބީ ސިޓީ ހޯލްގައެވެ. އެ މީހުންނަށް އިންސާނީ އެހީތެރިކަން ފޯރުކޮށްދޭން ވެސް އޮފިޝަލުން ދަނީ މަސައްކަތް ކުރަމުންނެވެ.
ފެންބޮޑުވުމާ ގުޅިގެން ހިނގާފައިވާ ހާދިސާތަކުގައި މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމަށާއި، މި ހާދިސާގައި މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އޮފިޝަލުން ވިދާޅުވިއެވެ. ހިއު ގްރަންޖެ ދު ސޫއާ އިންވެގެން އޮންނަ ސަންތަ ކަތަރީނާ ސްޓޭޓުން ވެސް އެކަކު މަރުވި ކަމުގައި އެ ސްޓޭޓްގެ އޮފިޝަލުން ވިދާޅުވިއެވެ.
ޖޫން މަހު ވެސް ހިއު ގްރަންޖެ ދު ސޫއަށް ބާރުގަދަ ތޫފާނެއް އަރާފައިވެއެވެ. އެ ތޫފާނާ ގުޅިގެން އެ ސްޓޭޓްގައި ހިނގި އެކި ހާދިސާތަކުގައި 16 ވަރަކަށް މީހުން މަރުވިއެވެ. އަދި، 40 އަށްވުރެ ގިނަ ރަށަށް ބޮޑެތި ގެއްލުންތަކެއް ލިބުނެވެ. އެންމެ ބޮޑެތި ގެއްލުންތައް ލިބިފައިވާ ރަށްތަކުގެ ތެރޭގައި އެ ސްޓޭޓްގެ ވެރިރަށް ޕޯތޮ އަލޭގްރީ ހިމެނެއެވެ.
އަދި، ފެބުރުވަރީ މަހު ސައު ޕައުލޯ ސްޓޭޓަށް ބޯކޮށް ވާރޭވެހުމާ ގުޅިގެން ހިނގި ފެންބޮޑުވުމާއި، ބިންގަނޑު ކެނޑުމާއި، ކިސަޑު ފޭބުމުގެ ހާދިސާތަކެއްގައި 65 މީހުން މަރުވިއެވެ. މޫސުމީ ބަދަލުތަކާ ގުޅިގެން ބްރެޒިލަށް ކުރިމަތިވަމުންދާ ޤުރުދަތީ ކާރިސާތަކުގައި ނުރައްކާތެރި ކަން ބޮޑުވަމުންދާ ކަމަށް އެ ޤައުމުގެ މޫސުމާ ބެހޭ މާހިރުން ޤަބޫލުކުރެއެވެ.